'ಗೋಲ್ಡ್' ಪೋಸ್ಟರ್ ನೋಡಿ ಬೌಲ್ಡ್ ಆದ ಬಾಲಿವುಡ್

Recommended Video

ನಟ ಅಕ್ಷಯ್ ಕುಮಾರ್ ಈಗ ಮತ್ತೊಂದು ಅದ್ಭುತ ಪಾತ್ರ ಹಾಗೂ ಅತ್ಯದ್ಭುತ ಸಿನಿಮಾ ಮೂಲಕ ಬಂದಿದ್ದಾರೆ. 'ಪ್ಯಾಡ್ ಮ್ಯಾನ್' ಚಿತ್ರದ ಗೆಲುವಿನ ನಂತರ ಅಕ್ಷಯ್ ಕುಮಾರ್ 'ಗೋಲ್ಡ್' ಸಿನಿಮಾ ಮಾಡಿದ್ದಾರೆ. ಈ ಸಿನಿಮಾದ ಪೋಸ್ಟರ್ ಇತ್ತೀಚಿಗಷ್ಟೆ ಬಿಡುಗಡೆಯಾಗಿದೆ.

'ಗೋಲ್ಡ್' ಸಿನಿಮಾದ ಟೀಸರ್ ಈ ಹಿಂದೆಯೇ ಬಿಡುಗಡೆಯಾಗಿತ್ತು. ಅದರ ನಂತರ ಈಗ ಒಂದು ಪೋಸ್ಟರ್ ಹೊರಬಂದಿದೆ. ಚಿತ್ರದ ಬಿಡುಗಡೆಯ ದಿನಾಂಕವನ್ನು ಈ ಪೋಸ್ಟರ್ ಮೂಲಕ ಅನೌನ್ಸ್ ಮಾಡಲಾಗಿದೆ. ವಿಶೇಷ ಅಂದರೆ, ಸ್ವಾತಂತ್ರ್ಯ ದಿನಾಚರಣೆಯ ಅಂಗವಾಗಿ ಸಿನಿಮಾ ಇದೇ ಆಗಸ್ಟ್ 15ಕ್ಕೆ ಬಿಡುಗಡೆಯಾಗಲಿದೆ.

ಈ ಸಿನಿಮಾದಲ್ಲಿ ಅಕ್ಷಯ್ ಕುಮಾರ್ ಒಬ್ಬ ಬೆಂಗಾಲಿ ಹಾಕಿ ಆಟಗಾರನಾಗಿ ಕಾಣಿಸಿಕೊಂಡಿದ್ದಾರೆ. ಭಾರತಕ್ಕೆ ಸ್ವಾತಂತ್ರ್ಯ ಬರುವ ಮುನ್ನ ಒಲಿಂಪಿಕ್ ನಲ್ಲಿ ಚಿನ್ನ ಗೆಲ್ಲಬೇಕು ಎಂಬ ಕನಸು ಹೊಂದಿದ್ದ ಈ ಆಟಗಾರನ ಸುತ್ತ ಚಿತ್ರದ ಕಥೆ ಇದೆ. ಸದ್ಯ ರಿಲೀಸ್ ಆಗಿರುವ ಚಿತ್ರದ ಪೋಸ್ಟರ್ ನೋಡುಗರಿಗೆ ದೇಶಾಭಿಮಾನ ಹುಟ್ಟಿಸುವಂತಿದೆ.

ಈ ಹಿಂದೆ ಅಮೀರ್ ಖಾನ್ ಅವರ 'ತಲಾಶ್' ಚಿತ್ರವನ್ನು ನಿರ್ದೇಶನ ಮಾಡಿದ್ದ ರೀಮಾ ಕಾಗ್ಟಿ ಈಗ 'ಗೋಲ್ಡ್' ಸಿನಿಮಾ ಮಾಡಿದ್ದಾರೆ. ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಜೊತೆಗೆ ಮೌನಿ ರಾಯ್, ಕುನಾಲ್ ಕಪೂರ್ ನಟಿಸಿದ್ದಾರೆ.