ಸಾಹಸ ಮಾಡಲು ಹೋದ ನಟಿ ಜಾಕ್ವೆಲಿನ್ ಕಣ್ಣಿಗೆ ಶಾಶ್ವತ ಗಾಯ.!

ಮಾರ್ಚ್ ನಲ್ಲಿ ಆಗಿದ್ದ ಗಾಯ.!

ಕಳೆದ ಮಾರ್ಚ್ ತಿಂಗಳಲ್ಲಿ 'ರೇಸ್-3' ಸಿನಿಮಾದ ಚಿತ್ರೀಕರಣ ಅಬು ಧಾಬಿಯಲ್ಲಿ ನಡೆಯುತ್ತಿದ್ದಾಗ ಸ್ಕ್ವಾಶ್ ಆಡಲು ಹೋಗಿ ನಟಿ ಜಾಕ್ವೆಲಿನ್ ಕಣ್ಣಿಗೆ ಪೆಟ್ಟು ಬಿದ್ದಿತ್ತು. ''ಇದು ಸಣ್ಣ-ಪುಟ್ಟ ಗಾಯವಷ್ಟೇ'' ಎಂದು ಅಂದು ಪ್ರತಿಕ್ರಿಯೆ ಕೊಟ್ಟಿದ್ದ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಗೆ ಇದೀಗ ತಮ್ಮ ಕಣ್ಣಿಗೆ ಬಿದ್ದಿರುವ ಪೆಟ್ಟು ಶಾಶ್ವತವಾದದ್ದು ಎಂಬ ಸಂಗತಿ ಅರಿವಿಗೆ ಬಂದಿದೆ.

ಇನ್ಸ್ಟಾಗ್ರಾಮ್ ನಲ್ಲಿ ಬರೆದುಕೊಂಡಿರುವ ನಟಿ

''ಇದು ನನ್ನ ಕಣ್ಣಿಗೆ ಆಗಿರುವ ಶಾಶ್ವತ ಗಾಯ. ನನ್ನ ಐರಿಸ್ ಇನ್ಮುಂದೆ ಗೋಲಾಕಾರವಾಗಿ ಇರುವುದಿಲ್ಲ. ಆದ್ರೆ, ನನ್ನ ದೃಷ್ಟಿಗೆ ಯಾವುದೇ ಸಮಸ್ಯೆ ಆಗಿಲ್ಲ'' ಎಂದು ಇನ್ಸ್ಟಾಗ್ರಾಮ್ ನಲ್ಲಿ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಬರೆದುಕೊಂಡಿದ್ದಾರೆ.

ಸೂಪರ್ ಸ್ಟಂಟ್ಸ್ ಮಾಡಿರುವ ನಟಿ ಜಾಕ್ವೆಲಿನ್

'ರೇಸ್-3' ಚಿತ್ರದಲ್ಲಿ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಮೈನವಿರೇಳಿಸುವ ಸ್ಟಂಟ್ಸ್ ಮಾಡಿದ್ದಾರೆ. ಯಾವುದೇ ಸ್ಟಂಟ್ ಆದರೂ ಅದನ್ನ ನೀರು ಕುಡಿದಷ್ಟೇ ಸಲೀಸಾಗಿ ಮಾಡುವುದರಲ್ಲಿ ನಟಿ ಜಾಕ್ವೆಲಿನ್ ಎತ್ತಿದ ಕೈ. ಆದ್ರೆ, 'ರೇಸ್-3' ಚಿತ್ರದಲ್ಲಿ ಆದ ಒಂದು ಎಡವಟ್ಟಿನ ಪರಿಣಾಮ ಅವರ ಕಣ್ಣಿಗೆ ಶಾಶ್ವತ ಗಾಯವಾಗಿದೆ.

'ರೇಸ್-3' ಸದ್ಯದಲ್ಲೇ ಬಿಡುಗಡೆ

ಜೂನ್ 15 ರಂದು ರಂಝಾನ್ ಹಬ್ಬದ ಪ್ರಯುಕ್ತ 'ರೇಸ್-3' ಬಿಡುಗಡೆ ಆಗಲಿದೆ. ಚಿತ್ರದಲ್ಲಿ ಸಲ್ಮಾನ್ ಖಾನ್, ಜಾಕ್ವೆಲಿನ್ ಫರ್ನಾಂಡಿಸ್, ಡೈಸಿ ಶಾ, ಅನಿಲ್ ಕಪೂರ್, ಬಾಬಿ ಡಿಯೋಲ್ ಸೇರಿದಂತೆ ದೊಡ್ಡ ತಾರಾಬಳಗವೇ ಇದೆ. ಚಿತ್ರಕ್ಕೆ ರೆಮೋ ಡಿಸೋಜಾ ಆಕ್ಷನ್ ಕಟ್ ಹೇಳಿದ್ದಾರೆ.