ಪ್ರಾಣಾಪಾಯದಿಂದ ಬೋನಿ ಕಪೂರ್ ಪಾರು

ಬಾಲಿವುಡ್ ನಿರ್ಮಾಪಕ, ಶ್ರೀದೇವಿ ಪತಿ ಬೋನಿ ಕಪೂರ್ ಪ್ರಯಾಣಿಸುತ್ತಿದ್ದ ಕಾರು ಭೀಕರ ಅಪಘಾತಕ್ಕೆ ಗುರಿಯಾಗಿದ್ದು ಅದೃಷ್ಟವಶಾತ್ ಅವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಬುಧವಾರ (ಮೇ 14) ರಾತ್ರಿ ಮುಂಬೈನಲ್ಲಿ ಈ ಅಪಘಾತ ಸಂಭವಿಸಿದೆ.

ಮುಂಬೈನ ಸತಾರಾ ಪ್ರದೇಶದಲ್ಲಿ ಬೋನಿ ಕಪೂರ್ ಪ್ರಯಾಣಿಸುತ್ತಿದ್ದ ಕಾರು ಟ್ರಾಕ್ಟರ್ ಒಂದಕ್ಕೆ ಮುಖಾಮುಖಿ ಡಿಕ್ಕಿ ಹೊಡೆದ ಪರಿಣಾಮ ಕಾರಿನ ಮುಂಭಾಗ ಸಂಪೂರ್ಣ ನುಜ್ಜುಗುಜ್ಜಾಗಿದೆ. ಬೋನಿ ಕಪೂರ್ ಸೇರಿದಂತೆ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.

ಅಪಘಾತವಾದ ಕೂಡಲೆ ಕಾರಿನ ಏರ್ ಬ್ಯಾಗ್ಸ್ ತೆರೆದುಕೊಂಡು ಅವರನ್ನು ದುರಂತದಿಂದ ಪಾರು ಮಾಡಿವೆ. ಏರ್ ಬ್ಯಾಗ್ಸ್ ಓಪನ್ ಆದ ಕಾರಣ ನಮಗೇನು ಗಂಭೀರವಾಗಿ ಗಾಯಗಳಾಗಲಿಲ್ಲ. ನಾವೆಲ್ಲಾ ಪ್ರಾಣಾಪಾಯದಿಂದ ಪಾರಾದೆವು ಎಂದಿದ್ದಾರೆ ಬೋನಿ ಕಪೂರ್. ತಮ್ಮ ನಿರ್ಮಾಣದ 'ತೇವರ್' ಚಿತ್ರದ ಶೂಟಿಂಗ್ ಸ್ಪಾಟ್ ನಿಂದ ಬೋನಿ ಕಪೂರ್ ಮನೆಗೆ ಹಿಂತಿರುಗುತ್ತಿದ್ದರು.