ಸಾರಾ-ಸುಶಾಂತ್ ಲವ್ ಬ್ರೇಕ್ ಅಪ್: ಆಸೆ ತೋರಿಸಿ, ಬಿಸಾಡಿ ಹೋಗುತ್ತಾರೆ ಸ್ಟಾರ್ ಮಕ್ಕಳು ಎಂದ ಕಂಗನಾ

ಸ್ಟಾರ್ ಮಕ್ಕಳು ಹೊರಗಿನಿಂದ ಬಂದವರಿಗೆ ಆಸೆ ತೋರಿಸಿ ಬಿಸಾಡುತ್ತಾರೆ

ಸುಶಾಂತ್ ಮತ್ತು ಸಾರಾ ಪ್ರೀತಿಯ ವಿಚಾರವನ್ನು ಬಹಿರಂಗ ಪಡಿಸುತ್ತಿದ್ದಂತೆ ನಟಿ ಕಂಗನಾ ರಣಾವತ್ ಸ್ಟಾರ್ ಮಕ್ಕಳ ವಿರುದ್ಧ ಕಿಡಿಕಾರಿದ್ದಾರೆ. ಸುಶಾಂತ್ ಸಾವಿನ ತನಿಖೆಯ ಪ್ರತಿಯೊಂದು ಬೆಳವಣಿಗೆಯನ್ನು ಗಮನಿಸುತ್ತಿರುವ ಕಂಗನಾ ಬಹಿರಂಗವಾಗಿ ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. ಸ್ಟಾರ್ ಮಕ್ಕಳು ಹೊರಗಿನಿಂದ ಬಂದವರಿಗೆ ಆಸೆ ತೋರಿಸಿ, ಪ್ರೀತಿಸಿ ನಂತರ ಯಾವುದೊ ಒತ್ತಡಕ್ಕೆ ಬಿಸಾಡಿ ಹೋಗುತ್ತಾರೆ ಎಂದು ಕಿಡಿ ಕಾರಿದ್ದಾರೆ.

ರಿಯಾ ಚಕ್ರವರ್ತಿ ರಣಹದ್ದು

ಸಾರಾ ಅಲಿ ಖಾನ್ ಪ್ರೀತಿಯ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಕಂಗನಾ, ರಿಯಾ ಚಕ್ರವರ್ತಿಯನ್ನು ರಣಹದ್ದು ಎಂದು ಕರೆದಿದ್ದಾರೆ. "ಸಾರಾ ಮತ್ತು ಸುಶಾಂತ್ ಸಂಬಂಧ ಎಲ್ಲಾ ಮೀಡಿಯಾದಲ್ಲಿ ಪ್ರಸಾರವಾಗಿದೆ. ಇಬ್ಬರು ಚಿತ್ರೀಕರಣಕ್ಕೆ ಹೋದಾಗ ಒಂದೇ ರೂಮ್ ಶೇರ್ ಮಾಡಿಕೊಂಡಿದ್ದರು ಎನ್ನುವುದು ಸ್ಪಷ್ಟವಾಗಿದೆ. ಯಾಕೆ ಈ ಫ್ಯಾನ್ಸಿ ನೆಪೋಟಿಸಂ ಮಕ್ಕಳು ಹೊರಗಿನಿಂದ ಬಂದವರಿಗೆ ಆಸೆಗಳನ್ನು ತೋರಿಸುತ್ತಾರೆ. ನಂತರ ಅವರನ್ನು ಸಾರ್ವಜನಿಕವಾಗಿ ಬಿಸಾಡುತ್ತಾರೆ. ಆ ನಂತರ ರಣಹದ್ದು ಜೊತೆ ಸುಶಾಂತ್ ಪ್ರೀತಿಯಲ್ಲಿ ಬಿದ್ದಿರುವುದರ ಬಗ್ಗೆ ಯಾವುದೆ ಅಚ್ಚರಿ ಇಲ್ಲ" ಎಂದು ಹೇಳಿದ್ದಾರೆ.

ಸುಶಾಂತ್ ಏನು ಮೂರ್ಖನಲ್ಲ

ಸಾರಾ ಅಲಿ ಖಾನ್ ನಿಂದ ದೂರ ಆದ ಬಳಿಕ ಸುಶಾಂತ್ ಮತ್ತಷ್ಟು ಕುಗ್ಗಿ ಹೋಗಿದ್ದರು. ಸಾರಾ ಜೊತೆಗಿನ ಬ್ರೇಕ್ ಅಪ್ ಸುಶಾಂತ್ ಗೆ ಆಳವಾದ ಪರಿಣಾಮ ಬೀರಿತ್ತು ಎಂದು ಹೇಳಲಾಗುತ್ತಿದೆ. ಮತ್ತೊಂದು ಟ್ವೀಟ್ ಮಾಡಿರುವ ಕಂಗನಾ "ಸಾರಾ, ಸುಶಾಂತ್ ನನ್ನು ಪ್ರೀತಿ ಮಾಡಿರುವುದು ನಿಜ ಅನಿಸುತ್ತೆ. ನಿಜವಾದ ಭಾವನೆ ಇಲ್ಲದೆ ಇರುವವರ ಜೊತೆ ಪ್ರೀತಿಯಲ್ಲಿ ಬೀಳಲು ಸುಶಾಂತ್ ಮೂರ್ಖನಲ್ಲ." ಎಂದಿದ್ದಾರೆ.

ಹೃತಿಕ್ ನನ್ನನ್ನು ಬಿಟ್ಟುಹೋದ ಕಾರಣ ರಹಸ್ಯವಾಗಿದೆ

ಸುಶಾಂತ್ ಮತ್ತು ಸಾರಾ ಪ್ರೀತಿ ಬಗ್ಗೆ ಪ್ರತಿಕ್ರಿಯೆ ನೀಡುತ್ತಾ, ಹೃತಿಕ್ ಜೊತೆಗಿನ ಪ್ರೀತಿ ವಿಚಾರವನ್ನು ಮತ್ತೆ ಉಲ್ಲೇಖಿಸಿದ್ದಾರೆ. "ಆ ಸಮಯದಲ್ಲಿ ಹೃತಿಕ್ ಜೊತೆ ನನ್ನ ಸಂಬಂಧ ಪ್ರಾಮಾಣಿಕವಾಗಿತ್ತು ಎನ್ನುವುದರಲ್ಲಿ ಯಾವುದೆ ಅನುಮಾನವಿಲ್ಲ. ಆದರೆ ಇದ್ದಕ್ಕಿಂದ್ದಂತೆ ನನ್ನನ್ನು ದ್ವೇಷಿಸಲು ಕಾರಣವೇನು ಎನ್ನುವುದು ರಹಸ್ಯವಾಗಿದೆ." ಎಂದು ಹೇಳಿದ್ದಾರೆ.