'ಪೊನ್ನಿಯಿಲ್ ಸೆಲ್ವನ್' 27 ದಿನಗಳ ಗಳಿಕೆ 13 ದಿನಕ್ಕೆ ಮೀರಿಸಿದ ಶಿವ: ಬಾಕ್ಸಾಫೀಸ್‌ನಲ್ಲಿ 'ಕಾಂತಾರ' ಹೊಸ ದಾಖಲೆ!

'ಪೊನ್ನಿಯಿಲ್ ಸೆಲ್ವನ್'ಗೆ ಶಿವನ ಟಕ್ಕರ್

'ಪೊನ್ನಿಯಿಲ್ ಸೆಲ್ವನ್' 27 ದಿನಗಳ ಗಳಿಕೆಯನ್ನು 13 ದಿನದಲ್ಲಿ 'ಕಾಂತಾರ' ಸಿನಿಮಾ ಮೀರಿಸಿದೆ. ಹೌದು ಭಾರತದಲ್ಲಿ ರಿಷಬ್ ಶೆಟ್ಟಿ ಚಿತ್ರದ 13 ದಿನಗಳ ಹಿಂದಿ ವರ್ಷನ್ ಕಲೆಕ್ಷನ್ 29 ಕೋಟಿ ರೂ. ದಾಟಿದೆ. ಆ ಮೂಲಕ ಬಾಕ್ಸಾಫೀಸ್‌ನಲ್ಲಿ 'ಪೊನ್ನಿಯಿಲ್ ಸೆಲ್ವನ್' ಹಿಂದಿ ವರ್ಷನ್ ಕಲೆಕ್ಷನ್ ಹಿಂದಿಕ್ಕಿ 'ಕಾಂತಾರ' ಸಿನಿಮಾ ಮುನ್ನುಗ್ಗುತ್ತಿದೆ. ಸೆಪ್ಟೆಂಬರ್ 30ಕ್ಕೆ ಹಿಂದಿಯಲ್ಲೂ ಡಬ್ ಆಗಿ ಮಣಿರತ್ನಂ ಸಿನಿಮಾ ರಿಲೀಸ್ ಆಗಿತ್ತು. ಆದರೆ 'ಕಾಂತಾರ' ಹಿಂದಿ ವರ್ಷನ್ ಅಕ್ಟೋಬರ್ 14ಕ್ಕೆ ತೆರೆಗಪ್ಪಳಿಸಿತ್ತು.

30 ಕೋಟಿ ಬಾಚಿದ ತೆಲುಗು ವರ್ಷನ್

ಅಕ್ಟೋಬರ್ 15ಕ್ಕೆ 'ಕಾಂತಾರ' ತೆಲುಗು ವರ್ಷನ್ ತೆರೆಗಪ್ಪಳಿಸಿತ್ತು. 12 ದಿನಕ್ಕೆ ಚಿತ್ರ 30 ಕೋಟಿ ರೂ. ಗ್ರಾಸ್ ಕಲೆಕ್ಷನ್ ಮಾಡಿದ್ದು, 18 ಕೋಟಿ ನೆಟ್ ಕಲೆಕ್ಷನ್ ಮಾಡಿದೆ. ದೀಪಾವಳಿ ಸಂಭ್ರಮದಲ್ಲಿ ಚಿತ್ರಕ್ಕೆ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿತ್ತು. ಇದೀಗ 'ಕಾಂತಾರ' ಟೂರ್ ಶುರುವಾಗುತ್ತಿದೆ. ಶನಿವಾರ ಚಿತ್ರರಂಗ ತಿರುಪತಿ, ವಿಜಯವಾಡ, ವೈಜಾಕ್‌ಗೆ ತೆರಳಿ ಪ್ರೇಕ್ಷಕರಿಗೆ ಧನ್ಯವಾದ ತಿಳಿಸಲು ಮುಂದಾಗಿದೆ.

ತಮಿಳು, ಮಲಯಾಳಂ ವರ್ಷನ್‌ ಹಿಟ್

'ಕಾಂತಾರ' ಮಲಯಾಳಂ ವರ್ಷನ್ ಅಕ್ಟೋಬರ್ 20ಕ್ಕೆ ರಿಲೀಸ್ ಆಗಿ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಇನ್ನು ಅದಕ್ಕಿಂತ ಮೊದಲೇ ರಿಲೀಸ್ ಆಗಿದ್ದ ತಮಿಳು ವರ್ಷನ್‌ ಕೂಡ ತಮಿಳುನಾಡು ಥಿಯೇಟರ್‌ಗಳಲ್ಲಿ ಸದ್ದು ಮಾಡ್ತಿದೆ. ಕೆಲವೆಡೆ ಥಿಯೇಟರ್‌ಗಳು ಹೌಸ್‌ಫುಲ್ ಆಗುತ್ತಿರುವುದು ವಿಶೇಷ.

200 ಕೋಟಿ ಕ್ಲಬ್‌ನತ್ತ 'ಕಾಂತಾರ'

ವಿಶ್ವದಾದ್ಯಂತ 'ಕಾಂತಾರ' ಸಿನಿಮಾ ಕಲೆಕ್ಷನ್ ಜೋರಾಗಿದೆ. ಈಗಾಗಲೇ ಸಿನಿಮಾ ಒಟ್ಟು 188 ಕೋಟಿ ರೂ. ಅಧಿಕ ಕಲೆಕ್ಷನ್ ಮಾಡಿರುವ ಅಂದಾಜಿದೆ. ಶೀಘ್ರದಲ್ಲೇ ಸಿನಿಮಾ 200 ಕೋಟಿ ಗಡಿ ದಾಟುವ ಸುಳಿವು ಸಿಗುತ್ತಿದೆ. ಮೀಡಿಯಂ ಬಜೆಟ್ ಸಿನಿಮಾವೊಂದು ಈ ಪಾಟಿ ಸದ್ದು ಮಾಡುವುದು ತಮಾಷೆಯ ಮಾತಲ್ಲ. ಎಲ್ಲಾ ವರ್ಗದ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ರಿಷಬ್ ಶೆಟ್ಟಿ ನಿರ್ದೇಶನದ ಸಿನಿಮಾ ಸಕ್ಸಸ್ ಕಂಡಿದೆ.