ಕಂಟೆಂಟ್ ಕಿಂಗ್.. ಪ್ರೇಕ್ಷಕರು ಕಿಂಗ್ ಮೇಕರ್ಸ್: 'ರಾಮ್‌ಸೇತು' - 'ಥ್ಯಾಂಕ್‌ಗಾಡ್' ಸ್ಕ್ರೀನ್ಸ್ ಕಿತ್ತುಕೊಂಡ 'ಕಾಂತಾರ'!

ಸ್ಕ್ರೀನ್ಸ್ ಕಿತ್ತುಕೊಂಡ 'ಕಾಂತಾರ'

ಅಕ್ಟೋಬರ್ 25ರಂದು ಅಕ್ಷಯ್‌ ಕುಮಾರ್ ನಟನೆಯ 'ರಾಮ್‌ಸೇತು' ಸಿನಿಮಾ ತೆರೆಗೆ ಬಂದಿತ್ತು. 'ರಾಮ್‌ಸೇತು' ಪ್ರಾಕೃತಿಕವೋ ಅಥವಾ ಮನುಷ್ಯ ನಿರ್ಮಿತವೋ ಎನ್ನುವ ವಿಚಾರದ ಸುತ್ತಾ ಈ ಸಿನಿಮಾ ನಿರ್ಮಾಣವಾಗಿದೆ. ಅಜಯ್ ದೇವಗನ್ ನಟನೆಯ 'ಥ್ಯಾಂಕ್‌ಗಾಡ್' ಪಕ್ಕಾ ಫ್ಯಾಮಿಲಿ ಎಂಟರ್‌ಟೈನರ್ ಸಿನಿಮಾ ಎನಿಸಿಕೊಂಡಿತ್ತು. ಎರಡು ಚಿತ್ರಗಳಿಗೆ ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ಸಿಕ್ಕಿತ್ತು. ಆದರೆ ಬಾಕ್ಸಾಫೀಸ್‌ನಲ್ಲಿ ಎರಡೂ ಸಿನಿಮಾಗಳು ಸದ್ದು ಮಾಡುವಲ್ಲಿ ವಿಫಲವಾಗಿದೆ. ಪರಿಣಾಮ ನಿಧಾನವಾಗಿ ಈ 2 ಸಿನಿಮಾಗಳ ಸ್ಕ್ರೀನ್‌ಗಳನ್ನು 'ಕಾಂತಾರ' ಆವರಿಸಿಕೊಳ್ಳುತ್ತಿದೆ.

₹43 ಕೋಟಿ ಬಾಚಿದ ಹಿಂದಿ ವರ್ಷನ್

16 ದಿನಕ್ಕೆ 'ಕಾಂತಾರ' ಹಿಂದಿ ವರ್ಷನ್ 43 ಕೋಟಿ ಕಲೆಕ್ಷನ್ ಮಾಡಿ ಮುನ್ನುತ್ತಿದೆ. ದಿನದಿಂದ ದಿನಕ್ಕೆ ಕಲೆಕ್ಷನ್ ಹೆಚ್ಚಾಗುತ್ತಿದೆ. ಮೌತ್‌ ಪಬ್ಲಿಸಿಟಿಯಿಂದ ಪ್ರೇಕ್ಷಕರು ದೊಡ್ಡಮಟ್ಟದಲ್ಲಿ ಕನ್ನಡ ಸಿನಿಮಾ ನೋಡಲು ಮುಂದಾಗಿದ್ದಾರೆ. ನಿನ್ನೆ (ಅಕ್ಟೋಬರ್ 30) 4.40 ಕೋಟಿ ರೂ. ಗಳಿಕೆ ಕಂಡಿದೆ. ಈ ಬಗ್ಗೆ ಬಾಲಿವುಡ್ ಟ್ರೇಡ್ ಎಕ್ಸ್‌ಪರ್ಟ್ ತರಣ್ ಆದರ್ಶ್ ಟ್ವೀಟ್ ಮಾಡಿ ಮಾಹಿತಿ ನೀಡಿದ್ದಾರೆ. ಕಂಟೆಂಟ್ ಕಿಂಗ್, ಪ್ರೇಕ್ಷಕರು ಕಿಂಗ್ ಮೇಕರ್ಸ್ ಅನ್ನುವುದು ಮತ್ತೊಮ್ಮೆ ಸಾಬೀತಾಗಿದೆ ಎಂದು ಬರೆದುಕೊಂಡಿದ್ದಾರೆ.

30 ದಿನ ಕಳೆದರೂ ಹೌಸ್‌ಫುಲ್

ರಾಜ್ಯದಲ್ಲೂ 'ಕಾಂತಾರ' ದರ್ಬಾರ್ ಮುಂದುವರೆದಿದೆ. ಸಿನಿಮಾ ರಿಲೀಸ್ ಆಗಿ ತಿಂಗಳು ಕಳೆದರೂ ಕ್ರೇಜ್ ಮಾತ್ರ ಕಮ್ಮಿ ಆಗಿಲ್ಲ. ಇವತ್ತೂ ಕೂಡ ಸಿನಿಮಾ ಶೋಗಳು ಫಾಸ್ಟ್‌ ಫಿಲ್ಲಿಂಗ್/ ಹೌಸ್‌ಫುಲ್ ಆಗುತ್ತಿದೆ. ಪುನೀತ್ ರಾಜ್‌ಕುಮಾರ್ ಕನಸಿನ 'ಗಂಧದಗುಡಿ' ಸಿನಿಮಾ ಬಂದರೂ 'ಕಾಂತಾರ' ದರ್ಬಾರ್ ಕಮ್ಮಿ ಆಗಿಲ್ಲ. ರಾಜ್ಯದಲ್ಲೀಗ ಇವೆರಡೇ ಸಿನಿಮಾಗಳು ಸದ್ದು ಮಾಡ್ತಿವೆ.

₹300 ಕೋಟಿ ಕ್ಲಬ್‌ನತ್ತ ದಾಪುಗಾಲು

ಈಗಾಗಲೇ ವಿಶ್ವದಾದ್ಯಂತ 'ಕಾಂತಾರ' 289 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿದೆ ಎನ್ನುವ ಅಂದಾಜಿದೆ. ವಿದೇಶಗಳಲ್ಲೂ ಸಿನಿಮಾ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಈವರೆಗೆ ಕನ್ನಡ ಸಿನಿಮಾಗಳು ರಿಲೀಸ್ ಆಗದ ದೇಶಗಳಲ್ಲಿ 'ಕಾಂತಾರ' ತೆರೆಗಪ್ಪಳಿಸುತ್ತಿದೆ. ಅಲ್ಲೂ ಕೂಡ ಸಿನಿಮಾ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿರುವುದು ವಿಶೇಷ. ಶೀಘ್ರದಲ್ಲೇ ಸಿನಿಮಾ 300 ಕೋಟಿ ಕ್ಲಬ್ ಸೇರುವ ಸುಳಿವು ಸಿಗುತ್ತಿದೆ.