ಬಾಲಿವುಡ್ ಬಳಿ ಸ್ವಂತ ಯೋಚನೆ ಇಲ್ಲ, ಕಾಪಿ ಮಾಡುವುದೇ ಕಾಯಕ: ಉಗಿದ ನಟ

ರೀಮೆಕ್ ಮಾಡುವುದರಲ್ಲಿ ನಿರತವಾಗಿದೆ ಬಾಲಿವುಡ್

ಮಾಧ್ಯಮವೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಮಾತನಾಡಿರುವ ನೀಲ್ ನಿತಿನ್ ಮುಖೇಶ್, ''ರಾಜಕೀಯ ಥ್ರಿಲ್ಲರ್‌ಗಳು, ಸೈಕೋ ಥ್ರಿಲ್ಲರ್‌ಗಳು, ಹಾರರ್ ಥ್ರಿಲ್ಲರ್ ಹೀಗೆ ಹಲವು ವಿಧಗಳಿವೆ. ಆದರೆ ಅವುಗಳ್ಯಾವುವನ್ನು ಬಾಲಿವುಡ್‌ನ ಮಂದಿ ಎಕ್ಸ್‌ಪ್ಲೋರ್ ಮಾಡಿಯೇ ಇಲ್ಲ. ಸಾಕಷ್ಟು ಒರಿಜಿನಲ್ ಐಡಿಯಾಗಳಿವೆ ಆದರೆ ಅದೆಲ್ಲವನ್ನೂ ಬಿಟ್ಟು ರೀಮೇಕ್ ಮಾಡಲು ಹೊರಡುತ್ತಾರೆ'' ಎಂದಿದ್ದಾರೆ.

ಎರಡೂ ಬಗೆಯ ಸಿನಿಮಾಗಳಿಗೆ ರೆಡಿ: ನೀಲ್ ನಿತಿನ್

''ಸಾಕಷ್ಟು ಒರಿಜಿನಲ್ ಐಡಿಯಾಗಳು ಇದ್ದರೂ ಸಹ ನಮ್ಮವರು ರೀಮೇಕ್ ಸಿನಿಮಾಗಳನ್ನೇ ನೆಚ್ಚಿಕೊಳ್ಳುತ್ತಿದ್ದಾರೆ. ಅವರಿಗೆ ಹೊಸ ಪ್ರಯೋಗ ಮಾಡುವುದು ಇಷ್ಟವಿಲ್ಲ. ಸೇಫ್ ಆಗಿ ಆಡಲು ಹೋಗಿ ಹಿಂದುಳಿಯುತ್ತಿದ್ದಾರೆ'' ಎಂದು ವಿಮರ್ಶಿಸಿದ ನೀಲ್ ನಿತಿನ್, ತಾವು ನಟಿಸಿರುವ ಸಿನಿಮಾ 'ಜೈಲ್‌' ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ. ಈ ರೀತಿಯ ಪ್ರಯೋಗಾತ್ಮಕ ಕಂಟೆಂಟ್‌ಗೆ ಒಡ್ಡಿಕೊಳ್ಳುವುದಕ್ಕೆ ರೆಡಿ ಜೊತೆಗೆ 'ಪ್ರೇಮ್ ರಥನ್ ಧನ್ ಪಾಯೋ' ರೀತಿಯ ಸಿನಿಮಾಗಳಲ್ಲಿ ನಟಿಸಲು ಸಹ ನಾನು ರೆಡಿ'' ಎಂದಿದ್ದಾರೆ.

ನೀಲ್‌ ನಿತಿನ್‌ಗೆ ಅವಕಾಶಗಳು ಕಡಿಮೆ ಆಗಿದೆ

ಬಾಲ ನಟನಾಗಿ, ಅಸಿಸ್ಟೆಂಡ್ ಡೈರೆಕ್ಟರ್‌ ಆಗಿ ಸಿನಿಮಾ ಜರ್ನಿ ಪ್ರಾರಂಭಿಸಿದ ನೀಲ್ ನಿತಿನ್, 2007 ರಲ್ಲಿ ನಾಯಕ ನಟನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದರು. ಹಲವಾರು ಸಿನಿಮಾಗಳಲ್ಲಿ ನಾಯಕ ನಟನಾಗಿ, ಪ್ರಧಾನ ಪೋಷಕ ನಟನಾಗಿ ನಟಿಸಿರುವ ನೀಲ್ ನಿತಿನ್‌ಗೆ ಇತ್ತೀಚಿನ ದಿನಗಳಲ್ಲಿ ಅವಕಾಶಗಳು ತುಸು ಕಡಿಮೆ ಆಗಿದೆ. 2019 ರಲ್ಲಿ ಬಿಡುಗಡೆ ಆಗಿದ್ದ 'ಬೈಪಾಸ್ ರೋಡ್' ಸಿನಿಮಾದ ಬಳಿಕ ನೀಲ್ ನಿತಿನ್‌ರ ಹೊಸ ಸಿನಿಮಾ ಬಂದೇ ಇಲ್ಲ. ಇದೀಗ 'ಫಿರ್ಕಿ' ಹೆಸರಿನ ಸಿನಿಮಾದಲ್ಲಿ ನಟಿಸಿದ್ದು ಸಿನಿಮಾ ಕೆಲವೇ ದಿನಗಳಲ್ಲಿ ಬಿಡುಗಡೆ ಆಗಲಿದೆ.

ಸಾಲು-ಸಾಲು ರೀಮೇಕ್ ಮಾಡುತ್ತಿದೆ ಬಾಲಿವುಡ್

ಬಾಲಿವುಡ್ ಹಲವಾರು ರೀಮೇಕ್ ಸಿನಿಮಾಗಳನ್ನು ಮಾಡುತ್ತಿದೆ. ದಕ್ಷಿಣದ ಸಾಲು-ಸಾಲು ಸಿನಿಮಾಗಳು ಹಿಂದಿಯಲ್ಲಿ ರೀಮೇಕ್‌ಗೊಳ್ಳುತ್ತಿವೆ. ಕನ್ನಡದ 'ಯೂ-ಟರ್ನ್' ಸೇರಿದಂತೆ, ತಮಿಳಿನ 'ಸೂರರೈ ಪೊಟ್ರು' 'ವಿಕ್ರಂ ವೇದ', 'ಅನ್ನಿಯನ್', 'ಖೈದಿ', ಮಲಯಾಳಂನ 'ಡ್ರೈವಿಂಗ್ ಲೈಸೆನ್ಸ್', 'ಅಯ್ಯಪ್ಪನುಂ ಕೋಶಿಯುಂ', 'ಫೊರೆನ್ಸಿಕ್' ತೆಲುಗಿನ 'ಅಲಾ ವೈಕುಂಟಪುರಂಲೋ', 'ಹಿಟ್', 'ದೃಶ್ಯಂ' ಹೀಗೆ ಒಟ್ಟು 32 ದಕ್ಷಿಣ ಭಾರತದ ಸಿನಿಮಾಗಳನ್ನು ಮುಂದಿನ ದಿನಗಳಲ್ಲಿ ಬಾಲಿವುಡ್ ರೀಮೇಕ್ ಮಾಡಲಿದೆ.