'ಲಾಲ್ ಸಿಂಗ್ ಚಡ್ಡ' ಸಿನಿಮಾದಿಂದ ವಿತರಕರಿಗೆ ನಷ್ಟವಾಗಿದೆ ಎಂಬುದು ಸುಳ್ಳು: ನಿರ್ಮಾಣ ಸಂಸ್ಥೆ

ನಾವೇ ವಿತರಣೆ ಮಾಡಿದ್ದೇವೆ: ವೈಯೋಕಾಮ್ 18

ಸಿನಿಮಾದಿಂದ ವಿತರಕರು ನಷ್ಟ ಹೋಗಿರುವ ಬಗ್ಗೆ ಹಾಗೂ ಆಮಿರ್ ಖಾನ್ ವಿರುದ್ಧ ಒತ್ತಡ ಹೇರುತ್ತಿರುವ ಬಗ್ಗೆ ಹರಿದಾಡುತ್ತಿರುವ ಸುದ್ದಿಗಳ ಬಗ್ಗೆ ಪ್ರತಿಕ್ರಿಯೆ ನೀಡಿರುವ 'ವೈಯೊಕಾಮ್ 18 ಸ್ಟುಡಿಯೋಸ್'ನ ಸಿಇಓ ಅಜಿತ್ ಅಂಧಾರೆ, ''ಈ ಸಿನಿಮಾಕ್ಕೆ ಹೊರಗಿನ ಯಾವುದೇ ವಿತರಕರು ಇಲ್ಲ. ಈ ಸಿನಿಮಾವನ್ನು ಭಾರತ ಹಾಗೂ ವಿದೇಶದಲ್ಲಿ ವೈಯೋಕಾಮ್ 18 ಸ್ಟುಡಿಯೋಸ್‌ನವರೇ ವಿತರಣೆ ಮಾಡಿದ್ದಾರೆ. ಹಾಗಾಗಿ ವಿತರಕರು ಹಣ ವಾಪಸ್ಸಾತಿಗೆ ಒತ್ತಾಯಿಸುತ್ತಿದ್ದಾರೆ ಎಂಬುದು ಸುಳ್ಳು'' ಎಂದಿದ್ದಾರೆ.

ಹೊರಗಿನ ವಿತರಕರಿಗೆ ಸಿನಿಮಾ ನೀಡುವುದಿಲ್ಲ

ಬಹುತೇಕ ದೊಡ್ಡ ಸ್ಟುಡಿಯೋಗಳು ಅದರದ್ದೇ ಆದ ವಿತರಣೆ ನೆಟ್‌ವರ್ಕ್ ಹೊಂದಿರುತ್ತವೆ. ಹೊರಗಿನ ವಿತರಕರಿಗೆ ಅದು ಸಿನಿಮಾ ನೀಡುವುದಿಲ್ಲ. ಕೊಟ್ಟರೂ ಬಹಳ ಕಡಿಮೆ ಸಂಖ್ಯೆಯ ಉಪ ವಿತರಕರಿಗೆ ಸಿನಿಮಾ ನೀಡುತ್ತಾರೆ. ಅದೂ ಪಟ್ಟಣ ಪ್ರದೇಶಗಳಲ್ಲಿ ಸಿನಿಮಾ ಬಿಡುಗಡೆ ಮಾಡಲು ಎಂದಿರುವ ಹಿಂದಿ ಸಿನಿಮಾಗಳ ಜನಪ್ರಿಯ ವಿತರಕರೊಬ್ಬರು, ನಾವು ಸ್ಟುಡಿಯೋಗಳ ಬಳಿ ವಿತರಣೆಗೆ ಕೇಳಿದರೂ ಅವರು ಬಹಳ ದುಬಾರಿ ಮೊತ್ತ ಹೇಳುತ್ತಾರೆ ಎಂದಿದ್ದಾರೆ. ಬಾಲಿವುಡ್‌ನ ಜನಪ್ರಿಯ ಪತ್ರಿಕೆಯೊಂದಕ್ಕೆ ಅವರು ಹೇಳಿಕೆ ನೀಡಿದ್ದಾರೆ.

ಯಾವುದೇ ಸಿನಿಮಾಕ್ಕೆ ಸಂಭಾವನೆ ಪಡೆದಿಲ್ಲ

ಮತ್ತೊಂದು ಮೂಲದ ಪ್ರಕಾರ, ಕಳೆದ ಹತ್ತು ವರ್ಷದಿಂದ ಆಮಿರ್ ಖಾನ್ ತಮ್ಮ ಯಾವುದೇ ಸಿನಿಮಾಕ್ಕೆ ಸಂಭಾವನೆ ಪಡೆದಿಲ್ಲ ಬದಲಿಗೆ ಲಾಭಾಂಶ ಮಾತ್ರವನ್ನೇ ಪಡೆದುಕೊಂಡಿದ್ದಾರೆ. ಒಂದೊಮ್ಮೆ ಸಿನಿಮಾ ನಷ್ಟವಾದರೂ ವಿತರಕರು, ನಿರ್ಮಾಪಕರು ಹೆಚ್ಚು ಭಾರವಾಗುವುದಿಲ್ಲ, ನಿರ್ಮಾಪಕರು, ವಿತರಕರಿಗೆ ಆಗುವ ನಷ್ಟದಲ್ಲಿ ಆಮಿರ್ ಖಾನ್ ಅವರದ್ದೂ ಪಾಲಿರುತ್ತದೆ. ಸಿನಿಮಾ ಗೆದ್ದರೆ ಆ ಸಿನಿಮಾದ ಲಾಭಾಂಶದಲ್ಲಿ ಪಾಲು ತೆಗೆದುಕೊಳ್ಳುತ್ತಾರೆ. ಹಾಗಾಗಿ ಸಿನಿಮಾ ವಿತರಕರು ಆಮಿರ್ ಖಾನ್‌ ಮೇಲೆ ಒತ್ತಡ ಹೇರುವುದಿಲ್ಲ ಎನ್ನಲಾಗಿದೆ.

ನಷ್ಟ ಆಗಿಲ್ಲ ಎಂದ ವೈಯೋಕಾಮ್ 18

ಇನ್ನು ವೈಯೋಕಾಮ್ 18 ಹೇಳಿರುವಂತೆ. ಆ ಸಂಸ್ಥೆಯು 'ಲಾಲ್ ಸಿಂಗ್ ಚಡ್ಡ' ಸಿನಿಮಾದಿಂದ ಯಾವುದೇ ನಷ್ಟ ಅನುಭವಿಸಿಲ್ಲವಂತೆ. ಸಿನಿಮಾ ಚೆನ್ನಾಗಿಯೇ ಪ್ರದರ್ಶನ ಕಾಣುತ್ತಿದೆ. ಸಿನಿಮಾ ಬಿಡುಗಡೆ ಆಗಿ ಕೇವಲ ನಾಲ್ಕು ದಿನವಷ್ಟೆ ಆಗಿದೆ. ಸಿನಿಮಾದ ಶೆಲ್ಫ್ ಲೈಫ್ ಇನ್ನೂ ಸಾಕಷ್ಟು ದಿನವಿದೆ. ಅಲ್ಲದೆ ಈಗಾಗಲೇ ಸಿನಿಮಾವು ಹಣ ತಂದುಕೊಡುತ್ತಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಹೆಚ್ಚಾಗಲಿದೆ. ಸಿನಿಮಾ ಇನ್ನೂ ಚಿತ್ರಮಂದಿರಗಳಲ್ಲಿರುವಾಗಿ ಸಿನಿಮಾ ಸೋತಿತು ಎನ್ನಲಾಗದು ಎಂದಿದ್ದಾರೆ.