ಟ್ರೋಲ್ ಮಾಡಿದವರು ಬೆರಗಾಗುವಂತಹ ಅಪರೂಪದ ದಾಖಲೆ ಬರೆದ 'ಆದಿಪುರುಷ್'

ಹಿಂದಿ ಟೀಸರ್ 10 ಕೋಟಿ ವೀವ್ಸ್

ಅಕ್ಟೋಬರ್ 2ರಂದು 5 ಭಾಷೆಗಳಲ್ಲಿ 'ಆದಿಪುರುಷ್' ಸಿನಿಮಾ ಟೀಸರ್ ಬಿಡುಗಡೆಯಾಗಿತ್ತು. ಸದ್ಯ ಹಿಂದಿ ಟೀಸರ್ ಯೂಟ್ಯೂಬ್‌ನಲ್ಲಿ 10 ಕೋಟಿ ವೀವ್ಸ್ ಸಾಧಿಸಿ ದಾಖಲೆ ಬರೆದಿದೆ. ಇದನ್ನು ನೋಡಿ ಮತ್ತೊಮ್ಮೆ ಪ್ರಭಾಸ್ ಫ್ಯಾನ್ಸ್ ಕಾಲರ್ ಎಗರಿಸಿದ್ದಾರೆ. ಅಷ್ಟೆಲ್ಲಾ ಟ್ರೋಲ್ ಮಾಡಿದರೂ ನಮ್ಮ ನೆಚ್ಚಿನ ನಟನ ಸಿನಿಮಾ ಟೀಸರ್ ಹೊಸ ದಾಖಲೆ ಬರೆದಿದೆ ಎಂದು ಸಂಭ್ರಮಿಸುತ್ತಿದ್ದಾರೆ.

ವೀವ್ಸ್ ಜೊತೆಗೆ ಲೈಕ್ಸ್‌ನಲ್ಲೂ ದಾಖಲೆ

'ಆದಿಪುರುಷ್' ಟೀಸರ್ 10 ಕೋಟಿ ವೀವ್ಸ್ ಜೊತೆಗೆ 17 ಲಕ್ಷಕ್ಕೂ ಅಧಿಕ ಲೈಕ್ಸ್ ಗಿಟ್ಟಿಸಿಕೊಂಡಿದೆ. ಈ ಹಿಂದೆ ರಜನಿಕಾಂತ್ ಹಾಗೂ ಅಕ್ಷಯ್ ಕುಮಾರ್ ನಟನೆಯ '2.0' ಟೀಸರ್ 7 ಕೋಟಿ, ರಣ್‌ಬೀರ್ ಕಪೂರ್ ನಟನೆಯ 'ಸಂಜು' 6 ಕೋಟಿ, ಪ್ರಭಾಸ್ ನಟನೆಯ ಮತ್ತೊಂದು ಸಿನಿಮಾ 'ಸಾಹೋ' ಟೀಸರ್ 6 ಕೋಟಿಗೂ ಅಧಿಕ ವೀವ್ಸ್ ಸಾಧಿಸಿದೆ. ಆದರೆ 'ಆದಿಪುರುಷ್' ಟೀಸರ್ ಕೇವಲ 44 ದಿನಗಳಲ್ಲಿ 10 ಕೋಟಿ ವೀವ್ಸ್ ಪಡೆದುಕೊಂಡಿರುವುದು ಎಲ್ಲರ ಹುಬ್ಬೇರಿಸಿದೆ.

ಭಾರೀ ಟ್ರೋಲ್ ಎದುರಿಸಿದ ಟೀಸರ್

'ಆದಿಪುರುಷ್' ಸಿನಿಮಾ ಘೋಷಣೆಯಾದ ದಿನದಿಂದಲೂ ಭಾರೀ ನಿರೀಕ್ಷೆ ಇತ್ತು. 300 ಕೋಟಿಗೂ ಅಧಿಕ ಬಜೆಟ್ ಸಿನಿಮಾ, ಶ್ರೀರಾಮನಾಗಿ ಪ್ರಭಾಸ್ ಎನ್ನುವುದನ್ನು ಕೇಳಿಯೇ ಅಭಿಮಾನಿಗಳು ಥ್ರಿಲ್ಲಾಗಿದ್ದರು. ಹಾಗಾಗಿ ಸಿನಿಮಾ ಅದ್ಭುತವಾಗಿರುತ್ತದೆ ಎಂದುಕೊಂಡಿದ್ದರು. ಆದರೆ ಟೀಸರ್ ಆ ಎಲ್ಲಾ ನಿರೀಕ್ಷೆಯನ್ನು ಹುಸಿ ಮಾಡಿತ್ತು. ಯಾವುದೋ ಕಾರ್ಟೂನ್ ಆನಿಮೇಷನ್ ಸಿನಿಮಾ ಟೀಸರ್ ರೀತಿ ಕಂಡಿತ್ತು. ಗ್ರಾಫಿಕ್ಸ್ ಬಗ್ಗೆ ಸಿನಿರಸಿಕರು ಬೇಸರ ವ್ಯಕ್ತಪಡಿಸಿದ್ದರು. ಇನ್ನು ರಾಮಾಯಣದ ಪಾತ್ರಗಳು, ವೇಷಭೂಷಣ ಎಲ್ಲದರ ಬಗ್ಗೆಯೂ ಟೀಕೆ ವ್ಯಕ್ತವಾಗಿತ್ತು. ಇದೇ ವಿಚಾರಕ್ಕೆ ಸಂಬಂಧಿಸಿ ಚಿತ್ರತಂಡದ ವಿರುದ್ಧ ದೂರು ಕೂಡ ದಾಖಲಾಗಿತ್ತು. ಟೀಸರ್ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಟ್ರೋಲ್ ಆಗಿತ್ತು.

'ಆದಿಪುರುಷ್' ರಿಲೀಸ್ ಡೇಟ್ ಮುಂದಕ್ಕೆ

ಸಂಕ್ರಾಂತಿ ಹಬ್ಬಕ್ಕೆ 'ಆದಿಪುರುಷ್' ಸಿನಿಮಾ ರಿಲೀಸ್ ಪ್ಲ್ಯಾನ್‌ ಮಾಡಿತ್ತು ಚಿತ್ರತಂಡ. ಆದರೆ ಟೀಸರ್ ಬಗ್ಗೆ ಟೀಕೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಎಲ್ಲವನ್ನು ಸರಿಪಡಿಸಿ ಸಿನಿಮಾ ರಿಲೀಸ್ ಮಾಡುವ ಪ್ರಯತ್ನಕ್ಕೆ ಚಿತ್ರತಂಡ ಮುಂದಾಗಿದೆ. ಮುಂದಿನ ಜೂನ್ 16ಕ್ಕೆ ಸಿನಿಮಾ ರಿಲೀಸ್ ಮಾಡುವುದಾಗಿ ಹೊಸ ರಿಲೀಸ್ ಡೇಟ್ ಘೋಷಣೆಯಾಗಿದೆ. ಒಂದಷ್ಟು ದೃಶ್ಯಗಳನ್ನು ರೀ ಶೂಟ್ ಮಾಡುವುದರ ಜೊತೆಗೆ ಸಂಪೂರ್ಣವಾಗಿ ಗ್ರಾಫಿಕ್ಸ್ ಬದಲಿಸುವ ಕೆಲಸ ನಡೀತಿದೆ.