ಮುಖಪುಟ

ಬಾಲಿವುಡ್

ಪ್ರಿಯಾಂಕಾ ಚೋಪ್ರಾ ಹಾಗೂ ಶಾಹಿದ್ ಕಪೂರ್ ನಟಿ ವಿದ್ಯಾ ಬಾಲನ್ ಅವರ ದಾರಿಯನ್ನು ಅನುಸರಿಸುತ್ತಿದ್ದಾರೆ ಎನ್ನಬಹುದು. ಈ ಜೋಡಿ ತಮ್ಮ ಬರಲಿರುವ 'ತೇರಿ ಮೇರಿ ಕಹಾನಿ' ಚಿತ್ರದ ಪ್ರಚಾರಕ್ಕೆ ಲೋಕಲ್ ಟ್ರೇನುಗಳಲ್ಲಿ ಸಂಚರಿಸುತ್ತಿದ್ದಾರೆ. ಇದೇ ರೀತಿಯಲ್ಲಿ ತಮ್ಮ 'ಕಹಾನಿ' ಚಿತ್ರದ ಪ್ರಚಾರವನ್ನು ವಿದ್ಯಾ ಬಾಲನ್ ಮಾಡಿದ್ದರು.

ಈ ಹಿಂದೆಯೇ ವಿದ್ಯಾ ಬಾಲನ್, ಇವರಿಬ್ಬರಿಗಿಂತಲೂ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿದ್ದರು. ಅವರು ಕೇವಲ ಲೋಕಲ್ ಟ್ರೇನುಗಳಲ್ಲಿ ಮಾತ್ರವಲ್ಲದೇ ಮುಂಬೈನ ಬಸ್ಸುಗಳಲ್ಲಿ ಕೂಡ ಓಡಾಡಿದ್ದರು. ಆದರೆ ಶಾಹಿದ್-ಪ್ರಿಯಾಂಕ ಕೇವಲ ಟ್ರೇನ್ ಮಾತ್ರ ಹತ್ತಿಳಿದಿದ್ದಾರೆ. ಬಸ್ ಹತ್ತಲು ಇನ್ನೂ ಮನಸ್ಸು ಮಾಡಿಲ್ಲ, ಮುಂದಕ್ಕೇನೋ!

ತೇರಿ ಮೇರಿ ಕಹಾನಿ ಚಿತ್ರ ಬಿಡುಗಡೆಗೆ ಸಿದ್ಧವಾಗಿದೆ. ಪ್ರಿಯಾಂಕ ಹಾಗೂ ಶಾಹಿದ್ ಇಬ್ಬರಿಗೂ ಈ ಚಿತ್ರ ತುಂಬಾ ಇಷ್ಟವಾಗಿದೆ. ಅಷ್ಟೇ ಅಲ್ಲ, ಈ ಚಿತ್ರದ ಯಶಸ್ಸು ಇಬ್ಬರ ವೃತ್ತಿಜೀವನಕ್ಕೂ ಹೊಸ ತಿರುವು ತರುವ ಸಾಧ್ಯತೆ ನಿಚ್ಚಳವಾಗಿರುವುದರಿಂದ ಇಬ್ಬರೂ ತಮ್ಮ ಶಕ್ತಿ ಮೀರಿ ಪ್ರಚಾರಕಾರ್ಯಕ್ಕೆ ಶ್ರಮಿಸುತ್ತಿದ್ದಾರೆ.

ಪ್ರಿಯಾಂಕ ಚೋಪ್ರಾ ಬಹಳಷ್ಟು ಬುದ್ಧಿವಂತೆ ಎನ್ನಲಾಗುತ್ತಿದೆ. ಯಾವುದೇ ಕಾರಣವಿಲ್ಲದೇ ಈ ಪ್ರಿಯಾಂಕಾ ಏನನ್ನೂ ಮಾಡುವುದಿಲ್ಲ. ಚಿತ್ರದ ಯಶಸ್ಸಿನ ಮೇಲೆಯೇ ಮುಂದಿನ ಚಿತ್ರಗಳ ಸಂಭಾವನೆ ಹೆಚ್ಚಳ ನಿರ್ಧಾರವಾಗುವುದರಿಂದ ಅವರಿಗೀಗ ಅರ್ಜೆಂಟ್ ಸಕ್ಸಸ್ ಬೇಕಾಗಿದೆ ಎಂಬುದು ಬಾಲಿವುಡ್ ಪಂಡಿತರ ಮಾತು.

ಪ್ರಚಾರ ಕಾರ್ಯದ ನಿಮಿತ್ತ ಪ್ರಿಯಾಂಕಾ, ಶಾಹಿದ್ ಹಾಗೂ ನಿರ್ದೇಶಕ ಕುನಾಲ್ ಕೊಹ್ಲಿ ಈ ಮೂವರೂ ಮುಂಬೈ ಲೋಕಲ್ ಟ್ರೇನುಗಳಲ್ಲಿ ಮರಿನ್ ಲೈನ್ಸ್ ಹಾಗೂ ಚರ್ಚ್ ಗೇಟ್ ಮಧ್ಯೆ ಸಂಚರಿಸಿದ್ದಾರೆ. ಚಿತ್ರದ ಬಿಡುಗಡೆ ಇದೇ ತಿಂಗಳು 22 ಕ್ಕೆ (ಜೂನ್ 22, 2012) ನಿಗದಿಯಾಗಿದೆ. ಚಿತ್ರದ ಬಗ್ಗೆ ಚಿತ್ರತಂಡ ಹಾಗೂ ಬಾಲಿವುಡ್ ಪ್ರೇಕ್ಷಕರಿಗೆ ಭಾರೀ ನಿರೀಕ್ಷೆಯಿದೆ. (ಏಜೆನ್ಸೀಸ್)