ರಾತ್ರೋರಾತ್ರಿ ಗಂಟುಮೂಟೆ ಕಟ್ಟಿಕೊಂಡು ಪರಾರಿಯಾದ ರಿಯಾ!

ಮಧ್ಯರಾತ್ರಿ ಮನೆ ಖಾಲಿ

ಸುಶಾಂತ್ ಸಾಯುವ ಕೆಲವು ದಿನಗಳ ಮುನ್ನ ಅವರ ಮನೆಯಿಂದ ಹೊರಬಂದಿದ್ದ ರಿಯಾ, ಮುಂಬೈನಲ್ಲಿ ತಮ್ಮ ಪೋಷಕರು ನೆಲೆಸಿರುವ ಮನೆ ಸೇರಿಕೊಂಡಿದ್ದರು. ಬಿಹಾರ ಪೊಲೀಸರು ಮುಂಬೈ ಬರುತ್ತಿರುವುದನ್ನು ತಿಳಿದಿದ್ದ ಅವರು ಪೋಷಕರು ಹಾಗೂ ಸಹೋದರನೊಂದಿಗೆ ಮಧ್ಯರಾತ್ರಿಯೇ ಮನೆ ತೊರೆದಿದ್ದಾರೆ.

ದೊಡ್ಡ ದೊಡ್ಡ ಸೂಟ್ ಕೇಸ್

ನೀಲಿ ಬಣ್ಣದ ಕಾರ್‌ನಲ್ಲಿ ರಿಯಾ ಹಾಗೂ ಕುಟುಂಬ ಮನೆಯಿಂದ ತೆರಳಿದೆ. ಹೋಗುವಾಗ ದೊಡ್ಡ ದೊಡ್ಡ ಸೂಟ್‌ ಕೇಸ್‌ಗಳನ್ನು ತಮ್ಮೊಂದಿಗೆ ಕೊಂಡೊಯ್ದಿದ್ದಾರೆ. ಬಹಳ ಕಾಲದಿಂದ ಸುಶಾಂತ್ ಈ ಅಪಾರ್ಟ್‌ಮೆಂಟ್‌ಗೆ ಭೇಟಿ ನೀಡಿರಲಿಲ್ಲ ಎಂದು ಅವರು ತಿಳಿಸಿದ್ದಾರೆ.

ಲುಕ್ ಔಟ್ ನೋಟಿಸ್ ಸಾಧ್ಯತೆ

ರಿಯಾ ಚಕ್ರವರ್ತಿ ಪತ್ತೆಯಾಗದೆ ಹೋದರೆ ಅವರ ವಿರುದ್ಧ ಬಿಹಾರ ಪೊಲೀಸರು ಲುಕ್ ಔಟ್ ನೋಟಿಸ್ ಹೊರಡಿಸುವ ಸಾಧ್ಯತೆ ಇದೆ. ರಿಯಾ ಅವರನ್ನು ಪತ್ತೆ ಮಾಡುವುದು ಬಹಳ ಕಷ್ಟಕರವಾಗಿದೆ. ಯಾವುದೇ ಮಾಹಿತಿ ಇಲ್ಲದೆ ಅವರು ತಲೆಮರೆಸಿಕೊಂಡಿದ್ದಾರೆ. ಅವರು ನಮ್ಮ ಪೊಲೀಸ್ ತಂಡದ ಸಂಪರ್ಕಕ್ಕೆ ಸಿಗುತ್ತಿಲ್ಲ ಎಂದು ಬಿಹಾರದ ಡಿಜಿಪಿ ಗುಪ್ತೇಶ್ವರ ಪಾಂಡೆ ತಿಳಿಸಿದ್ದಾರೆ.

ಇ.ಡಿ. ಪ್ರಕರಣ

ಸುಶಾಂತ್ ಸಿಂಗ್ ಅವರ ಬ್ಯಾಂಕ್ ಖಾತೆಗಳಲ್ಲಿದ್ದ ಹಣವನ್ನು ರಿಯಾ ಚಕ್ರವರ್ತಿ ಅಕ್ರಮವಾಗಿ ವರ್ಗಾವಣೆ ಮಾಡಿಕೊಂಡಿದ್ದಾರೆ ಎನ್ನಲಾಗಿದೆ. ಅಲ್ಲದೆ, ಅವರ ಕ್ರೆಡಿಟ್ ಕಾರ್ಡ್ ಬಳಸಿ ಬೇಕಾದಂತೆ ಹಣ ಬಳಸಿಕೊಂಡಿದ್ದಾರೆ. ಈ ಸಂಬಂಧ ಶುಕ್ರವಾರ ರಿಯಾ ವಿರುದ್ಧ ಜಾರಿ ನಿರ್ದೇಶನಾಲಯ ಪ್ರಕರಣ ದಾಖಲಿಸಿಕೊಂಡಿತ್ತು. ಈ ವಾರದಲ್ಲಿ ವಿಚಾರಣೆಗೆ ಹಾಜರಾಗುವಂತೆ ಅವರಿಗೆ ಇ.ಡಿ ಸಮನ್ಸ್ ಜಾರಿ ಮಾಡುವ ಸಾಧ್ಯತೆ ಇದೆ.

ಸುಶಾಂತ್ ವಿರುದ್ಧ ಮಾಟ ಮಂತ್ರ

ಸುಶಾಂತ್ ಅವರಿಗೆ ರಿಯಾ ಮಾಟ ಮಾಡಿಸಿದ್ದಾರೆ ಎಂದೂ ಕುಟುಂಬದವರು ಆರೋಪಿಸಿದ್ದಾರೆ. ಸುಶಾಂತ್ ತಮ್ಮ ವಾಸಸ್ಥಾನವನ್ನು ಬದಲಿಸಿದ್ದಾಗ ಆ ಮನೆಯಲ್ಲಿ ಯಾವುದೇ ಪೂಜಾ ಕಾರ್ಯ ನಡೆಸಿರಲಿಲ್ಲ. ಆದರೆ ಪೂಜೆ ಮಾಡುವ ಹೆಸರಿನಲ್ಲಿ ಸುಶಾಂತ್ ಖಾತೆಯಿಂದ ಎರಡು ತಿಂಗಳಿಂದ ಲಕ್ಷಗಟ್ಟಲೆ ಹಣವನ್ನು ಡ್ರಾ ಮಾಡಲಾಗಿದೆ. ಇದು ಅನೇಕ ಅನುಮಾನಗಳಿಗೆ ಕಾರಣವಾಗಿದೆ.