ಶಾರುಖ್ ಖಾನ್ ಕ್ರೇಜ್ ಶುರು, ವಿದೇಶದಲ್ಲಿ ದಾಖಲೆಯ ಅಡ್ವಾನ್ಸ್ ಬುಕಿಂಗ್!

ಗಂಟೆಗಳಲ್ಲಿ ಸಾವಿರಾರು ಟಿಕೆಟ್ ಬುಕ್

ಅಡ್ವಾನ್ಸ್ ಬುಕಿಂಗ್ ಓಪನ್ ಆದ ಗಂಟೆಯಲ್ಲಿಯೇ ಯುಎಇಯಲ್ಲಿ 'ಪಠಾಣ್' ಸಿನಿಮಾದ 3500 ಟಿಕೆಟ್‌ಗಳು ಮಾರಾಟವಾಗಿವೆ. ಆಸ್ಟ್ರೇಲಿಯಾನಲ್ಲಿ 3000 ಟಿಕೆಟ್‌ಗಳು ಮಾರಾಟವಾಗಿವೆ. ಜರ್ಮನಿಯಲ್ಲಿ 8500 ಟಿಕೆಟ್‌ಗಳು ಈಗಾಗಲೇ ಬುಕ್ ಆಗಿಬಿಟ್ಟಿವೆ. 2017 ರಲ್ಲಿ ಬಿಡುಗಡೆ ಆಗಿದ್ದ ಶಾರುಖ್ ಖಾನ್‌ರ 'ರಯೀಸ್' ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ನ ದುಪ್ಪಟ್ಟು ವೇಗದಲ್ಲಿ ಈ ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ನಡೆಯುತ್ತಿದೆ.

ವಿದೇಶದಲ್ಲಿ ಭಾರಿ ಕಲೆಕ್ಷನ್ ನಿರೀಕ್ಷೆ

'ಪಠಾಣ್' ಸಿನಿಮಾದ ವಿದೇಶಿ ಬಾಕ್ಸ್ ಆಫೀಸ್ ಕಲೆಕ್ಷನ್ ಸುಮಾರು 50 ಕೋಟಿ ದಾಟುವ ಸಾಧ್ಯತೆ ಇದೆ. ಸಿನಿಮಾದ ಬಗ್ಗೆ ಭಾರತದಲ್ಲಿಯೂ ಭಾರಿ ಬೇಡಿಕೆ ಇದ್ದು, ಈಗಾಗಲೇ ಶಾರುಖ್ ಖಾನ್‌ರ ಒಂದು ಪ್ಯಾನ್ಸ್ ಕ್ಲಬ್‌ನವರು ಸುಮಾರು 50,000 ಶಾರುಖ್ ಖಾನ್ ಅಭಿಮಾನಗಳಿಗೆ ದೇಶದಾದ್ಯಂತ ವಿಶೇಷ ಶೋ ಆಯೋಜನೆ ಮಾಡಿದೆ. ಭಾರತದಲ್ಲಿ 'ಪಠಾಣ್' ಸಿನಿಮಾದ ಕಲೆಕ್ಷನ್ ಕೆಲವೇ ದಿನಗಳಲ್ಲಿಯೇ ನೂರು ಕೋಟಿ ದಾಟುವ ಸಾಧ್ಯತೆಯೂ ಇದೆ.

ಸಿನಿಮಾದ ಸುತ್ತ ವಿವಾದ

ಭಾರತದಲ್ಲಿ 'ಪಠಾಣ್' ಸಿನಿಮಾದ ಸುತ್ತ ಕೆಲವು ವಿವಾದಗಳನ್ನು ಸುತ್ತಲಾಗಿದೆ. 'ಪಠಾಣ್' ಸಿನಿಮಾದ ಬೇಷರಮ್ ಹಾಡಿನಲ್ಲಿ ನಾಯಕಿ ದೀಪಿಕಾ ಪಡುಕೋಣೆ ಕೇಸರಿ ಬಣ್ಣದ ಬಿಕಿನಿ ಧರಿಸಿ ನರ್ತಿಸಿರುವುದಕ್ಕೆ ಕೆಲವು ಹಿಂದು ಪರ ಸಂಘಟನೆಗಳು ಆಕ್ಷೇಪ ವ್ಯಕ್ತಪಡಸಿದ್ದು, ಸಿನಿಮಾವನ್ನು ಬ್ಯಾನ್ ಮಾಡುವಂತೆ ಒತ್ತಾಯಿಸಿವೆ. ವಿವಾದಗಳ ನಡುವೆಯೂ 'ಪಠಾಣ್' ಸಿನಿಮಾ ದೊಡ್ಡ ಮಟ್ಟದ ಕಲೆಕ್ಷನ್ ಮಾಡುವ ಸಾಧ್ಯತೆ ಇದೆ.

ಸಿನಿಮಾ ಬಿಡುಗಡೆ ಯಾವಾಗ?

'ಪಠಾಣ್' ಸಿನಿಮಾದಲ್ಲಿ ಶಾರುಖ್ ಖಾನ್ ಜೊತೆಗೆ ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ ನಟಿಸಿದ್ದಾರೆ. ಸಿನಿಮಾವು ಸ್ಪೈ ಥ್ರಿಲ್ಲರ್ ಕತೆ ಹೊಂದಿದ್ದು, ಹಲವು ದೇಶಗಳಲ್ಲಿ ಸಿನಿಮಾದ ಚಿತ್ರೀಕರಣ ಮಾಡಲಾಗಿದೆ. ಸಿನಿಮಾವನ್ನು ಸಿದ್ಧಾರ್ಥ್ ಆನಂದ್ ನಿರ್ದೇಶನ ಮಾಡಿದ್ದು, ಯಶ್ ರಾಜ್ ಫಿಲಮ್ಸ್‌ ನಿರ್ಮಾಣ ಮಾಡಿದ್ದಾರೆ. ಸಿನಿಮಾವು ಜನವರಿ 25 ರಂದು ಬಿಡುಗಡೆ ಆಗಲಿದೆ.