90 ಕೋಟಿ ರೂ. ಸಾಲದ ಸುಳಿಯಲ್ಲಿ ಸಿಲುಕಿ ಬಂಗ್ಲೆ ಅಡ ಇಟ್ಟು ಆರ್ಥಿಕ ದಿವಾಳಿಯಾಗಿದ್ದ ಅಮಿತಾಬ್

ಸಾಲದ ಕೂಪಕ್ಕೆ ತಳ್ಳಿದ ಕನಸಿನ ಸಂಸ್ಥೆ

ಅದು 1996ರ ಸಮಯ ಅಮಿತಾಬ್ ಸಿನಿಮಾಗಳು ಸಕ್ಸಸ್ ಕಾಣುತ್ತಿದ್ದಂತೆ ನಟನೆಯಿಂದ ಮತ್ತೊಂದು ಹೆಜ್ಜೆ ಮುಂದಕ್ಕೆ ಹೋಗಿ ನಿರ್ಮಾಣ ಸಂಸ್ಥೆ ಪ್ರಾರಂಭ ಮಾಡುತ್ತಾರೆ. ಅಮಿತಾಬ್ ಬಚ್ಚನ್ ಕಾರ್ಪೊರೇಷನ್ ಲಿಮಿಟೆಡ್ ಅನ್ನು ಸ್ಥಾಪಿಸಿದರು. ಅಮಿತಾಬ್ ಅವರ ಈ ಕನಸಿನ ಯೋಜನೆ ಯಾವುದೇ ರೀತಿಯ ಆದಾಯ ತಂದುಕೊಟ್ಟಿಲ್ಲ. ಬದಲಿಗೆ ಈ ಸಂಸ್ಥೆ ಅಮಿತಾಬ್ ಅವರನ್ನು ಸಾಲದ ಕೂಪಕ್ಕೆ ತಳ್ಳಿತು.

90 ಕೋಟಿ ರೂ ಸಾಲ ಮಾಡಿ, ಮನೆ ಮಾರಲು ಮುಂದಾದರು

ಆಗ ಅಮಿತಾಬ್ ಬರೋಬ್ಬರಿ 90 ಕೋಟಿ ರೂ ಸಾಲ ಮಾಡುತ್ತಾರೆ. 2000ರಲ್ಲಿ ಬಾಲಿವುಡ್ ನ ಸೂಪರ್ ಸ್ಟಾರ್ ಅಮಿತಾಬ್ ದೊಡ್ಡ ಸಾಲಗಾರರಾಗಿ ಹೊರಹೊಮ್ಮುತ್ತಾರೆ. ಆರ್ಥಿಕ ಸಂಕಷ್ಟದಿಂದ ತಪ್ಪಿಸಿಕೊಳ್ಳಲು ತನ್ನ ಪ್ರೀತಿಯ ಪ್ರತೀಕ್ಷಾ ಬಂಗ್ಲೆಯನ್ನು ಮಾರಾಟ ಮಾಡಲು ಮುಂದಾಗಿದ್ದರು. ಆದರೆ ಕಾನೂನು ತೊಡಕುಗಳಿಂದ ಮನೆಯನ್ನು ಮಾರಾಟ ಮಾಡಲು ಸಹ ಸಾಧ್ಯವಾಗುವುದಿಲ್ಲ.

ಬಂಗ್ಲೆ ಅಡ ಇಟ್ಟಿದ್ದ ಬಿಗ್ ಬಿ

ಅಮಿತಾಬ್ ಬಂಗ್ಲೆಯನ್ನು ಅಡಮಾನ ಇಡುವ ನಿರ್ಧಾರಕ್ಕೆ ಬರುತ್ತಾರೆ. ಪ್ರೀತಿಯ ಬಂಗ್ಲೆಯನ್ನು ಸಹಾರಾ ಇಂಡಿಯಾ ಫೈನಾನ್ಸ್ ಗೆ ಅಡ ಇಡುತ್ತಾರೆ. ಈ ಬಗ್ಗೆ ಅಮಿತಾಬ್ 2010ರಲ್ಲಿ ತನ್ನ ಬ್ಲಾಗ್ ನಲ್ಲಿ ಬರೆದುಕೊಂಡಿದ್ದಾರೆ. ' ಹತ್ತು ವರ್ಷಗಳ ಹಿಂದೆ 2000ನೇ ಇಸವಿಯಲ್ಲಿ ಇಡೀ ಜಗತ್ತು ಹೊಸ ಶತಮಾನವನ್ನು ಆಚರಿಸುತ್ತಿದ್ದಾಗ, ನನ್ನ ವಿನಾಶಕಾರಿ ಅದೃಷ್ಟವನ್ನು ಆಚರಿಸುತ್ತಿದ್ದೆ. ಸಿನಿಮಾಗಳಿಲ್ಲ, ಹಣವಿಲ್ಲ, ಕಂಪನಿ ಇಲ್ಲ ಜೊತೆಗೆ ಸಾಕಷ್ಟು ಕೇಸ್ ಗಳು' ಎಂದು ಬರೆದುಕೊಂಡಿದ್ದರು.

ಕರಾಳದಿನಗಳ ಬಗ್ಗೆ ಅಮಿತಾಬ್ ಹೇಳಿದ್ದೇನು?

ಕರಾಳ ದಿನಗಳ ಬಗ್ಗೆ ಅಮಿತಾಬ್ ಸಂದರ್ಶನದಲ್ಲಿ ಮಾತನಾಡಿ, 90 ಕೋಟಿ ಸಾಲ ತಲೆಮೇಲಿತ್ತು. 55 ಕಾನೂನು ಪ್ರಕರಣಗಳು ಇದ್ದವು. ಸಾಲ ಕೊಟ್ಟವರು ಪ್ರತಿದಿನ ಮನೆಯ ಬಾಗಿಲು ಬಡಿಯುತ್ತಿದ್ದರು. ಅದು ತುಂಬಾ ಮುಜುಗರವಾಗುವಂತ ಸಂಗತಿಯಾಗಿತ್ತು' ಎಂದು ಹೇಳಿದ್ದಾರೆ.

Recommended Video

Yash Next Movie : ರಾಕಿಂಗ್ ಸ್ಟಾರ್ ಯಶ್ ಮುಂದಿನ ಸಿನಿಮಾ ಯಾವುದು? | Filmibeat Kannada

ಅಮಿತಾಬ್ ಗೆ ಮರುಜೀವ ನೀಡಿದ 'ಕೌನ್ ಬನೇಗಾ ಕರೋಡ್ ಪತಿ' ಶೋ

ಬಳಿಕ ಅಮಿತಾಬ್ ಅವರ ಆರ್ಥಿಕ ಸ್ಥಿತಿ ಸುಧಾರಿಸಲು ಕಾರಣವಾಗಿದ್ದು, ಕೌನ್ ಬನೇಗ ಕರೋಡ್ ಪತಿ ಶೋ. ಈ ಶೋನಿಂದ ಅಮಿತಾಬ್ ಗೇಮ್ ಚೇಂಜರ್ ಆಗಿ ಹೊರಹೊಮ್ಮಿದರು. ಕರೋಡ್ ಪತಿಶೋನಿಂದ ಅಮಿತಾಬ್ ಮತ್ತೆ ಕರೋಡ್ ಪತಿಯಾಗಿ ಹೊರಹೊಮ್ಮಿದರು. ಅದೆ ಸಮಯದಲ್ಲಿ ಅಮಿತಾಬ್ ಸಿನಿಮಾ ಕೂಡ ದೊಡ್ಡ ಮಟ್ಟದಲ್ಲಿ ಹಿಟ್ ಆಯಿತು. ಕರಾಳ ದಿನಗಳನ್ನು ದಾಟಿ ಬಿಗ್ ಬಿ ಮತ್ತೆ ಆರ್ಥಿಕವಾಗಿ ಸದೃಢರಾದರು.