ಜೋಯಾ ಅಫ್ರೋಜ್‌ಗೆ 'ಮಿಸ್ ಇಂಡಿಯಾ ಇಂಟರ್ನ್ಯಾಷನಲ್ 2021' ಕಿರೀಟ

ದೇಶದ ಹಲವು ಮೂಲೆಗಳಿಂದ ಬಂದಿದ್ದ ಸುಂದರಿಯರು

ಆಗಸ್ಟ್ 21ರಂದು ಗುರುಗಾಂವ್‌ನಲ್ಲಿ ನಡೆದ ಸ್ಪರ್ಧೆಯಲ್ಲಿ ಅರ್ಚನಾ ರವಿ, ಐಶ್ವರ್ಯಾ ದೀಕ್ಷಿತ್, ನೈನಾ ವಿಜಯ್ ಶರ್ಮಾ, ತಾನ್ಯಾ ಸಿನ್ಹಾ, ಸೇಜಲ್ ರೆನಾಕೆ, ಹಿಮಾನಿ ಗಾಯಕ್‌ವಾಡ್, ಮೇಘಾ ಶೆಟ್ಟಿ, ಮೇಘಾ ಜುಲ್ಕಾ, ದೀಕ್ಷಾ ನಾರಂಗ್, ಶಿವಾಣಿ ಟಕ್, ಸಚ್ಚಿ ಗುರುವಾ, ಅಸ್ಮಿತಾ ಚಕ್ರವರ್ತಿ, ತನು ಶ್ರೀ, ಶ್ವೇತಾ ಶಿಂಧೆ, ತಮಲ್‌ಪಾಕ್ಲು, ಸುಶಾಂಗ್ ಶೆರ್ಫಾ, ದಿಶಾ ಶಾಮ್ವಾನಿ, ಇಶಾ ವೈದ್ಯ, ಅನು ಭಾತಿ, ಆರುಷಿ ಸಿಂಗ್, ದಿವಿಜಾ ಗಂಭೀರ್, ಶಾಲಿನಿ ರಾಣಾ, ಅನಿಶಾ ಶರ್ಮಾತೆ ಇನ್ನೂ ಹಲವು ಮಾಡೆಲ್‌ಗಳು, ಯುವತಿಯರು ದೇಶದ ವಿವಿಧ ಭಾಗಗಳಿಂದ ಭಾಗವಹಿಸಿದ್ದರು.

ಮೂರನೇ ವರ್ಷಕ್ಕೆ ನಟನೆ ಆರಂಭಿಸಿದ್ದ ಜೋಯಾ

ವಿನ್ನರ್ ಜೋಯಾ ಅಫ್ರೋಜ್ ತಮ್ಮ ಮೂರನೇ ವರ್ಷ ವಯಸ್ಸಿನಲ್ಲಿಯೇ ನಟನೆ ಆರಂಭಿಸಿದವರು! ಮಗುವಾಗಿದ್ದಾಗಲೇ ರಸ್ನಾ ಜಾಹೀರಾತಿನಲ್ಲಿ ಕಾಣಿಸಿಕೊಂಡ ಜೋಯಾ ಆ ನಂತರ 'ಹಮ್‌ ಸಾಥ್ ಸಾಥ್ ಹೈ', 'ಮನ್', 'ಕುಚ್‌ ನಾ ಕಹೊ', ಇನ್ನೂ ಹಲವು ಸಿನಿಮಾಗಳಲ್ಲಿ ಬಾಲನಟಿಯಾಗಿ ನಟಿಸಿದ್ದಾರೆ. ಇದೇ ಸಮಯದಲ್ಲಿ ಹಲವು ಪ್ರತಿಷ್ಠಿತ ಬ್ರ್ಯಾಂಡ್‌ಗಳ ಜಾಹೀರಾತಿನಲ್ಲಿಯೂ ಕಾಣಿಸಿಕೊಂಡಿದ್ದಾರೆ.

ಹದಿನೇಳನೇ ವಯಸ್ಸಿಗೆ ನಾಯಕಿಯಾದ ಜೋಯಾ

ಹದಿನೇಳು ವಯಸ್ಸಿನಲ್ಲಿ ನಾಯಕಿಯಾಗಿ ಪಂಜಾಬಿ ಸಿನಿಮಾದಲ್ಲಿ ನಟಿಸಿದ ಜೋಯಾ ಬಾಲಿವುಡ್‌ಗೆ ನಾಯಕಿಯಾಗಿ ಪಾದಾರ್ಪಣೆ ಮಾಡಿದ್ದು 2014ರಲ್ಲಿ ಬಿಡುಗಡೆ ಆದ 'ಎಕ್ಸ್‌ ಪೋಸ್' ಸಿನಿಮಾದ ಮೂಲಕ. ಅದರ ಬಳಿಕ ಒಂದು ತಮಿಳು ಸಿನಿಮಾದಲ್ಲಿ ನಟಿಸಿದರಾದರೂ ಆ ಸಿನಿಮಾ ಬಿಡುಗಡೆ ಆಗಲಿಲ್ಲ. ಆ ನಂತರ ಹಿಂದಿ ಸಿನಿಮಾಗಳಲ್ಲಿ ಬ್ಯುಸಿಯಾದ ಈ ನಟಿ ತಮಿಳಿನ 'ಪಾಂಬನ್' ಹೆಸರಿನ ಸಿನಿಮಾದಲ್ಲಿ ನಟಿಸಿದರು. ಆದರೆ ಈವರೆಗೆ ದೊಡ್ಡ ಬ್ಯಾನರ್‌ನ ಸಿನಿಮಾಗಳ ಅವಕಾಶ ಜೋಯಾಗೆ ಸಿಕ್ಕಿಲ್ಲ. ಇದೀಗ 'ಮಿಸ್ ಇಂಡಿಯಾ' ಕಿರೀಟ ತೊಟ್ಟ ಬಳಿಕ ಅವಕಾಶಗಳು ಸಿಗುವ ನಿರೀಕ್ಷೆ ಇದೆ.

ಫೆಮಿನಾ ಮಿಸ್ ಇಂಡಿಯಾಗೆ ಹೆಚ್ಚಿನ ಮಾನ್ಯತೆ ಇದೆ

ಫೆಮಿನಾ ಮಿಸ್ ಇಂಡಿಯಾ ಸ್ಪರ್ಧೆಗೆ ಭಾರತದಲ್ಲಿ ಹೆಚ್ಚು ಮಾನ್ಯತೆ ಇದೆ. ಈ ಸ್ಪರ್ಧೆಯಲ್ಲಿ ವಿಜೇತರಾದರು ಮಿಸ್ ವರ್ಲ್ಡ್ ಸ್ಪರ್ಧೆಗೆ ಭಾಗವಹಿಸಲು ಅರ್ಹತೆ ಪಡೆಯುತ್ತಾರೆ. ಮಿಸ್ ವರ್ಲ್ಡ್ ಮಾತ್ರವೇ ಅಲ್ಲದೆ ನಾಲ್ಕು ಪ್ರತಿಷ್ಠಿತ ಅಂತರಾಷ್ಟ್ರೀಯ ಸೌಂದರ್ಯ ಸ್ಪರ್ಧೆಯಲ್ಲಿ ಭಾಗವಹಿಸಲು ಅಧಿಕೃತ ಅರ್ಹತೆ ಪಡೆಯುತ್ತಾರೆ. ಜೋಯಾ ಈಗ ಗೆದ್ದಿರುವುದು ಗ್ಲ್ಯಾಮಾನಂದ್ ಸೂಪರ್‌ಮಾಡೆಲ್ ವತಿಯಿಂದ ಆಯೋಜಿಸಲಾಗಿದ್ದ ಸೌಂದರ್ಯ ಸ್ಪರ್ಧೆಯಲ್ಲಿ. 2013 ರಲ್ಲಿ ಫೆಮಿನಾ ಸೌಂದರ್ಯ ಸ್ಪರ್ಧೆಯಲ್ಲಿ ಭಾಗವಹಿಸಿ ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದರು ಈ ನಟಿ.