ಕಷ್ಟದಲ್ಲೇ ಬದುಕಿ, ಕಷ್ಟದಲ್ಲೇ ಹೋದ ಮೋಹನ್ ಜುನೇಜ ಬದುಕಿನ ಕತೆ

ಗಣೇಶ್ ಕಾಸರಗೋಡು ಹೀಗೆ ಬರೆದುಕೊಂಡಿದ್ದಾರೆ

ಪತ್ರಕರ್ತ ಗಣೇಶ್ ಕಾಸರಗೋಡು ತಮ್ಮ ಫೇಸ್‌ಬುಕ್‌ ಪೇಜ್‌ನಲ್ಲಿ ಬರೆದುಕೊಂಡಿರುವಂತೆ, ''ಆಗ ತಾನೇ ಹೃದಯಕ್ಕೆ ಸಂಬಂಧಿಸಿದ ಪುಟ್ಟದೊಂದು ಸರ್ಜರಿ ಮಾಡಿಸಿಕೊಂಡು ಬಂದಿದ್ದರು ಮೋಹನ್ ಜುನೇಜಾ. ಮತ್ತೆ ಗಾಣಕ್ಕೆ ಹೆಗಲು ಕೊಡಬೇಕು! ಕ್ಯಾಮೆರಾ ಮುಂದೆ ನಿಲ್ಲದಿದ್ದರೆ ಹೊಟ್ಟೆ ಪಾಡಿನ ಗತಿಯೇನು? ಹಾಗೆಂದೇ ಸಿನಿಮಾವೊಂದರ ಚಿತ್ರೀಕರಣಕ್ಕೆಂದು ಕಂಠೀರವಾ ಸ್ಟುಡಿಯೋಕ್ಕೆ ಬಂದಿದ್ದರು ಮೋಹನ್. ನನ್ನನ್ನು ಕಂಡ ತಕ್ಷಣ ಹತ್ತಿರ ಬಂದವರೇ ತಮ್ಮ ಬದುಕಿನ ಗೋಳನ್ನು ಹೇಳತೊಡಗಿದರು : 'ಸರ್, ನೀವು ನನ್ನಂಥಾ ನತದೃಷ್ಟ ಕಲಾವಿದರನ್ನು ಅದೆಷ್ಟು ಮಂದಿಯನ್ನು ನೋಡಿದ್ದೀರೋ ಗೊತ್ತಿಲ್ಲ? ಅದೆಷ್ಟು ಗೋಳಿನ ಕಥೆಯನ್ನು ಬರೆದಿದ್ದೀರೋ? ಆ ಕಥೆಗಳ ಸರಣಿಯಲ್ಲಿ ನನ್ನನ್ನೂ ಸೇರಿಸಿಕೊಂಡು ಬಿಡಿ ಸಾರ್! ಕಲೆಯನ್ನೇ ನಂಬಿ ಬಂದವನು ನಾನು. ಲೆಕ್ಕಕ್ಕುಂಟು ಆಟಕ್ಕಿಲ್ಲ ಎನ್ನುವಂಥ ದುಃಸ್ಥಿತಿ ನನ್ನದು. ಲೆಕ್ಕ ಹಾಕಿದರೆ ನೂರಾರು ಸಿನಿಮಾಗಳಲ್ಲಿ ನಟಿಸಿದ್ದೇನೆ. ಆದ್ರೆ ಜೇಬು ಬರಿದು. ಮೊನ್ನೆ ಸರ್ಜರಿ ಮಾಡಿಸಿಕೊಂಡೆ. ಆಸ್ಪತ್ರೆಯಿಂದ ಹೊರ ಬರುವಾಗ ಬಿಲ್ ಕಟ್ಟದಿದ್ರೆ ಬಿಡ್ತಾರಾ? ಹಾಗೆಯೇ ಆಯ್ತು. ಸಾವಿರಾರು ರೂಪಾಯಿಗಳ ಬಿಲ್ಲು. ಕಟ್ಟೋದು ಹೇಗೆ? ಕೈಲಿ ಬಿಡಿಗಾಸಿಲ್ಲ, ಅದು ಹೇಗೆ ಹೊಂದಿಸಿಕೊಂಡೆನೋ ಗೊತ್ತಿಲ್ಲ. ಅವರಿವರು ಸಹಾಯ ಮಾಡಿದ್ರು. ದೇವರು ದೊಡ್ಡವನು. ಕೈ ಬಿಡಲಿಲ್ಲ. ನಾನು ಗೆಳೆಯರನ್ನು ಸಂಪಾದಿಸಿದ್ದೇನೆಯೇ ಹೊರತು ಹಣ ಸಂಪಾದಿಸಲಿಲ್ಲ. ಕೊಡಬೇಕಾದ ಹಣವನ್ನು ನಿರ್ಮಾಪಕರು ಕೊಟ್ಟರೂ ಸಾಕಿತ್ತು, ಬಡ ಜೀವ ಬದುಕಿ ಬಿಡಬಹುದಿತ್ತು! ಆದ್ರೆ ಯಾರು ಕೊಡ್ತಾರೆ ಹೇಳಿ...?'' ಎಂದಿದ್ದರಂತೆ ಮೋಹನ್.

ಚಿತ್ರಕತೆ ಬರಹಗಾರ, ತಾಂತ್ರಿಕ ವಿಭಾಗದಲ್ಲಿಯೂ ಕೆಲಸ

ಮೋಹನ್ ಜುನೇಜ ಸಿನಿಮಾ, ಕಿರುತೆರೆಗೆ ಬರುವ ಮುನ್ನ ರಂಗಭೂಮಿಯಲ್ಲಿ ಕೆಲಸ ಮಾಡಿದ್ದವರು. ಸಿನಿಮಾಗಳಲ್ಲಿಯೂ ಬಹಳ ಕಾಲದಿಂದ ತೆರೆಯ ಹಿಂದೆ ತಾಂತ್ರಿಕ ವಿಭಾಗದಲ್ಲಿ ಕೆಲಸ ಮಾಡಿದ್ದರು ಮೋಹನ್. ಟೈಗರ್ ಪ್ರಭಾಕರ್, ಸರಿಗಮ ವಿಜಿ ಕಾಲದಿಂದಲೂ ತಾಂತ್ರಿಕ ವಿಭಾಗ, ಚಿತ್ರಕತೆ, ಸಂಭಾಷಣೆ ಇತರೆ ಬರವಣಿಗೆ ವಿಭಾಗದಲ್ಲಿಯೂ ತಮ್ಮನ್ನು ತೊಡಗಿಸಿಕೊಂಡಿದ್ದರು ಮೋಹನ್.

ಒಳ್ಳೆಯ ವ್ಯಕ್ತಿಯೆಂದು ಹೆಸರು ಪಡೆದಿದ್ದರು ಮೋಹನ್

ಮೋಹನ್ ಸ್ವಭಾತಃ ಬಹಳ ಸೌಮ್ಯ, ಒಳ್ಳೆಯ ವ್ಯಕ್ತಿಯೆಂದು ಚಿತ್ರರಂಗದಲ್ಲಿ ಹೆಸರು ಮಾಡಿದ್ದವರು. ಹಾಗಾಗಿಯೇ ಸಣ್ಣ ಪಾತ್ರಕ್ಕಾದರೂ ಸರಿ ಅವರನ್ನು ಕರೆದು ಅವಕಾಶ ನೀಡುತ್ತಿದ್ದ ಪರಿಪಾಟ ಇತ್ತು. ಅವರ ಒಳ್ಳೆಯತನದಿಂದಲೇ ಇಷ್ಟು ವರ್ಷಗಳ ಕಾಲ ಒಂದಲ್ಲ ಒಂದು ಸಿನಿಮಾದಲ್ಲಿ ಸಣ್ಣ-ಪುಟ್ಟ ಪಾತ್ರಗಳಲ್ಲಿ ನಟಿಸುತ್ತಲೇ ಬಂದರು. ಅನಾರೋಗ್ಯದ ನಡುವೆಯೂ ನಟನೆಯನ್ನು ಬಿಡಲಿಲ್ಲ. ನಟನೆ ಬಿಟ್ಟರೆ ಬದುಕು ಇನ್ನಷ್ಟು ದುಸ್ತರವಾಗುವ ಭಯ ಮೋಹನ್ ಜುನೇಜಗೆ ಇತ್ತು. ಪರರ ಬಗ್ಗೆ ಕಾಳಜಿ ಹೊಂದಿದ್ದ ಮೋಹನ್ ನೇತ್ರದಾನ ಸಹ ಮಾಡಿದ್ದರು.

ನಟರ್ಯಾರು ಬರಲಿಲ್ಲ: ತಬಲಾ ನಾಣಿ

ಇಂದು ಮೋಹನ್ ಪಾರ್ಥಿವ ಶರೀರ ವೀಕ್ಷಿಸಲು ಹೋಗಿದ್ದ ನಟ ತಬಲಾ ನಾಣಿ ಹೇಳಿದ ಮಾತುಗಳು, ಚಿತ್ರರಂಗದಲ್ಲಿ ಸಣ್ಣ ಕಲಾವಿದರನ್ನು ಹೇಗೆ ನಡೆಸಿಕೊಳ್ಳಲಾಗುತ್ತದೆ ಎಂಬುದಕ್ಕೆ ಉದಾಹರಣೆಯಾಗಿತ್ತು, ಮಾಧ್ಯಮಗಳೊಟ್ಟಿಗೆ ಮಾತನಾಡಿದ ತಬಲಾ ನಾಣಿ, ''ಮೋಹನ್ ತೀರಿಕೊಂಡಿದ್ದಾರೆ ಎಂದು ಗೊತ್ತಾದರೂ ಯಾವ ನಟರೂ ನೋಡಲು ಬಂದಿಲ್ಲ. ನಂತರ ನಾನು ಕೆಲವರಿಗೆ ಕರೆ ಮಾಡಿ ಮನವಿ ಮಾಡಿದಾಗ ಹಣ ಕಳಿಸಿದ್ದಾರೆ'' ಎಂದರು.

ಜುನೇಜ ಹೆಸರು ಅಂಟಿಕೊಂಡಿದ್ದು ಹೇಗೆ?

ಮೋಹನ್ ಆಗಿದ್ದವರಿಗೆ ಈ ಜುನೇಜ ಹೆಸರು ಅಂಟಿಕೊಂಡಿದ್ದು ಸಹ ಒಂದು ಸ್ವಾರಸ್ಯಕರ ಕತೆ. ಮೋಹನ್ ಚಿತ್ರರಂಗಕ್ಕೆ ಬಂದಾಗ ಇನ್ನೂ ಕೆಲವು ಮೋಹನ್‌ಗಳು ಚಿತ್ರರಂಗದಲ್ಲಿದ್ದರು. ಹಾಗಾಗಿ ಹೆಸರು ಬದಲಾಯಿಸುವಂತೆ ಸಲಹೆ ನೀಡಲಾಗಿತ್ತು. ಆದರೆ ಅದು ಮೋಹನ್‌ಗೆ ಇಷ್ಟವಿರಲಿಲ್ಲ. ಆಗ ಕೆಎಸ್‌ಎಲ್‌ ಸ್ವಾಮಿ ಅವರು ಮೋಹನ್‌ರಿಗೆ ಮೋಹನ್ ಜುನೇನ ಎಂದು ನಾಮಕರಣ ಮಾಡಿದರು. ಮೋಹನ್ ನಟಿಸಿದ್ದ ನಾಟಕವೊಂದರಲ್ಲಿ ಅವರ ಪಾತ್ರದ ಹೆಸರು ಜುನೇನ ಎಂದಿತ್ತು. ನಂತರ ಮೋಹನ್ 'ಜಂಭೂ ಸವಾರಿ' ಹೆಸರಿನ ಸಿನಿಮಾದಲ್ಲಿ ನಟಿಸಿದ ಬಳಿಕ ಅವರ ಹೆಸರು ಮೋಹನ್ ಜುನೇಜ ಎಂದಾಯಿತು.

ಖುಷಿಯಿಂದ ಅವರನ್ನು ಕಳಿಸಿಕೊಡಬೇಕಿದೆ

ಹಲವು ದಶಕಗಳಿಂದ ತಮ್ಮ ಕೈಲಾದ ಮಟ್ಟಿಗೆ ಕನ್ನಡ ಸಿನಿಮಾ ಪ್ರೇಕ್ಷಕರನ್ನು ರಂಜಿಸಿದ್ದ ಮೋಹನ್ ಇನ್ನಿಲ್ಲವಾಗಿದ್ದಾರೆ. 'ಜೋಗಿ' ಸಿನಿಮಾದಲ್ಲಿ ಅವರೇ ಹೇಳಿರುವಂತೆ ತೀರಿಕೊಂಡವರನ್ನು ಕಳಿಸಿಕೊಡುವಾಗ ಖುಷಿಯಾಗಿ, ಹಾಡುತ್ತಾ, ಕುಣಿಯುತ್ತಾ ಕಳಿಸಿಕೊಡಬೇಕು. ಹಾಗೆಯೇ ಮೋಹನ್‌ರನ್ನು ಖುಷಿಯಿಂದ ಕಳಿಸಿಕೊಡಬೇಕಾಗಿದೆ.