'ಲೈಗರ್' ಸೋಲಿನ ಬಳಿಕ ಪುರಿ ಜಗನ್ನಾಥ್ ನಿರ್ದೇಶನ ಮಾಡೋದ್ಯಾರಿಗೆ? ಟಾಲಿವುಡ್ 3 ಸ್ಟಾರ್‌ಗಳು ಯಾರು?

ಪುರಿ ಜಗನ್ನಾಥ್ ಮುಂದಿನ ಸಿನಿಮಾ ಯಾರಿಗೆ?

ಹೀನಾಯ ಸೋಲಿನ ಬಳಿಕ ಪುರಿ ಜಗನ್ನಾಥ್ ಗೆಲುವಿಗಾಗಿ ಪಣ ತೊಟ್ಟಿದ್ದಾರೆ. ಅದಕ್ಕಾಗಿಯೇ ಮೂವರು ಹೀರೊಗಳ ಮೇಲೆ ಕಣ್ಣಿಟ್ಟಿದ್ದಾರೆ ಅನ್ನೋ ಮಾತು ಕೇಳಿ ಬರುತ್ತಿದೆ. ಟಾಲಿವುಡ್‌ನಲ್ಲಿ ಹರಿದಾಡುತ್ತಿರುವ ಸುದ್ದಿಯ ಪ್ರಕಾರ, ಪುರಿ ಜಗನ್ನಾಥ್ ತಮ್ಮ ಮುಂದಿನ ಸಿನಿಮಾಗೆ ಟಾಲಿವುಡ್ ಲೆಜೆಂಡ್ ಬಾಲಕೃಷ್ಣ ಅಥವಾ ಮೆಗಾ ಪವರ್‌ಸ್ಟಾರ್ ರಾಮ್‌ ಚರಣ್‌ಗೆ ಅಪ್ರೋಚ್ ಮಾಡಲಿದ್ದಾರೆ. ಈ ಇಬ್ಬರು ನಟರಲ್ಲಿ ಒಬ್ಬರು ಪುರಿ ಸಿನಿಮಾ ಒಪ್ಪಿಕೊಳ್ಳಬಹುದು ಎಂದೂ ಸುದ್ದಿ ಹಬ್ಬಿದೆ. ಆದರೆ, ಅಧಿಕೃತವಾಗಿ ಯಾವುದೂ ಹೊರಬಿದ್ದಿಲ್ಲ.

ಯುವ ನಟನ ಮೇಲೂ ಪುರಿ ಕಣ್ಣು

ಟಾಲಿವುಡ್‌ನಲ್ಲಿ ಹಿಟ್ ಸಿನಿಮಾಗಳನ್ನು ನೀಡುತ್ತಿರುವ ಯುವ ನಟನ ಮೇಲೂ ಪುರಿ ಜಗನ್ನಾಥ್ ಕಣ್ಣಿಟ್ಟಿದ್ದಾರೆ ಅನ್ನೋ ಮಾತು ಕೇಳಿ ಬರುತ್ತಿದೆ. ಆ ನಟ ಮತ್ಯಾರೂ ಅಲ್ಲ ವಿಶ್ವಕ್ ಸೇನ್. ಈ ಯುವ ನಟ ಟಾಲಿವುಡ್‌ನಲ್ಲಿ ವಿಭಿನ್ನ ಸಿನಿಮಾಗಳನ್ನು ನೀಡುವ ನಟ. ಈ ನಟನಿಗೂ ಮಾಸ್ ಡೈರೆಕ್ಟರ್ ಅಗತ್ಯವಿದೆ. ಹಾಗಾಗಿ ವಿಶ್ವಕ್ ಸೇನ್ ಕೂಡ ಈ ಸಿನಿಮಾವನ್ನು ಒಪ್ಪಿಕೊಳ್ಳಬಹುದು ಎಂದು ಅಂದಾಜಿಸಲಾಗುತ್ತಿದೆ.

ಪುರಿಗೆ ಭರವಸೆ ಕೊಟ್ಟ ಚಿರಂಜೀವಿ!

ಪುರಿ ಜಗನ್ನಾಥ್ ಹಾಗೂ ಚಿರಂಜೀವಿ ಇಬ್ಬರೂ ಈ ಹಿಂದೆನೇ ಒಂದು ಸಿನಿಮಾ ಮಾಡಬೇಕಿತ್ತು. ಅದುವೇ 'ಆಟೋ ಜಾನಿ'. ಆದರೆ, ಕಾರಣಾಂತರಗಳಿಂದ ಆ ಸಿನಿಮಾ ಸೆಟ್ಟೇರಲಿಲ್ಲ. ಇತ್ತೀಚೆಗೆ 'ಗಾಡ್‌ ಫಾದರ್' ಸಿನಿಮಾದ ಪ್ರಚಾರದ ವೇಳೆ ಪುರಿ ಜಗನ್ನಾಥ್‌ಗೆ ಮೆಗಾಸ್ಟಾರ್ ಚಿರಂಜೀವಿ ಮತ್ತೆ ಆ ಸಿನಿಮಾ ಬಗ್ಗೆ ಕೇಳಿದ್ದರು. " ಆಟೋ ಜಾನಿ ಸಿನಿಮಾವನ್ನು ಅಲ್ಲಿಗೆ ಕೈ ಬಿಟ್ಟಿದ್ದೇನೆ. ಅದಕ್ಕಿಂತ ಇನ್ನೂ ಅದ್ಭುತವಾದ ಕಥೆ ಮೇಲೆ ಕೆಲಸ ಮಾಡುತ್ತಿದ್ದೇನೆ." ಎಂದು ಪುರಿ ಜಗನ್ನಾಥ್ ಹೇಳಿದ್ದರು. ಆಗ ಚಿರಂಜೀವಿ ಒಟ್ಟಿಗೆ ಸಿನಿಮಾ ಮಾಡುವ ಭರವಸೆ ನೀಡಿದ್ದರು.

'ಒಟ್ಟಿಗೆ ಸಿನಿಮಾ ಮಾಡೋಣ'

ಪುರಿ ಜಗನ್ನಾಥ್ ಜೊತೆ ಮಾತಾಡುವಾಗ ಮೆಗಾ ಸ್ಟಾರ್ ಚಿರಂಜೀವಿ ಭರವಸೆಯನ್ನು ನೀಡಿದ್ದಾರೆ. " ಯಾವಾಗ ಬೇಕಿದ್ದರೂ ಒಟ್ಟಿಗೆ ಕೆಲಸ ಮಾಡೋಣ. ನಿಮಗೆ ಯಾವಾಗಲೂ ಸ್ವಾಗತ. ಬೇರೆಯೊಂದು ಕಥೆಯೊಂದಿಗೆ ಬನ್ನಿ ಚರ್ಚೆ ಮಾಡೋಣ" ಅಂತ ಚಿರಂಜೀವಿ ನಿರ್ದೇಶಕ ಪುರಿ ಜಗನ್ನಾಥ್‌ಗೆ ಭರವಸೆ ನೀಡಿದ್ದಾರೆ. ಸದ್ಯದಲ್ಲೇ ಪುರಿ ಜಗನ್ನಾಥ್ ಮತ್ತೆ ಹೊಸ ಸಿನಿಮಾಗೆ ಕೈ ಹಾಕುವ ಎಲ್ಲಾ ಸಾಧ್ಯತೆಗಳೂ ಇವೆ.