'ಬಾಹುಬಲಿ' ಪೋಸ್ಟರ್ ರಿಲೀಸ್, ಕದ್ದಿದ್ದು ಎಲ್ಲಿಂದ?

ಎಸ್ ಎಸ್ ರಾಜಮೌಳಿ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಅತ್ಯದ್ಭುತ ಚಿತ್ರ ಎಂದೇ ಬಿಂಬಿತವಾಗಿರುವ 'ಬಾಹುಬಲಿ' ಬಿಡುಗಡೆ ದಿನಾಂಕ ಹತ್ತಿರವಾಗುತ್ತಿದೆ. ಈ ಚಿತ್ರದ ಪ್ರಮುಖ ಪಾತ್ರಗಳ ಬಗ್ಗೆ ಟ್ವಿಟ್ಟರ್ ನಲ್ಲಿ ರಾಜಮೌಳಿ ಒಂದೊಂದಾಗಿ ಬಹಿರಂಗಪಡಿಸುತ್ತಿದ್ದಾರೆ.

ಮೇ.1ರ ಕಾರ್ಮಿಕರ ದಿನದಂದು ಚಿತ್ರದ ಪೋಸ್ಟರ್ ಬಿಡುಗಡೆ ಮಾಡಲಾಗಿದೆ. ಈ ಪೋಸ್ಟರನ್ನು ನೋಡಿ ಅಭಿಮಾನಿಗಳು ಥ್ರಿಲ್ ಆಗಿದ್ದರು. ಆದರೆ ಅವರ ಸಂಭ್ರಮ ಬಹಳ ಕಾಲ ಉಳಿಯಲಿಲ್ಲ. ಏಕೆಂದರೆ ಈ ಪೋಸ್ಟರ್ ಯಾವ ಚಿತ್ರದ 'ಸ್ಫೂರ್ತಿ' ಎಂಬುದು ಗೊತ್ತಾಗಿ ಭ್ರಮನಿರಸನವಾಗಿದೆ. [ದಂಗುಬಡಿಸುವ ರಾಜಮೌಳಿ 'ಬಾಹುಬಲಿ' ಚಿತ್ರದ ಸೆಟ್ಸ್]

'ಬಾಹುಬಲಿ' ಚಿತ್ರಕ್ಕೆ ಕನ್ನಡಿ ಹಿಡಿದಂತಿರುವ ಈ ಪೋಸ್ಟರ್ ನೋಡಿದರೆ ಕಥೆ ಇದರ ಸುತ್ತ ಸುತ್ತುತ್ತದೆ ಎಂಬ ಸುಳಿವನ್ನೂ ರಾಜಮೌಳಿ ನೀಡಿದ್ದಾರೆ. ಅಂದರೆ 'ಸೈಮನ್ ಬಿರ್ಚ್' ಚಿತ್ರದ ಕಥೆಯನ್ನು ಹೋಲುತ್ತದೆಯೇ ಎಂಬ ಅನುಮಾನವನ್ನೂ ಬಾಹುಬಲಿ ಚಿತ್ರ ಮೂಡಿಸಿದೆ.

ರಾಜಮೌಳಿ ಚಿತ್ರಗಳು ಈ ರೀತಿ ವಿವಾದಗೊಳಗಾಗಿದ್ದು ಇದೇ ಮೊದಲಲ್ಲ. ಈ ಹಿಂದೆ 'ಈಗ' ಚಿತ್ರಕ್ಕೂ ವಿವಾದ ಅಂಟಿಕೊಂಡಿತ್ತು. ಹಾಲಿವುಡ್ ಕಿರುಚಿತ್ರ 'ಕಾಕ್ರೋಚ್' ಚಿತ್ರವನ್ನೇ ಕದ್ದು 'ಈಗ' ಮಾಡಿದ್ದಾರೆ ಎಂಬ ಮಾತುಗಳು ಕೇಳಿಬಂದಿದ್ದವು.

ಈ ಬಗ್ಗೆ ರಾಜಮೌಳಿ ಸ್ಪಷ್ಟೀಕರಣ ಕೊಟ್ಟಿದ್ದರು. ತಾವು ಹಾಲಿವುಡ್ ಜಿರಲೆ(ಳೆ) ಕದ್ದು ನೊಣ ಮಾಡಿಲ್ಲ ಎಂದು ಹೇಳಿದ್ದರು. ಅಲ್ಲಿಗೆ ವಿವಾದ ಬಗೆಹರಿದಿತ್ತು. ಈಗ ಬಾಹುಬಲಿ ಚಿತ್ರಕ್ಕೂ ಅದೇ ರೀತಿಯ ಸಮಸ್ಯೆ ಎದುರಾಗಿದೆ.