'ಸಲಾರ್' ಚಿತ್ರಕ್ಕೆ ನಾಯಕಿ ಆಗ್ತಾರಾ ಬಾಲಿವುಡ್‌ನ ಆಕ್ಷನ್ ಕ್ವೀನ್?

ಕತ್ರಿನಾ ಕೈಫ್ ಜೊತೆ ಮಾತುಕತೆ!

ಸಲಾರ್ ಚಿತ್ರದಲ್ಲಿ ಪ್ರಭಾಸ್‌ಗೆ ಜೋಡಿಯಾಗಿ ನಟಿಸಲು ಬಾಲಿವುಡ್ ಆಕ್ಷನ್ ಕ್ವೀನ್ ಕತ್ರಿನಾ ಕೈಫ್ ಗೆ ಆಫರ್ ಮಾಡಲಾಗಿದೆಯಂತೆ. ಈ ಕುರಿತು ಕತ್ರಿನಾ ಜೊತೆ ಒಂದು ಸುತ್ತಿನ ಮಾತುಕತೆ ಸಹ ಮುಗಿದಿದ್ದು, ಇನ್ನು ಒಪ್ಪಿಗೆ ನೀಡಿಲ್ಲವಂತೆ. ಆದರೆ, ಸಲಾರ್ ಚಿತ್ರದ ಕಥೆ ಕೇಳಿ ಥ್ರಿಲ್ ಆಗಿದ್ದಾರೆ ಎಂದು ವರದಿಯಾಗಿದೆ.

2005ರಲ್ಲಿ ಕೊನೆ ತೆಲುಗು ಸಿನಿಮಾ

ಒಂದು ವೇಳೆ ಕತ್ರಿನಾ ಕೈಫ್ ಸಲಾರ್ ಚಿತ್ರವನ್ನು ಒಪ್ಪಿಕೊಂಡರೆ ಪ್ರಭಾಸ್ ಅಭಿಮಾನಿಗಳು ಖುಷ್ ಆಗಲಿದ್ದಾರೆ. ಹಾಗೆಯೇ ಹದಿನೈದು ವರ್ಷದ ಬಳಿಕ ಟಾಲಿವುಡ್‌ಗೆ ಕಂಬ್ಯಾಕ್ ಸಹ ಮಾಡಲಿದ್ದಾರೆ. 2004ರಲ್ಲಿ ಮಹೇಶ್ವರಿ ಚಿತ್ರದಲ್ಲಿ ಮೊದಲ ಸಲ ನಟಿಸಿದ್ದ ಕತ್ರಿನಾ, 2005ರಲ್ಲಿ ಬಾಲಕೃಷ್ಣ ಜೊತೆ 'ಅಲ್ಲುರಿ ಪಿಡುಗ' ಸಿನಿಮಾದಲ್ಲಿ ಕೊನೆಯದಾಗಿ ಕಾಣಿಸಿಕೊಂಡಿದ್ದರು.

ದಿಶಾ ಪಟಾನಿ ಹೆಸರು ಕೇಳಿ ಬರ್ತಿದೆ?

ಸಲಾರ್ ಚಿತ್ರದಲ್ಲಿ ಇಬ್ಬರು ನಾಯಕಿಯರು ಎನ್ನಲಾಗಿದೆ. ಈಗಾಗಲೇ ಒಂದು ಪಾತ್ರಕ್ಕೆ ಬಾಲಿವುಡ್ ನಟಿ ದಿಶಾ ಪಟಾನಿ ಹೆಸರು ಬಲವಾಗಿ ಕೇಳಿಬರುತ್ತಿದೆ. ಆದರೆ ದಿಶಾ ಅವರ ಆಗಮನದ ಬಗ್ಗೆಯೂ ಚಿತ್ರತಂಡ ಅಧಿಕೃತವಾಗಿ ಘೋಷಿಸಿಲ್ಲ. ಹಾಗಾಗಿ, ಹೀರೋಯಿನ್ ಆಯ್ಕೆ ಕುತೂಹಲವಾಗಿಯೇ ಉಳಿದುಕೊಂಡಿದೆ.

ಸಲಾರ್ ಚಿತ್ರದಲ್ಲಿ ಕೆಜಿಎಫ್ ತಂತ್ರಜ್ಞರು

ಪ್ರಭಾಸ್ ನಾಯಕ ಎನ್ನುವುದು ಬಿಟ್ಟರೆ ಉಳಿದ ಯಾವ ಕಲಾವಿದರು ಸಲಾರ್ ಪ್ರಾಜೆಕ್ಟ್‌ನಲ್ಲಿ ಫಿಕ್ಸ್ ಆಗಿಲ್ಲ. ಆದರೆ, ಕೆಜಿಎಫ್ ನಿರ್ದೇಶಿಸಿದ್ದ ಪ್ರಶಾಂತ್ ನೀಲ್, ಈ ಚಿತ್ರದಲ್ಲೂ ತಮ್ಮ ನೆಚ್ಚಿನ ತಂತ್ರಜ್ಞರನ್ನು ಮುಂದುವರಿಸಿದ್ದಾರೆ. ಭುವನ್ ಗೌಡ ಛಾಯಾಗ್ರಹಣ, ರವಿ ಬಸ್ರೂರು ಸಂಗೀತ ಸಲಾರ್ ಚಿತ್ರದಲ್ಲಿಯೂ ಇರಲಿದೆ.