ಒಂದಾಗುತ್ತಿದ್ದಾರೆ ಟಾಲಿವುಡ್-ಬಾಲಿವುಡ್ ಸೂಪರ್ ಸ್ಟಾರ್ಸ್: ಪ್ರಭಾಸ್ ಜೊತೆ ಹೃತಿಕ್ ರೋಷನ್!

ಒಂದಾಗಲಿದ್ದಾರೆ ಹೃತಿಕ್ ರೋಷನ್-ಪ್ರಭಾಸ್

'ವಾರ್', 'ಪಠಾಣ್', 'ಬ್ಯಾಂಗ್ ಬ್ಯಾಂಗ್', 'ಬಚ್ನಾ ಏ ಹಸೀನೋ', 'ಅಂಜಾನಾ ಅಂಜಾನಿ', 'ಸಲಾಂ ನಮಸ್ತೆ', 'ತಾ ರಾ ರಂ ಪಂ' ಇನ್ನಿತರೆ ಸಿನಿಮಾಗಳನ್ನು ನಿರ್ದೇಶಿಸಿರುವ ಸಿದ್ಧಾರ್ಥ್ ಆನಂದ್ ಭರ್ಜರಿ ಆಕ್ಷನ್ ಸಿನಿಮಾ ಒಂದಕ್ಕಾಗಿ ಕತೆಯೊಂದನ್ನು ತಯಾರು ಮಾಡಿಟ್ಟುಕೊಂಡಿದ್ದು ಬಾಲಿವುಡ್ ಸ್ಟಾರ್ ನಟ ಹೃತಿಕ್ ರೋಷನ್ ಹಾಗೂ ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ಅವರನ್ನು ಒಟ್ಟಿಗೆ ತೆರೆ ಮೇಲೆ ತರಲು ಸಕಲ ಸಜ್ಜಾಗಿದ್ದಾರೆ.

ದಕ್ಷಿಣದ ನಿರ್ಮಾಣ ಸಂಸ್ಥೆಯಿಂದ ನಿರ್ಮಾಣ

ವಿಶೇಷವೆಂದರೆ ಈ ಮೆಗಾ ಪ್ರಾಜೆಕ್ಟ್ ಅನ್ನು ದಕ್ಷಿಣದ ಜನಪ್ರಿಯ ಸಿನಿಮಾ ನಿರ್ಮಾಣ ಸಂಸ್ಥೆ ಮೈತ್ರಿ ಮೂವಿ ಮೇಕರ್ಸ್ ನಿರ್ಮಾಣ ಮಾಡುತ್ತಿದ್ದು, ಟಾಕ್ ಶೋ ಒಂದರಲ್ಲಿ ತಾವು ಶಾರುಖ್ ಖಾನ್‌ರ ನಿರ್ದೇಶಕರೊಟ್ಟಿಗೆ ಭರ್ಜರಿ ಆಕ್ಷನ್ ಹಿಂದಿ ಸಿನಿಮಾ ಒಂದಕ್ಕಾಗಿ ಒಪ್ಪಂದ ಮಾಡಿಕೊಂಡಿದ್ದೀವಿ ಎಂದು ಹೇಳಿದ್ದಾರೆ. ಇದೇ ಸಿನಿಮಾದಲ್ಲಿ ನಟ ಪ್ರಭಾಸ್ ಸಹ ಇರಲಿದ್ದಾರೆ ಎಂಬ ಸುದ್ದಿ ಜೋರಾಗಿಯೇ ಹರಿದಾಡುತ್ತಿದೆ.

ಆಕ್ಷನ್ ಸಿನಿಮಾಗಳ ನಿರ್ದೇಶಕ ಸಿದ್ಧಾರ್ಥ್ ಆನಂದ್

ಭಾರಿ ಬಜೆಟ್ ಆಕ್ಷನ್ ಸಿನಿಮಾಗಳನ್ನು ನಿರ್ದೇಶನ ಮಾಡುವಲ್ಲಿ ಸಿದ್ಧಾರ್ಥ್ ಎತ್ತಿದ ಕೈ. ಈಗಾಗಲೇ ಹೃತಿಕ್ ರೋಷನ್ ನಟನೆಯ 'ಬ್ಯಾಂಗ್-ಬ್ಯಾಂಗ್', ಹೃತಿಕ್-ಟೈಗರ್ ಶ್ರಾಫ್ ನಟನೆಯ 'ವಾರ್' ಸಿನಿಮಾಗಳನ್ನು ಸಿದ್ಧಾರ್ಥ್ ನಿರ್ದೇಶಿಸಿದ್ದಾರೆ. ಇದೀಗ ಹೃತಿಕ್‌ ಗಾಗಿಯೇ 'ಫೈಟರ್' ಹೆಸರಿನ ಸಿನಿಮಾ ನಿರ್ದೇಶನ ಮಾಡುತ್ತಿದ್ದಾರೆ. ಆ ಸಿನಿಮಾದ ಬಳಿಕ ಪ್ರಭಾಸ್-ಹೃತಿಕ್‌ರ ಹೊಸ ಸಿನಿಮಾ ಸೆಟ್ಟೇರುವ ಸಾಧ್ಯತೆ ಇದೆ.

ಬಹಳ ಬ್ಯುಸಿಯಾಗಿರುವ ನಟ ಪ್ರಭಾಸ್

ಇನ್ನು ಪ್ರಭಾಸ್ ಅತ್ಯಂತ ಬ್ಯುಸಿ ನಟರಾಗಿದ್ದು, ಪ್ರಭಾಸ್ ನಟಿಸಿರುವ 'ಆದಿಪುರುಷ್' ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ಅದರ ಬೆನ್ನಲ್ಲೆ ಪ್ರಶಾಂತ್ ನೀಲ್ ನಿರ್ದೇಶನದ 'ಸಲಾರ್' ಸಿನಿಮಾ ಸಹ ಬಿಡುಗಡೆ ಆಗಲಿದೆ. ಅದರ ಬಳಿಕ ನಾಗ್ ಅಶ್ವಿನ್ ನಿರ್ದೇಶನದ ಇನ್ನೂ ಹೆಸರಿಡದ ಸಿನಿಮಾ ಬಿಡುಗಡೆ ಆಗಲಿದೆ. ಇವುಗಳ ಜೊತೆಗೆ ಮಾರುತಿ ನಿರ್ದೇಶನದ ಸಿನಿಮಾ ಒಂದನ್ನು ಪ್ರಭಾಸ್ ಒಪ್ಪಿಕೊಂಡಿದ್ದಾರೆ. ಇವೆಲ್ಲ ಸಿನಿಮಾಗಳ ಬಳಿಕವಷ್ಟೆ ಪ್ರಭಾಸ್ ಹಾಗೂ ಹೃತಿಕ್ ರೋಷನ್ ಸಿನಿಮಾ ಸೆಟ್ಟೇರಲಿದೆ.