ಪೊಲೀಸರಿಗೆ ತೋರಿಸಿದ ಮೇಲಷ್ಟೇ ಈ ಚಿತ್ರ ರಿಲೀಸ್

ಸ್ಯಾಂಡಲ್ ವುಡ್ ನಲ್ಲಿ ವಿವಾದಗಳನ್ನೇ ಮೈಗೆ ಮೆತ್ತಿಕೊಂಡ ಸಿನಿಮಾ ಅದು. ಟೈಟಲ್ ಇಟ್ಟ ದಿನದಿಂದಲೇ ವಿವಾದಗಳು ಶುರುವಾದವು. ವಿವಾದಗಳು ದೂರವಾಗಿದ್ರೆ ಚಿತ್ರ ಐದಾರು ತಿಂಗಳ ಹಿಂದೇನೇ ರಿಲೀಸ್ ಆಗಬೇಕಿತ್ತು. ಚಿತ್ರದ ಹೆಸರು 'ಕರ್ನಾಟಕ ಅಯೋಧ್ಯೆಪುರಂ'.

ಈ ಚಿತ್ರದ ನಿರ್ದೇಶಕ ಲವ ಅವರಿಗೆ ಈಗ ಮತ್ತೊಂದು ಹೊಸ ತಲೆನೋವು ಶುರುವಾಗಿದೆ. ಜೋಶ್ ರಾಕೇಶ್-ಪ್ಯಾಟೆ ಹುಡ್ಗಿ ನಯನಾ ಜೋಡಿಯಾಗಿರೋ ಸಿನಿಮಾದಲ್ಲಿ ಹಲವು ವಿವಾದಾತ್ಮಕ ಅಂಶಗಳಿವೆ ಅನ್ನೋ ಕಾರಣಕ್ಕೆ ಚಿತ್ರಕ್ಕೆ ಕನ್ನಡ ಕಲ್ಪತರು ಸಂಘಟನೆ ವಿರೋಧ ವ್ಯಕ್ತಪಡಿಸಿತ್ತು. [ಅಯೋಧ್ಯೆಪುರಂ ಶೀರ್ಷಿಕೆಗೆ ಮುಸ್ಲಿಂರ ವಿರೋಧ]

ಕರ್ನಾಟಕ ಅಯೋಧ್ಯೆಪುರಂ

ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ಮಧ್ಯಸ್ಥಿಕೆಯಲ್ಲಿ ವಿವಾದ ಬಗೆಹರಿದಿತ್ತು. ಕರ್ನಾಟಕ ಅಯೋಧ್ಯೆಪುರಂ ಚಿತ್ರದ ನಿರ್ದೇಶಕರು ವಿವಾದಾತ್ಮಕ ಪೋಸ್ಟರ್ ಗಳನ್ನ ಜಾಹೀರಾತುಗಳಲ್ಲಿ ನೀಡೋದಿಲ್ಲ ಅಂತ ಒಪ್ಪಿಕೊಂಡು ಚಿತ್ರವನ್ನ ಈ ವರ್ಷದಲ್ಲೇ ರಿಲೀಸ್ ಮಾಡೋ ಪ್ಲಾನ್ ನಲ್ಲಿದ್ರು.

ಆದರೆ ಈಗ ವಾಣಿಜ್ಯ ಮಂಡಳಿ ಚಿತ್ರವನ್ನ ಪೊಲೀಸ್ ಅಧಿಕಾರಿಗಳಿಗೆ ತೋರಿಸಬೇಕು ಅನ್ನೋ ಸೂಚನೆಯನ್ನ ನಿರ್ದೇಶಕರಿಗೆ ನೀಡಿದೆಯಂತೆ. ಇದೇನಪ್ಪ ಹೊಸ ತರ್ಲೇ ಅಂತ ನಿರ್ದೇಶಕರು ತಲೆ ಕೆಡಿಸಿಕೊಂಡಿದ್ದಾರೆ.