ಜಾಕ್ಸನ್ ಕುರಿತ ಕೊನೆಯ ಚಿತ್ರ 'ದಿಸ್ ಈಸ್ ಇಟ್'

By Super

| Published: Monday, July 2, 2012, 16:18 [IST]

ಬಹಳಷ್ಟು ಕುತೂಹಲ ಮೂಡಿಸಿದ್ದ ಪಾಪ್ ದೊರೆ ಮೈಕಲ್ ಜಾಕ್ಸನ್ ಕುರಿತಾದ 'ದಿಸ್ ಈಸ್ ಇಟ್'ಚಲನಚಿತ್ರ ಇದೀಗ ಬಿಡುಗಡೆಯಾಗಿದೆ. ಕೇವಲ ಎರಡು ವಾರಗಳ ಕಾಲ ಮಾತ್ರ ಈ ಚಿತ್ರ ಪ್ರದರ್ಶನ ಕಾಣಲಿದ್ದು ಬೆಂಗಳೂರಿನ ಆಯ್ದ ಚಿತ್ರಮಂದಿರಗಳಲ್ಲೂ ಬಿಡುಗಡೆಯಾಗಿದೆ.

ಲಂಡನ್ ಕ್ಯೂ 2 ಅರೆನಾದಲ್ಲಿ ನಡೆಯಬೇಕಾಗಿದ್ದ ಶೋಗಾಗಿ ಕಠಿಣ ತಯಾರಿಯಲ್ಲಿದ್ದಾಗಲೇ ಜಾಕ್ಸನ್ ಅಗಲಿದ್ದರು. ಅವರ ಅಭಿಮಾನಿಗಳು ಇನ್ನೂ ಈ ಶಾಕ್ ನಿಂದ ಹೊರಬಂದಿಲ್ಲ. ಜಾಕ್ಸನ್ ಸಾವು ಅವರ ಅಭಿಮಾನಿಗಳಿಗೆ ಭರಿಸಲಾಗದ ನೋವನ್ನು ತಂದಿತ್ತು. ಪ್ರದರ್ಶನದ ಟಿಕೆಟ್ ಗಳೂ ಮಾರಾಟವಾಗಿದ್ದವು. ಶೋಗಾಗಿ ನಡೆಸಿದ ಪೂರ್ವ ತಯಾರಿಯ ದೃಶ್ಯಗಳು ದಾಖಲಾಗಿದ್ದವು. ಆ ದೃಶ್ಯಗಳನ್ನು ಆಧರಿಸಿ 'ದಿ ಈಸ್ ಇಟ್' ಚಿತ್ರವನ್ನು ತೆರೆಗೆ ತರಲಾಗಿದೆ.

ಬುಧವಾರ(ಅ.28) ಬಿಡುಗಡೆಯಾಗಿರುವ ಈ ಚಿತ್ರ ಹೌಸ್ ಫುಲ್ ಪ್ರದರ್ಶನ ಕಾಣುತ್ತಿದೆ. ಕೇವಲ ಎರಡು ವಾರ ಪ್ರದರ್ಶನಗೊಳ್ಳಲಿರುವ 'ದಿಸ್ ಈಸ್ ಇಟ್' ಚಿತ್ರದ ಟಿಕೆಟ್ ಗಾಗಿ ಜಾಕ್ಸನ್ ಅಭಿಮಾನಿಗಳು ಮುಗಿಬಿದ್ದಿದ್ದಾರೆ. ಎರಡು ವಾರಗಳ ಪ್ರದರ್ಶನದ ಶೇ.95ರಷ್ಟು ಟಿಕೆಟ್ ಗಳು ಈಗಾಗಲೇ ಮಾರಾಟವಾಗಿವೆ.

ಸೋನಿ ಪಿಕ್ಚರ್ಸ್ ಬಿಡುಗಡೆ ಮಾಡಿರುವ ಈ ಚಿತ್ರ ಭಾರತದಲ್ಲಿ 150ಕ್ಕೂ ಹೆಚ್ಚು ಪ್ರಿಂಟ್ ಗಳೊಂದಿಗೆ ತೆರೆಕಂಡಿದೆ. ಬೆಂಗಳೂರಿನ ಪಿವಿಆರ್, ಫೇಮ್ ಫೋರಂ ಮಾಲ್, ಫೇಮ್ ಲಿಡೊ, ಇನ್ನೋವೇಟಿವ್ ಮಲ್ಟಿಫ್ಲೆಕ್ಸ್, ಫನ್ ಸಿನಿಮಾಸ್, ನವರಂಗ್, ಇನಾಕ್ಸ್, ವಿಷನ್ ಸಿನಿಮಾಸ್, ಫೇಮ್ ಶಂಕರನಾಗ್, ಊರ್ವಶಿ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ.

ಇಷ್ಟಕ್ಕೂ ಈ ಚಿತ್ರದಲ್ಲಿ ಅಂತಹದ್ದೇನಿದೆ? ಜಾಕ್ಸನ್ ರ 2009ರವರೆಗಿನ 100ಕ್ಕೂ ಅಧಿಕ ಗಂಟೆಗಳ ಪ್ರದರ್ಶನದ ಆಯ್ದ ದೃಶ್ಯಗಳು ಈ ಚಿತ್ರದಲ್ಲಿವೆ. ಜಾಕ್ಸನ್ ಅವರ ವಿಭಿನ್ನ ಮುಖಗಳನ್ನು ಈ ಚಿತ್ರದಲ್ಲಿ ಕಾಣಬಹುದಾಗಿದೆ. ಕೆಲವೊಂದು ಖಾಸಗಿ ದೃಶ್ಯಗಳು ಚಿತ್ರದಲ್ಲಿ ಸ್ಥಾನ ಪಡೆದಿರುವುದು ವಿಶೇಷ. ಒಟ್ಟಾರೆ ದಿಸ್ ಈಸ್ ಇಟ್ ಚಿತ್ರವನ್ನು ಸಾಕ್ಷ್ಯಚಿತ್ರ ರೂಪದ ಚಲನಚಿತ್ರ ಎನ್ನಬಹುದು.

(ದಟ್ಸ್ ಕನ್ನಡ ಚಿತ್ರವಾರ್ತೆ)