'ಅವತಾರ್ 2' ವಿಶ್ವದಾದ್ಯಂತ 3 ದಿನದ ಗಳಿಕೆ ₹3,598 ಕೋಟಿ: ಭಾರತದಲ್ಲಿ ಎಷ್ಟು?

'ಅವತಾರ್ 2' ಬಾಕ್ಸಾಫೀಸ್ ದರೋಡೆ

ಹಾಲಿವುಡ್ ಸಿನಿಮಾ 'ಅವತಾರ್ 2' ವಿಶ್ವದಾದ್ಯಂತ ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದೆ. ಅಮೆರಿಕ, ಚೀನಾ, ವಿಶ್ವದ ಮೂಲೆ ಮೂಲೆಯಲ್ಲೂ ಸಿನಿಮಾ ರಿಲೀಸ್ ಆಗಿದ್ದು, ಸಖತ್ ಸದ್ದು ಮಾಡುತ್ತಿದೆ. ಹಾಗೇ ಭಾರತದಲ್ಲಿಯೂ ಹಾಲಿವುಡ್‌ ಸಿನಿಮಾವೊಂದಕ್ಕೆ ಸಖತ್ ರೆಸ್ಪಾನ್ಸ್ ಸಿಗುತ್ತಿದೆ. ಡಿಸೆಂಬರ್ 16ರಂದು ರಿಲೀಸ್ ಆಗಿದ್ದ 'ಅವತಾರ್ 2' ವಿಶ್ವದಾದ್ಯಂತ ಸುಮಾರು ₹3,598 ಕೋಟಿ ಕಲೆಕ್ಷನ್ ಮಾಡಿ ಮುನ್ನುಗುತ್ತಿದೆ. ಅಷ್ಟಕ್ಕೂ ಅತೀ ಹೆಚ್ಚು ಗಳಿಕೆ ಕಂಡಿದ್ದು ಎಲ್ಲಿ? ಅನ್ನೋದು ಇಂಟ್ರೆಸ್ಟಿಂಗ್.

ಎಲ್ಲೆಲ್ಲಿ ಎಷ್ಟೆಷ್ಟು ಕಲೆಕ್ಷನ್?

ಜೇಮ್ಸ್ ಕ್ಯಾಮರೂನ್ ಬರೋಬ್ಬರಿ 13 ವರ್ಷಗಳ ಬಳಿಕ 'ಅವತಾರ್ 2' ರಿಲೀಸ್ ಮಾಡಿದ್ದಾರೆ. ಈ ಸಿನಿಮಾ ನೋಡುವುದಕ್ಕೆ ಇಡೀ ವಿಶ್ವವೇ ಕಾದು ಕೂತಿತ್ತು. ಉತ್ತರ ಅಮೆರಿಕದಲ್ಲಿ ಸುಮಾರು $134 ಮಿಲಿಯನ್ ಗಳಿಕೆ ಕಂಡಿದೆ. ಅದೇ ಚೀನಾದಲ್ಲಿ $59 ಮಿಲಿಯನ್, ವಿಶ್ವದ ಉಳಿದ ಭಾಗಗಳಲ್ಲಿ $242 ಮಿಲಿಯನ್ ಗಳಿಸಿದೆ. ಒಟ್ಟು ಸಿನಿಮಾದ ಕಲೆಕ್ಷನ್ ಸುಮಾರು 435 ಮಿಲಿಯನ್ ಡಾಲರ್ (ಭಾರತದ ರೂ.ನಲ್ಲಿ ₹3,598 ಕೋಟಿ) ಗಳಿಸಿದೆ ಎಂದು ಟ್ರೇಡ್ ಎಕ್ಸ್‌ಪರ್ಟ್ ರಮೇಶ್ ಬಾಲಾ ತಿಳಿಸಿದ್ದಾರೆ.

ಭಾರತದಲ್ಲಿ 'ಅವತಾರ್ 2' ಗಳಿಸಿದ್ದೆಷ್ಟು?

'ಅವತಾರ್' ಸಿನಿಮಾ ಭಾರತದಲ್ಲಿ ತೆರೆಕಂಡಾಗಲೂ ಬಾಕ್ಸಾಫೀಸ್‌ನಲ್ಲಿ ಚಿಂದಿ ಉಡಾಯಿಸಿತ್ತು. ಈಗ 'ಅವತಾರ್ 2' ತೆರೆಕಂಡಾಗಲೂ ಸಿಕ್ಕಾಪಟ್ಟೆ ರೆಸ್ಪಾನ್ಸ್ ಸಿಗುತ್ತಿದೆ. ಮೊದಲ ಮೂರು ದಿನ ಈ ಸಿನಿಮಾ ಕಲೆಕ್ಷನ್‌ನಲ್ಲಿ ಏರಿಕೆಯಾಗುತ್ತಲೇ ಇದೆ. ಭಾರತದ ಬಾಕ್ಸಾಫೀಸ್‌ನಲ್ಲಿ ಮೊದಲ ದಿನ 41 ಕೋಟಿ ರೂ. ಗಳಿಸಿತ್ತು. ಎರಡನೇ ದಿನ 44 ರಿಂದ 46 ಕೋಟಿ ರೂ. ಎಂದು ಅಂದಾಜಿಸಲಾಗಿತ್ತು. ಹಾಗೇ ಮೂರನೇ ದಿನ 49 ಕೋಟಿ ರೂ. ಕಲೆಕ್ಷನ್ ಮಾಡಿದ್ದು, 134 ರಿಂದ 136 ಕೋಟಿ ರೂ. ಗಳಿಕೆ ಕಂಡಿರಬಹುದು ಎಂದು ಹೇಳಲಾಗುತ್ತಿದೆ.

'ಅವೆಂಜರ್ಸ್ ಎಂಡ್ ಗೇಮ್' ಬೀಟ್ ಮಾಡಿಲ್ಲ

'ಅವತಾರ್ 2' ಭಾರತದ ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸಿದ ಹಾಲಿವುಡ್‌ನ ಎರಡನೇ ಸಿನಿಮಾ. ಇದೂವರೆಗೂ ಭಾರತದಲ್ಲಿ ಅತೀ ಹೆಚ್ಚು ಗಳಿಕೆ ಕಂಡಿದ್ದು ಹಾಲಿವುಡ್ ಸಿನಿಮಾ 'ಅವೆಂಜರ್ಸ್‌ ಎಂಡ್ ಗೇಮ್'. ಮೊದಲ ದಿನ ಈ ಸಿನಿಮಾ ಸುಮಾರು 53.10 ಕೋಟಿ ಕಲೆಕ್ಷನ್ ಮಾಡಿತ್ತು. ಭಾರತದಲ್ಲಿ 'ಅವತಾರ್ 2' ಇಂಗ್ಲಿಷ್, ಹಿಂದಿ, ತೆಲುಗು, ತಮಿಳು, ಕನ್ನಡ ಹಾಗೂ ಮಲಯಾಳಂ ಭಾಷೆಯಲ್ಲಿ ಬಿಡುಗಡೆಯಾಗಿದೆ. ಎಲ್ಲಾ ಭಾಷೆಗಳಲ್ಲೂ ಸಿನಿಮಾಗೆ ಸಖತ್ ರೆಸ್ಪಾನ್ಸ್ ಸಿಗುತ್ತಿದೆ.