ಮಾಜಿ ಬಾಂಡ್ ಗರ್ಲ್ ಓಲ್ಗಾಗೂ ತಗುಲಿದ ಕೊರೊನಾವೈರಸ್

ಬಾಲ್ಯದ ದಿನಗಳಿಂದಲೂ ಕಷ್ಟ ಕಂಡಿರುವ ಓಲ್ಗಾ

ಸೋವಿಯಟ್ ರಷ್ಯಾ ಮೂಲದ ತಾಯಿ, ಉಕ್ರೇನಿನ ತಂದೆಗೆ ಜನಿಸಿದ ಓಲ್ಗಾ ಬಾಲ್ಯದಲ್ಲಿ ತಂದೆ ತಾಯಿಯ ಪ್ರೀತಿಯನ್ನು ಕಳೆದುಕೊಂಡವಳು. ಮೂರು ವರ್ಷದವಳಿದ್ದಾಗ ಇವಳ ತಂದೆ-ತಾಯಿ ವಿಚ್ಛೇದನ ಪಡೆದರು. ಬಡತನದ ಆ ದಿನಗಳಲ್ಲಿ ತನ್ನ ಚಿಕ್ಕಮ್ಮನ ಆರೈಕೆಯೆ ಆಸರೆಯಾಯಿತು. ಅಜ್ಜ, ಅಜ್ಜಿ, ಮಾವನ ಜೊತೆಗೆ ತಾಯಿಯೂ ಸೇರಿ ಒಂದೆ ಫ್ಲಾಟ್ ನಲ್ಲಿ ವಾಸಮಾಡುತ್ತಿದ್ದ ಕಷ್ಟಕರ ಕಾಲ. ಓಲ್ಗಾ ಪುನಃ ತನ್ನ ತಂದೆಯನ್ನು ನೋಡಿದ್ದು ತನ್ನ ಹದಿಮೂರನೇ ವಯಸ್ಸಿನಲ್ಲಿ. ಅದು ಆತ ತನ್ನ ಎರಡನೇ ಪತ್ನಿಯಿಂದ ಡಿವೋರ್ಸ್ ಆಗಿ ಪುನಃ ಈ ಕಡೆ ಮುಖ ಮಾಡಿದಾಗ.

ಸಾಂಸಾರಿಕ ಜೀವನದಲ್ಲಿ ಸುಖ ಕಂಡಿದ್ದು ಕಮ್ಮಿ.

ಸುಂದರ ಅಂಗಸೌಷ್ಟವ ಹೊಂದಿದ್ದ ಓಲ್ಗಾ ರೂಪದರ್ಶಿಯಾಗಿ ಹೆಸರು ಮಾಡತೊಡಗಿದಳು. ಶಾಲೆಯಲ್ಲಿ ಕಲಿತಿದ್ದು ಫ್ರೆಂಚ್ ಭಾಷೆ. ಇಂಗ್ಲೀಷ್ ಕೂಡ ಮಾತಾಡಬಲ್ಲಳು. ಅನ್ನುಲೈರ್ ಲಾ ( Annulaire, L" )ಎಂಬ ಚಿತ್ರದೊಂದಿಗೆ ಚಿತ್ರರಂಗಕ್ಕೆ ಕಾಲಿರಿಸಿದಳು. ಫ್ಯಾಷನ್ ಫೋಟೋಗ್ರಾಫರ್ ಸೆಡ್ರಿಕ್ ವಾಲ್ ಮೊಲ್ ನನ್ನು ಮದುವೆಯಾದ ಓಲ್ಗಾ ದಾಂಪತ್ಯ ಉಳಿದಿದ್ದು ನಾಲ್ಕು ವರ್ಷ ಮಾತ್ರ. ನಂತರ ಡೆನಿಯಲ್ ಗ್ಯಾಬ್ರಿಲ್ ನನ್ನು ವರಿಸಿದರೂ 2007ರಲ್ಲಿ ಡಿವೋರ್ಸ್ ಕೊಟ್ಟಳು. ಒಟ್ಟಿನಲ್ಲಿ ಸಾಂಸಾರಿಕ ಜೀವನದಲ್ಲಿ ಸುಖ ಕಂಡಿದ್ದು ಕಮ್ಮಿ.

ಹಲವು ಸಾಹಸಭರಿತ ಚಿತ್ರಗಳ ನಾಯಕಿ

ಬ್ರೂಕ್ಲೀನ್ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ Annulaire, L" ಚಿತ್ರದ ಇರಿಸ್ ಪಾತ್ರಕ್ಕೆ ಅಪಾರ ಪ್ರಶಂಸೆ ಗಳಿಸಿದಳು. ನಂತರ Paris, je t'aime (2006), The Serpent (2006) , Hitman (2007) ಈಕೆಗೆ ಹೆಸರು ತಂದು ಕೊಟ್ಟ ಚಿತ್ರಗಳು. Quantum of Solace (2008) ಚಿತ್ರವಲ್ಲದೆ ವಿಡಿಯೋ ಗೇಮ್ ಆಧಾರಿತ ಚಿತ್ರ Max Payne (2008) ನಲ್ಲೂ ನಟಿಸಿದ್ದಾಳೆ. ನಂತರ ಹೆಸರು ತಂದುಕೊಟ್ಟಿದ್ದು 2013ರಲ್ಲಿ ಒಬ್ಲಿವಿಲಿಯನ್ ಚಿತ್ರ.

ಕೊರೊನಾ ಭೀತಿಯಿಂದ ಬಾಂಡ್ ಚಿತ್ರ ಮುಂದಕ್ಕೆ

ಈ ಮೊದಲು ಬಾಂಡ್ ಸಿನಿಮಾ ಏಪ್ರಿಲ್ ನಲ್ಲಿ ತೆರೆಗೆ ಬರಲು ಸಿದ್ದವಾಗಿತ್ತು. ಯು.ಕೆಯಲ್ಲಿ ಏಪ್ರಿಲ್ 3ಕ್ಕೆ ರಿಲೀಸ್ ಆಗಬೇಕಿತ್ತು. ಇನ್ನು ಅಮೆರಿಕಾದಲ್ಲಿ ಏಪ್ರಿಲ್ 8ಕ್ಕೆ ತೆರೆಗೆ ಬರಬೇಕಿತ್ತು. 2015ರಲ್ಲಿ 24ನೇ ಬಾಂಡ್ ಸಿನಿಮಾ ಸ್ಪೆಕ್ಟರ್ ರಿಲೀಸ್ ಆಗಿತ್ತು. ಈಗ ನಾಲ್ಕು ವರ್ಷಗಳ ಬಳಿಕ ಬಾಂಡ್ ಸರಣಿಯ 25ನೇ ಸಿನಿಮಾ 'ನೋ ಟೈಮ್ ಟು ಡೈ' ತೆರೆಗೆ ಬರುತ್ತಿದೆ.