'ನೀರಿನಂತಿರು ಗೆಳೆಯ' ಎನ್ನುತ್ತಿದ್ದ ಬ್ರೂಸ್‌ ಲೀ ನೀರಿನಿಂದಲೇ ಸತ್ತರೇ? ಕೊನೆಗೂ ಸಾವಿನ ರಹಸ್ಯ ಬಯಲು!

2 ಕಾರಣ ಮುಂದಿಟ್ಟ ಸಂಶೋಧಕರು

ಬ್ರೂಸ್‌ ಲೀ ಸಾವಿಗೆ 'ಸೆರೆಬ್ರಲ್ ಎಡಿಮಾ' ಅಂದರೆ ಮೆದುಳು ಊತವೇ ಕಾರಣ ಎನ್ನುವ ಬಗ್ಗೆ ಈ ಹಿಂದೆ ಕೆಲವರು ಹೇಳಿದ್ದರು. ಹೊಸ ಸಂಶೋಧನಯಲ್ಲಿ ಈ ಬಗ್ಗೆ ಮತ್ತಷ್ಟು ಅಧ್ಯಯನ ನಡೆದಿದೆ. ಜೊತೆಗೆ ಕಿಡ್ನಿಗೆ ಸಂಬಂಧಿಸಿದ ಸಮಸ್ಯೆ ಕೂಡ ಅವರ ಸಾವಿಗೆ ಕಾರಣ ಇರಬಹುದು ಎನ್ನಲಾಗಿದೆ. ಶವಪರೀಕ್ಷೆ ವೇಳೆ ಬ್ರೂಸ್ ಲೀ ಅವರ ಮೆದುಳು 1,575 ಗ್ರಾಂಗಳಷ್ಟು ಊದಿಕೊಂಡಿತ್ತು ಎಂದು ತಿಳಿದುಬಂದಿದೆ. ಸಾಮಾನ್ಯವಾಗಿ ಮನುಷ್ಯನ ಮೆದುಳು ಸರಾಸರಿ 1,400 ಗ್ರಾಂ ಗಾತ್ರ ಇರುತ್ತದೆ. ಈ ಊತದಿಂದಲೇ ಬ್ರೂಸ್ ಲೀ ಸಾವನ್ನಪ್ಪಿದ್ದಾರೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಹೆಚ್ಚು ನೀರು ಸೇವನೆ ಪ್ರಾಣಕ್ಕೆ ಕುತ್ತು!

ಸದಾ ಸಮರ ಕಲೆ ಅಭ್ಯಾಸ, ಸಿನಿಮಾಗಳಲ್ಲಿ ಆಕ್ಷನ್ ಸನ್ನಿವೇಶಗಳಲ್ಲಿ ನಟಿಸುತ್ತಿದ್ದ ಬ್ರೂಸ್ ಲೀ ಹೆಚ್ಚು ನೀರು ಕುಡಿಯುತ್ತಿದ್ದರು. ಹೆಚ್ಚು ನೀರು ತೆಗೆದುಕೊಂಡು ಅದೇ ಪ್ರಮಾಣದಲ್ಲಿ ಮೂತ್ರ ವಿಸರ್ಜನೆ ಮಾಡದಿರುವುದು ಹೈಪೋನಾಟ್ರೀಮಿಯಾಕ್ಕೆ ಕಾರಣವಾಗಿದೆ. ಬ್ರೂಸ್ ಲೀ ಕಿಡ್ನಿ ಸರಿಯಾಗಿ ಕೆಲಸ ಮಾಡದೇ ಇದ್ದಿದ್ದಕ್ಕೆ ಈ ಸಮಸ್ಯೆ ಎದುರಾಗಿದೆ. ಇದೂ ಅವರ ಸಾವಿಗೆ ಕಾರಣವಾಯಿತು' ಎನ್ನುತ್ತಾರೆ ಸಂಶೋಧಕರು. 'ಬಿ ವಾಟರ್ ಮೈ ಫ್ರೆಂಡ್' ಎನ್ನುತ್ತಿದ್ದ ಬ್ರೂಸ್‌ ಲೀ ಪ್ರಾಣವನ್ನು ಅದೇ ನೀರು ತೆಗೆದು ಬಿಡ್ತಾ? ಎಂದು ಕೆಲವರು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಅತಿಯಾದ ದೇಹ ದಂಡನೆ

ಇನ್ನು ಸಮರ ಕಲೆ ಅಭ್ಯಾಸದ ವೇಳೆ ಬ್ರೂಸ್ ಲೀ ಬಾಯಾರಿಕೆ ನೀಗಿಸಲು ಕ್ಯಾರೆಟ್ ಜ್ಯೂಸ್, ಆಪಲ್ ಜ್ಯೂಸ್ ಮತ್ತು ಪ್ರೋಟೀನ್ ಪಾನೀಯಗಳನ್ನು ಹೆಚ್ಚು ಸೇವಿಸುತ್ತಿದ್ದರು. ದೇಹದಿಂದ ಸೋಡಿಯಂ ತೆಗೆದು ಹೆಚ್ಚಿನ ಸ್ನಾಯುಗಳನ್ನು ಬೆಳೆಸುವ ಪ್ರಯೋಗ ಮಾಡಿರುವುದಾಗಿ ಹೇಳಲಾಗಿದೆ. ಸಾವಿಗೂ ಹಿಂದಿನ ತಿಂಗಳಲ್ಲಿ 10ರಿಂದ 20 ಸೆರಾಮಿಕ್ ಬಾಟಲ್ ಶೇಕ್ ಕುಡಿಯುತ್ತಿದ್ದರು ಎನ್ನುತ್ತಾರೆ ಆಪ್ತರು.

ಈಕ್ವಿಜಿಕ್ ಮಾತ್ರೆ ಸೇವನೆ

ವರದಿಗಳ ಪ್ರಕಾರ, ಬ್ರೂಸ್ ಲೀ ಸಾಯುವ ರಾತ್ರಿ ಗಾಂಜಾವನ್ನು ಸೇದಿದ್ದರು, ನಂತರ ನೀರನ್ನು ಸೇವಿಸಿದರು. ಇದಾದ ಸ್ವಲ್ಪ ಸಮಯದ ನಂತರ, ರಾತ್ರಿ 7.30 ರ ಸುಮಾರಿಗೆ ಅವರಿಗೆ ತಲೆನೋವು ಮತ್ತು ತಲೆತಿರುಗುವಿಕೆ ಕಾಣಿಸಿಕೊಂಡಿತು. ಹಾಗಾಗಿ ಈಕ್ವಿಜಿಕ್ ಎಂಬ ನೋವು ನಿವಾರಕ(ಪೇನ್ ಕಿಲ್ಲರ್) ಮಾತ್ರೆ ತೆಗೆದುಕೊಂಡು ಮಲಗಿದರು. 2 ಗಂಟೆಗಳ ನಂತರ ಬ್ರೂಸ್‌ ಲೀ ಮೇಲೇಳಲೇ ಇಲ್ಲ.