ಆಸ್ಕರ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದಲ್ಲಿ ಶ್ರೀದೇವಿಗೆ ಶ್ರದ್ಧಾಂಜಲಿ

ಕೆಲ ದಿನಗಳ ಹಿಂದೆಯಷ್ಟೆ ನಿಧನರಾದ ಬಾಲಿವುಡ್ ಚಿತ್ರರಂಗದ ಧ್ರುವತಾರೆ ಶ್ರೀದೇವಿ ಅವರಿಗೆ ಆಸ್ಕರ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದಲ್ಲಿ ಶ್ರದ್ಧಾಂಜಲಿ ಸಲ್ಲಿಸಲಾಗಿದೆ. ಅಮೇರಿಕಾದ ಲಾಸ್ ಏಂಜಲೀಸ್ ನ ಡೊಲ್ಬಿ ಥಿಯೇಟರ್ ನಲ್ಲಿ 2018 ಸಾಲಿನ ಆಸ್ಕರ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮ ನಡೆಯುತ್ತಿದೆ.

ಆಸ್ಕರ್ ಕಾರ್ಯಕ್ರಮದಲ್ಲಿ ವಿಶ್ವ ಸಿನಿಮಾರಂಗಕ್ಕೆ ವಿಶೇಷ ಕೊಡುಗೆ ನೀಡಿ ಮರೆಯಾದ ತಾರೆಯರನ್ನು ನೆನೆಯಲಾಯಿತು. ಈ ಪೈಕಿ ಬಾಲಿವುಡ್ ನಟ ಶಶಿಕಪೂರ್ ಮತ್ತು ನಟಿ ಶ್ರೀದೇವಿ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು. ಇಷ್ಟು ವರ್ಷ ಭಾರತೀಯ ಸಿನಿಮಾಗಳ ಮೂಲಕ ವಿಶ್ವದೆಲ್ಲೆಡೆ ಹೆಸರು ಮಾಡಿದ್ದ ಈ ಇಬ್ಬರ ಸಾಧನೆಗೆ ಗೌರವ ಸೂಚಿಸಲಾಯಿತು. 'ಜೇಮ್ಸ್ ಬಾಂಡ್' ಖ್ಯಾತಿಯ ನಟ ರೋಜರ್ ಮೂರ್ ಸೇರಿದಂತೆ ಹಾಲಿವುಡ್ ಚಿತ್ರರಂಗ ತಾರೆಯರ ಕೆಲಸವನ್ನು ಸಹ ಈ ವೇಳೆ ನೆನೆಯಲಾಯಿತು.

ಅಂದಹಾಗೆ, 90ನೇ ಆಸ್ಕರ್ ಪ್ರಶಸ್ತಿ ಈಗ ಪ್ರಕಟವಾಗಿದ್ದು, 13 ಸಿನಿಮಾಗಳು ನಾಮಿನೇಟ್ ಆಗಿತ್ತು. ಈ ಪೈಕಿ 'ಶೇಪ್ ಆಫ್ ವಾಟರ್' ಸಿನಿಮಾ ಈ ಬಾರಿಯ ಅತ್ಯುತ್ತಮ ಸಿನಿಮಾವಾಗಿದೆ. ಅತ್ಯುತ್ತಮ ನಟ ಪ್ರಶಸ್ತಿಯನ್ನು ಗ್ಯಾರಿ ಓಲ್ಡ್ ಮ್ಯಾನ್, ಅತ್ಯುತ್ತಮ ನಟಿ ಪ್ರಶಸ್ತಿಯನ್ನು ಫ್ರಾನ್ಸಿಸ್ ಎಂಸಿದೋರ್ಮ್ಯಾಂಡ್ ಪಡೆದಿದ್ದಾರೆ. ಉಳಿದಂತೆ ಆಲಿಸನ್ ಜನ್ನಿ ಮತ್ತು ಸ್ಯಾಮ್ ರಾಕ್ವೆಲ್ ಪೋಷಕ ನಟ, ಪೋಷಕ ನಟಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.