ಈ ವರ್ಷ ಕೇರಳದ ಅತಿ ಹೆಚ್ಚು ಜನ ನೋಡಿದ್ದು ಕನ್ನಡ ಸಿನಿಮಾವನ್ನು! RRRಗೆ ನಾಲ್ಕನೇ ಸ್ಥಾನ!

ಅತಿ ಹೆಚ್ಚು ಜನ ನೋಡಿರುವುದು ಕನ್ನಡ ಸಿನಿಮಾವನ್ನು

ಈ ವರ್ಷ ಕೇರಳದಲ್ಲಿ ಅತಿ ಹೆಚ್ಚು ಜನ ಖರೀದಿಸಿರುವುದು ಕನ್ನಡ ಸಿನಿಮಾದ ಟಿಕೆಟ್ ಅನ್ನು. ಹೌದು, ಯಶ್ ನಟಿಸಿ, ಪ್ರಶಾಂತ್ ನೀಲ್ ನಿರ್ದೇಶನ ಮಾಡಿರುವ 'ಕೆಜಿಎಫ್ 2' ಸಿನಿಮಾವನ್ನು ಕೇರಳದ ಹೆಚ್ಚು ಜನ ಈ ವರ್ಷ ನೋಡಿದ್ದಾರೆ. ಈ ವರ್ಷ ಬಿಡುಗಡೆ ಆದ ಯಾವುದೇ ಮಲಯಾಳಂ ಸಿನಿಮಾಗಳಿಗಿಂತಲೂ ಹೆಚ್ಚಾಗಿ 'ಕೆಜಿಎಫ್ 2' ಸಿನಿಮಾ ನೋಡಿದ್ದಾರೆ. 'ಕೆಜಿಎಫ್ 2' ಸಿನಿಮಾದ 67,580 ಟಿಕೆಟ್‌ಗಳು ಕೇರಳದಲ್ಲಿ ಈ ವರ್ಷ ಮಾರಾಟವಾಗಿದೆ.

ಭರ್ಜರಿ ಕಲೆಕ್ಷನ್ ಮಾಡಿರುವ 'ಕೆಜಿಎಫ್ 2'

ಕೇರಳದಲ್ಲಿ 'ಕೆಜಿಎಫ್ 2' ಸಿನಿಮಾ 1.21 ಕೋಟಿ ರುಪಾಯಿ ಗಳಿಸಿದೆ. 'ಕೆಜಿಎಫ್ 2' ಸಿನಿಮಾವನ್ನು ಮಲಯಾಳಂನಲ್ಲಿ ಡಬ್ ಮಾಡಿ ಬಿಡುಗಡೆ ಮಾಡಲಾಗಿತ್ತು. ಅಲ್ಲಿ ಆ ಸಿನಿಮಾವನ್ನು ಅಲ್ಲಿನ ಜನಪ್ರಿಯ ನಟ, ನಿರ್ದೇಶಕ ಪೃಥ್ವಿರಾಜ್ ಸುಕುಮಾರನ್ ತಮ್ಮದೇ ನಿರ್ಮಾಣ ಸಂಸ್ಥೆಯ ಮೂಲಕ ವಿತರಣೆ ಮಾಡಿದ್ದರು. 'ಕೆಜಿಎಫ್ 2' ಸಿನಿಮಾ ಮಲಯಾಳಂನಲ್ಲಿ ಬಹಳ ದೊಡ್ಡ ಹಿಟ್ ಆಗಿತ್ತು.

ಎರಡನೇ ಸ್ಥಾನದಲ್ಲಿ ಕಮಲ್ ಹಾಸನ್ ಸಿನಿಮಾ

ಇನ್ನು ಎರಡನೇ ಸ್ಥಾನದಲ್ಲಿರುವುದು ತಮಿಳಿನ 'ವಿಕ್ರಂ' ಸಿನಿಮಾ ಈ ಸಿನಿಮಾದ 46 ಸಾವಿರ ಟಿಕೆಟ್‌ಗಳು ಕೇರಳದಲ್ಲಿ ಈ ವರ್ಷ ಸೇಲ್ ಆಗಿವೆ. ಮೂರನೇ ಸ್ಥಾನದಲ್ಲಿರುವ ತಮಿಳು ಸಿನಿಮಾ ಇದ್ದು, 'ಪೊನ್ನಿಯಿನ್ ಸೆಲ್ವನ್' ಸಿನಿಮಾದ 39 ಸಾವಿರ ಟಿಕೆಟ್‌ಗಳು ಮಾರಾಟವಾಗಿವೆ. ಈ ವರ್ಷದ ಮತ್ತೊಂದು ಸೂಪರ್ ಹಿಟ್ ಸಿನಿಮಾ 'RRR' ನಾಲ್ಕನೇ ಸ್ಥಾನದಲ್ಲಿದೆ. 'RRR' ಸಿನಿಮಾದ 37.5 ಸಾವಿರ ಟಿಕೆಟ್‌ಗಳು ಕೇರಳದಲ್ಲಿ ಮಾರಾಟವಾಗಿವೆ. ಮೊದಲ ನಾಲ್ಕು ಸಹ ಅನ್ಯಭಾಷೆಯ ಸಿನಿಮಾಗಳೇ ಆಗಿವೆ.

ಪಟ್ಟಿಯಲ್ಲಿದೆ ಮತ್ತೊಂದು ಕನ್ನಡ ಸಿನಿಮಾ!

ಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿ ಮಲಯಾಳಂ ಸಿನಿಮಾ ಇದೆ. ಇತ್ತೀಚೆಗೆ ಬಿಡುಗಡೆ ಆಗಿ ಹಿಟ್ ಆದ ಫ್ಯಾಮಿಲಿ ಡ್ರಾಮಾ 'ಜಯ ಜಯ ಜಯ ಜಯ ಹೇ' ಹೆಸರಿನ ಮಲಯಾಳಂ ಸಿನಿಮಾದ 35,333 ಟಿಕೆಟ್‌ಗಳು ಮಾರಾಟವಾಗಿವೆ. ನಂತರ ಆರನೇ ಸ್ಥಾನದಲ್ಲಿ ಮತ್ತೆ ಕನ್ನಡ ಸಿನಿಮಾ ಇದೆ. ರಿಷಬ್ ಶೆಟ್ಟಿ ನಟಿಸಿ ನಿರ್ದೇಶಿಸಿರುವ 'ಕಾಂತಾರ' ಸಿನಿಮಾದ 33,484 ಟಿಕೆಟ್‌ಗಳು ಮಾರಾಟವಾಗಿ 59.64 ಲಕ್ಷ ರುಪಾಯಿ ಕಲೆಕ್ಷನ್ ಆಗಿತ್ತು. ಅದಾದ ಬಳಿಕ ಏಳನೇ ಸ್ಥಾನದಲ್ಲಿ ಮಲಯಾಳಂನ 'ಭೀಷ್ಮ ಪರ್ವಂ' ಇದೆ. ಈ ಸಿನಿಮಾದ 29.5 ಸಾವಿರ ಟಿಕೆಟ್‌ಗಳು ಮಾರಾಟವಾಗಿವೆ.

ಕೊನೆಯಲ್ಲಿವೆ ಮಲಯಾಳಂ ಸಿನಿಮಾಗಳು

ಎಂಟನೇ ಸ್ಥಾನದಲ್ಲಿ ಭಿನ್ನವಾಗಿಯೂ, ಸ್ಟೈಲಿಷ್ ಆಗಿಯೂ ನಿರ್ಮಿಸಲಾಗಿರುವ ಮಲಯಾಳಂನ 'ತಲ್ಲುಮಾಲ' ಸಿನಿಮಾ ಇದೆ. ಈ ಸಿನಿಮಾದ 24.3 ಸಾವಿರ ಟಿಕೆಟ್‌ಗಳು ಈ ವರ್ಷ ಮಾರಾಟವಾಗಿವೆ. ಮೋಹನ್‌ಲಾಲ್ ಪುತ್ರ ನಟಿಸಿರುವ 'ಹೃದಯಂ' ಮಲಯಾಳಂ ಸಿನಿಮಾದ 22.3 ಸಾವಿರ ಟಿಕೆಟ್‌ಗಳು ಮಾರಾಟವಾಗಿವೆ. ಹತ್ತನೇ ಸ್ಥಾನದಲ್ಲಿ ಪೃಥ್ವಿರಾಜ್ ಸುಕುಮಾರ್ ನಟಿಸಿರುವ ಮಲಯಾಳಂ ಸಿನಿಮಾ 'ಜನ ಗಣ ಮನ' ಇದೆ. ಈ ಸಿನಿಮಾದ 20.9 ಸಾವಿರ ಟಿಕೆಟ್‌ಗಳು ಮಾರಾಟವಾಗಿವೆ. ಅಲ್ಲಿಗೆ ಈ ವರ್ಷ ಕೇರಳದಲ್ಲಿ ಮಲಯಾಳಂ ಸಿನಿಮಾಗಳಿಗಿಂತಲೂ ಹೆಚ್ಚಾಗಿ ಅನ್ಯಭಾಷೆಯ ಸಿನಿಮಾಗಳೇ ಚೆನ್ನಾಗಿ ಪ್ರದರ್ಶನ ಕಂಡಿವೆ.