275 ದಿನಗಳ ಬಳಿಕ ಮನೆಯಿಂದ ಹೊರಗೆ ಬಂದ ಮಲಯಾಳಂ ಸೂಪರ್ ಸ್ಟಾರ್

ಲಾಕ್‌ಡೌನ್ ಘೋಷಣೆ ಆದ್ಮೇಲೆ ಮಲಯಾಳಂ ಸೂಪರ್ ಸ್ಟಾರ್ ಮಮ್ಮೂಟಿ ಎಲ್ಲಿಯೂ ಹೊರಗೆ ಕಾಣಿಸಿಕೊಂಡಿಲ್ಲ. ಏಂಟು ತಿಂಗಳು ಕಾಲ ಮಮ್ಮೂಟಿ ಸಾರ್ವಜನಿಕರ ಮುಂದೆ ಬಂದಿಲ್ಲ. ಕನಿಷ್ಠ ಅವರ ಫೋಟೋ ಸಹ ಬಹಿರಂಗವಾಗಿರಲಿಲ್ಲ.

ಇದೀಗ, ಸುಮಾರು 275 ದಿನಗಳ ಬಳಿಕ ಮಮ್ಮೂಟಿ ಮೊದಲ ಸಲ ಕ್ಯಾಮೆರಾ ಕಣ್ಣಿಗೆ ಬಿದ್ದಿದ್ದಾರೆ. ಬಹಳ ದಿನಗಳ ನಂತರ ಕಾಣಿಸಿಕೊಂಡ ಮಮ್ಮೂಟಿ ಅವರ ಲುಕ್ ಈಗ ಸಾಮಾಜಿಕ ಜಾಲತಾಣದಲ್ಲಿ ಟಾಕ್ ಆಫ್ ದಿನ ಟೌನ್ ಆಗಿದೆ.

ಕೊಚ್ಚಿಯ ತಮ್ಮ ಮೂಲ ನಿವಾಸದಲ್ಲಿ 275ಕ್ಕೂ ಅಧಿಕ ದಿನಗಳು ಕ್ವಾರಂಟೈನ್ ಆಗಿದ್ದರು. ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚು ಸಕ್ರಿಯರಾಗಿದ್ದ ಮಮ್ಮೂಟಿ ಅಪರೂಪದ ದಾಖಲೆ ಬರೆಯಲು ಮುಂದಾಗಿದ್ದಾರೆ. ಅತಿ ಹೆಚ್ಚು ದಿನ ಮನೆಯಲ್ಲಿ ಉಳಿಯುವ ಮೂಲಕ ಸೂಪರ್ ಸ್ಟಾರ್ ರೆಕಾರ್ಡ್ ಮಾಡಿದ್ದಾರೆ ಎನ್ನಲಾಗಿದೆ.

ಗಡ್ಡ ಬಿಟ್ಟು, ಮುಖಕ್ಕೆ ಮಾಸ್ಕ್ ಹಾಕಿಕೊಂಡು ಸ್ಟೈಲ್ ಆಗಿ ಕಾಣಿಸಿಕೊಂಡಿರುವ ಮಮ್ಮೂಟಿ ಫೋಟೋಗಳು ಈಗ ಟ್ರೆಂಡ್ ಆಗ್ತಿದೆ. ಮೂಲಗಳ ಪ್ರಕಾರ ಜಾಹೀರಾತು ಚಿತ್ರೀಕರಣದಲ್ಲಿ ಮಮ್ಮೂಟಿ ಭಾಗಿಯಾಗಿದ್ದಾರೆ ಎನ್ನಲಾಗಿದೆ.

ಅಮಲ್ ನೀರಾದ್ ನಿರ್ದೇಶನದ 'ಬಿಲಾಲ್' ಚಿತ್ರದಲ್ಲಿ ಮಮ್ಮೂಟಿ ನಟಿಸುತ್ತಿದ್ದು, ಈ ಚಿತ್ರ ಭಾರಿ ನಿರೀಕ್ಷೆ ಹುಟ್ಟಿಹಾಕಿದೆ. ಇದಕ್ಕೂ ಮುಂಚೆ ಅಮಲ್ ನೀರಾದ್ ನಿರ್ದೇಶನದಲ್ಲಿ ಇನ್ನೊಂದು ಪ್ರಾಜೆಕ್ಟ್ ಕೈಗೆತ್ತಿಕೊಳ್ಳುವ ಸಾಧ್ಯತೆ ಇದೆ.

ಮತ್ತೊಂದೆಡೆ ಸಿಬಿಐ 5 ಸಿನಿಮಾದಲ್ಲೂ ಮಮ್ಮೂಟಿ ಅಭಿನಯಿಸಲಿದ್ದಾರೆ. ಇನ್ನು ಮಮ್ಮೂಟಿ ನಟನೆಯ 'ಒನ್' ಚಿತ್ರದ ಬಿಡುಗಡೆಗೆ ಸಜ್ಜಾಗಿದೆ. ಸಂತೋಷ್ ವಿಶ್ವನಾಥ್ ಈ ಚಿತ್ರ ನಿರ್ದೇಶಿಸಿದ್ದಾರೆ.