ತಾಜಾ ಅನುಭವದ 'ಫೇರ್ ಅಂಡ್ ಲವ್ಲಿ' ಹಾಡುಗಳು

ಖಂಡಿತ ಕಾಡುವಂತಹ ಹಾಡಿದು

ಮೊದಲನೇಯ ಹಾಡು ನಿರ್ದೇಶಕ ಎ.ಪಿ.ಅರ್ಜುನ್ ರ ಬಿಲ್ಲಿಂದ ಹೊರಟು ಬಂದಿರೋ ಸಾಹಿತ್ಯದ ಬಾಣ 'ರಿಂಗಾಗಿದೆ'ಗೆ ಸೋನು ನಿಗಮ್ ಗುರಿ (ಧ್ವನಿ)ಯಾಗಿದ್ದಾರೆ. ಇತ್ತೀಚಿನ ಬಾಲಿವುಡ್ ಅಂಗಳದಲ್ಲಿ ಕಂಡುಬರುವ ಸೂಫಿ ಶೈಲಿಯಲ್ಲಿ ಇದು ಅರಳಿದ್ದರೂ ಖಂಡಿತ ಕಾಡುವಂತ ಹಾಡಾಗಿದೆ.

ಮಾಯಾನಾ ಕೇಳಿದಷ್ಟು ಮಾಯಾ

ಎರಡನೇಯ ಹಾಡು ಪ್ರೇಮಿಕವಿ ಕವಿರಾಜ್ 'ಮಾಯಾ' (ಸಾಹಿತ್ಯ)ಗೆ ಸಂತೋಷ್ ವೆಂಕಿ ಮರುಳು ಮಾಡುವ ಗಾಯನ ಜೊತೆಯಾಗಿದೆ. ಮಾಯಾಮಾಯಾಮಾಯಾ ಎಂದು ಶುರುವಾಗುವ ಮಾಯಾನಾ ಕೇಳಿದಷ್ಟು ಮಾಯಾ ಅಷ್ಟೆ ಹೊರತು ಪದೇ ಪದೇ ಕೇಳಬೇಕೆಂಬ ಮಾಯೆ ಮಾತ್ರ ಸಾಹಿತ್ಯದಲ್ಲಿ-ಸಂಗೀತದಲ್ಲಿ ಮರೆಯಾಗಿ ಮಾಯಾದ ಅಬ್ಬರ ಮಾತ್ರ ಉಳಿದುಬಿಟ್ಟಿದೆ.

ಕಂಗ್ಲೀಷ್ ಹಾಡುಗಳು ಸಾಲಿಗೆ ಮತ್ತೊಂದು

ಇನ್ನು ಮೂರನೇಯ ಹಾಡು ರೇಖ ಮೋಹನ್ ರ "ಅನಿರೀಕ್ಷಿತ" ಸಾಹಿತ್ಯಕ್ಕೆ ರಂಜಿತ್ ನಿರೀಕ್ಷಿತ ಗಾಯನ ಜೊತೆಯಾಗಿದೆ. ಇದು ಕನ್ನಡದ ಕಂಗ್ಲೀಷ್ ಹಾಡುಗಳು ಸಾಲಿಗೆ ಮತ್ತೊಂದು ಸೇರ್ಪಡೆ ಅಷ್ಟೆ. ಈ ಅನಿರೀಕ್ಷಿತ ಹಾಡೇ ಫೇರ್ ಅಂಡ್ ಲವ್ಲಿಯ ಟೈಟಲ್ ಸಾಂಗ್ ಕೂಡ ಆಗಿದ್ದರೂ ಅತ್ತ ಫೇರ್ ಆಗದೇ ಇತ್ತ ಲವ್ಲಿನೂ ಆಗದೇ ಸಾಹಿತ್ಯ-ಸಂಗೀತ ಎರಡು ಸೊರಗಿವೆ.

ಹಾಡಿನಲ್ಲಿ ತಾಜಾತನವಿದೆ, ಆದರೆ...

"ಹಾಗೆ ಒಂದು ಮಾತು ಹೇಳುವೆ" ವಿ.ಹರಿಕೃಷ್ಣರ ಸಾಹಿತ್ಯವಿರುವ ಈ ಹಾಡು ಸೋನು ನಿಗಮ್ ಧ್ವನಿಯಲ್ಲಿ ಕೇಳುವ ಮೊದಲೇ ಶಾರೂ
ಖ್ ಖಾನ್-ಜೂಹಿಚಾವ್ಲಾ ಅಭಿನಯದ "ಯಸ್ ಬಾಸ್'ನ "ಜಮೀಕೂ ಅಸುಮಾ ಬನಾದೂ..." ನೆಪದಾದರೆ ನಿಮ್ಮ ತಪ್ಪೇನಿಲ್ಲ ಬಿಡಿ. ಹಾಡಿನಲ್ಲಿ ತಾಜಾತನವಿದ್ದರೂ ಈ ಹಾಡಿನ ಬಗ್ಗೆ ವಿಶೇಷವಾಗಿ ಏನೇ ಹೇಳಲು ಹೋದರೂ ಯಾಕೋ ಟ್ಯೂನ್ ಮಾತ್ರ ಏನು ಹೇಳಬೇಡ ಅಂತಿದೆ.

ವಿರಾಗದ ಸರಾಗದ ಪ್ಯಾಥೋ ಹಾಡು

"ಈ ಕಾಣದ..." ಆನಂದ್ ಪ್ರಿಯ ಸಾಹಿತ್ಯಕ್ಕೆ ವಿ. ಹರಿಕೃಷ್ಣ ಕಾಣುವಂತೆಯೆ ಧ್ವನಿ ನೀಡಿದ್ದಾರೆ. ದೇಸಿತನಕ್ಕೆ ಒತ್ತು ನೀಡಿ ಟ್ಯೂನ್ ಮಾಡಿರೋ ಈ ಫ್ಯಾಥೋ ವಿರಾಗದ ಸರಾಗದ ಭಾವದಲ್ಲಿ ಮೂಡಿಬಂದಿದೆ. ಮೊದಲನೆಯ ಪಲ್ಲವಿ ಪ್ರೀತಿಗಿಂತ ತಾಯಿಯಿಲ್ಲ-ತಂದೆಯಿಲ್ಲ ಅಂತೇಳಿ ಪ್ರೀತಿಯ ವೈಭವಕ್ಕೆ ಸಾಕ್ಷಿಯಾದರೆ ಎರಡನೆ ಪಲ್ಲವಿ ಬದುಕು ಜಟಾಇಕಾಬಂಡಿ, ಬದುಕು ಇರೋದು ಮೂರೇ ದಿವಸವೆಂಬ ವೈರಾಗ್ಯದಲ್ಲಿ ಬೆಂದು ನೊಂದಿದೆ. ಆದರೂ ಯಾಕೋ ಸಾಹಿತ್ಯದಲ್ಲಿ ಕಾಡುವ ಗುಣವಿಲ್ಲ.

ಯಾಕೋ ಏನೋ ಫೀಲ್ ಮಿಸ್ ಆಗಿದೆ

"ಹಾಗೆ ಒಂದು ಮಾತು ಹೇಳುವೆ" ಸೋನುನಿಗಮ್ ಸೋಲೋ ಹಾಡೇ ಸಿಡಿಯಲ್ಲಿರುವ ಕೊನೆಯ ಹಾಡಾಗಿ ವಿಜಯ್ ರಾಘವೇಂದ್ರ, ವಿಜಯಾ ಶಂಕರ್ ಧ್ವನಿಯಲ್ಲಿ ಡ್ಯೂಯಟಾಗಿ ಕೇಳಿಬಂದಿದೆ. ಮೇಲ್ ವಾಯಿಸ್ ಡಾಮಿನೇಟ್ ಆಗಿರೋ ಇಲ್ಲಿ ಯಾಕೋ ಫೀಮೇಲ್ ಫೀಲ್ ಮಿಸ್ಸಾಗಿದೆ. ಒಟ್ಟಾರೆ ರಿಂಗಾಗಿದೆಯಿಂದ ನಿರೀಕ್ಷೆ ಹುಟ್ಟಿಸುವ ಫೇರ್ ಅಂಡ್ ಲವ್ಲಿಯ ಹಾಡುಗಳು ಅದೇ ಜೋಶನ್ನು ಉಳಿದ ಹಾಡಗಳಲ್ಲಿ ಮಾತ್ರ ಉಳಿಸಿಕೊಳ್ಳಲು ವಿಫಲವಾಗಿದೆ.