'ಮಾಸ್ ಲೀಡರ್'ಗಾಗಿ ಒಂದಾದ ಸ್ಯಾಂಡಲ್ ವುಡ್ ತಾರೆಯರು

ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅಭಿನಯದ 'ಮಾಸ್​ ಲೀಡರ್' ಆಗಸ್ಟ್ 11ರಂದು ರಾಜ್ಯಾದ್ಯಂತ ರಿಲೀಸ್​ ಆಗುತ್ತಿದೆ. ಇದೊಂದು ದೇಶಪ್ರೇಮದ ಕಥೆಯಾಗಿದ್ದು, ಚಿತ್ರದಲ್ಲಿ ಶಿವಣ್ಣ ಆರ್ಮಿ ಆಫೀಸರ್ ಆಗಿ ಘರ್ಜಿಸಲಿದ್ದಾರೆ.

ಇದೇ ವಾರ ಬಿಗ್ ಸ್ಕ್ರೀನ್ ಮೇಲೆ ರಾರಾಜಿಸಲಿರುವ 'ಮಾಸ್ ಲೀಡರ್' ಈಗೊಂದು ಪ್ರಮೋಷನಲ್ ಹಾಡನ್ನ ಬಿಡುಗಡೆ ಮಾಡಿದೆ. ಈ ಹಾಡಿನಲ್ಲಿ ನಟ ಶಿವರಾಜ್ ಕುಮಾರ್ ಜೊತೆ ಸ್ಯಾಂಡಲ್ ವುಡ್ ನ ಹಲವು ತಾರೆಯರು ಕಾಣಿಸಿಕೊಂಡಿದ್ದಾರೆ.

ದೇಶಪ್ರೇಮದ ಕುರಿತಾಗಿದೆ ಮೂಡಿ ಬಂದಿರುವ 'ಈ ಮಣ್ಣಿನಲ್ಲಿ.......' ಎಂಬ ಸಾಲುಗಳಿಗೆ ವಿ ನಾಗೇಂದ್ರ ಪ್ರಸಾದ್​ ಅವರು ಸಾಹಿತ್ಯ ಬರೆದಿದ್ದು, ವೀರ ಸಮರ್ಥ ಸಂಗೀತ ನೀಡಿದ್ದಾರೆ. ಇನ್ನು ಪ್ರಮೋಷನಲ್ ಹಾಡಿನಲ್ಲಿ ಶಿವರಾಜ್ ಕುಮಾರ್, ಪುನೀತ್​ ರಾಜ್ ಕುಮಾರ್​, ಜಗ್ಗೇಶ್​, ಶರಣ್, ರಾಗಿಣಿ, ಆಶಿಕ ರಂಗನಾಥ್, ನೆನಪಿರಲಿ ಪ್ರೇಮ್​, ಶ್ರೀ ಮುರುಳಿ, ವಿಜಯ ರಾಘವೇಂದ್ರ, ಪ್ರೀಯಾಂಕ ಉಪೇಂದ್ರ ತೆರೆ ಹಂಚಿಕೊಂಡಿದ್ದಾರೆ.

ನರಸಿಂಹ ಅವರು ಈ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದು, ಜೋಗಿ ಪ್ರೇಮ್, ಚಿಂತನ್ ವಿಕಾಸ್, ಗೋವಿಂದ ಕರ್ನೂಲ್ ಈ ಹಾಡಿಗೆ ದ್ವನಿಯಾಗಿದ್ದಾರೆ. ಇನ್ನು ಉಳಿದಂತೆ ಚಿತ್ರದಲ್ಲಿ ಶಿವರಾಜ್ ಕುಮಾರ್, ಪ್ರಣಿತಾ, ವಿಜಯ ರಾಘವೇಂದ್ರ, ಲೂಸ್ ಮಾದ ಯೋಗೀಶ್, ಗುರು ಜಗ್ಗೇಶ್, ಸೇರಿದಂತೆ ಹಲವರು ಅಭಿನಯಿಸಿದ್ದಾರೆ.