ತಾರೆಯರ 'ವಂದೇ ಮಾತರಂ' ಗೀತೆ ಅದ್ಭುತ: ಉಪ್ಪಿ, ದರ್ಶನ್, ಯಶ್ ಯಾಕಿಲ್ಲ?

ಸಾಧಕರು ಇಷ್ಟೇ ಜನನಾ?

'ವಂದೇ ಮಾತರಂ' ಗೀತೆ ಬಗ್ಗೆ ಬಹಳ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಆದರೆ ಸಾಧಕರು ಅಂದರೆ ಇಷ್ಟೇ ಜನನಾ ಅನ್ನುವ ಪ್ರಶ್ನೆಯನ್ನು ಕೆಲವರು ಎತ್ತಿದ್ದಾರೆ. ಉಳಿದ ಸಾಧಕರು ಯಾಕಿಲ್ಲ. ಸಿನಿಮಾರಂಗದ ನಾಯಕರೇ ಹಾಡಿನಲ್ಲಿ ಹೆಚ್ಚಾಗಿ ಕಾಣಿಸಿಕೊಂಡಿದ್ದಾರೆ. ನಟಿಯರು ಯಾರು ಚಿತ್ರರಂಗಕ್ಕೆ ಕೊಡುಗೆ ನೀಡಿಲ್ಲವೇ ಎನ್ನುವುದು ಇನ್ನೂ ಕೆಲವರ ಪ್ರಶ್ನೆ. ಎಲ್ಲಾ ಕ್ಷೇತ್ರಗಳ ಮತ್ತಷ್ಟು ಸಾಧಕರು ಹಾಡಿನಲ್ಲಿ ಇದ್ದಿದ್ದರೆ ಚೆನ್ನಾಗಿರುತ್ತಿತ್ತು ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಉಪ್ಪಿ, ದರ್ಶನ್, ಯಶ್ ಇಲ್ಲ!

ಚಿತ್ರರಂಗದ ನಟರನ್ನು ಬಳಸಿಕೊಂಡು 'ವಂದೇ ಮಾತರಂ' ಗೀತೆ ಕಟ್ಟಿಕೊಟ್ಟಿದ್ದೀವಿ. ಅಂದರೂ ಕೂಡ ಎಲ್ಲಾ ನಟರು ಕಾಣಿಸುತ್ತಿಲ್ಲವಲ್ಲ. ಉಪೇಂದ್ರ, ದರ್ಶನ್‌, ಯಶ್‌, ರಕ್ಷಿತ್‌ ಶೆಟ್ಟಿರಂತಹ ಸ್ಟಾರ್‌ಗಳೇ ಹಾಡಿನಲ್ಲಿ ಇಲ್ಲ ಎಂದು ಅಭಿಮಾನಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ. ಇನ್ನು ದುನಿಯಾ ವಿಜಿ, ಲವ್ಲಿಸ್ಟಾರ್ ಪ್ರೇಮ್, ನೀನಾಸಂ ಸತೀಶ್, ಪ್ರಜ್ವಲ್ ದೇವರಾಜ್‌ ಸೇರಿದಂತೆ ಬಹುತೇಕ ನಟರು ಹಾಡಿನಲ್ಲಿ ಇಲ್ಲ. ಹಾಡಿಗಾಗಿ ಇವರನ್ನೆಲ್ಲಾ ಸಂಪರ್ಕಿಸಿಲ್ವಾ ಅಥವ ಇವರು ಯಾರೂ, ಒಪ್ಪಲಿಲ್ವಾ? ಅನ್ನುವ ಚರ್ಚೆ ನಡೀತಿದೆ.

ಅಪ್ಪುನ ಮಿಸ್‌ ಮಾಡಿಕೊಂಡ ಫ್ಯಾನ್ಸ್!

ನೆಲ, ಜಲ, ಭಾಷೆ, ದೇಶ ಅಂದಾಕ್ಷಣ ಪುನೀತ್‌ ರಾಜ್‌ಕುಮಾರ್ ಸದಾ ಮುಂದೆ ನಿಲ್ಲುತ್ತಿದ್ದರು. ಅಪ್ಪು ಇದ್ದಿದ್ದರೇ ಹಾಡಿನ ಆರಂಭದಲ್ಲಿ ಅವರೇ ಕಾಣಿಸಿಕೊಳ್ಳಬೇಕಿತ್ತು. ಆದರೆ ವಿಧಿಯಾಟ, ಅಪ್ಪು ಇಂದು ನಮ್ಮೊಂದಿಗಿಲ್ಲ. ಸಾಧಕರ 'ವಂದೇ ಮಾತರಂ' ಗೀತೆಯಲ್ಲಿ ಪವರ್‌ ಸ್ಟಾರ್‌ನ ಅಭಿಮಾನಿಗಳು ಬಹಳ ಮಿಸ್ ಮಾಡಿಕೊಳ್ಳುತ್ತಿದ್ದಾರೆ. ಕೊನೆ ಪಕ್ಷ ಅವರ ಒಂದು ಫೋಟೊವನ್ನಾದರೂ ತೋರಿಸಬಹುದಿತ್ತು. ಸಂಪೂರ್ಣವಾಗಿ ಅಪ್ಪುನ ಮರೆತಿದ್ದಾರೆ ಅಂತ ಕೆಲವರು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ.

'ವಂದೇ ಮಾತರಂ' ಗೀತೆಗೆ ಸಂತು ಸಾರಥ್ಯ

ಸೂಪರ್ ಹಿಟ್ ಸಿನಿಮಾಗಳ ಸರದಾರ ಸಂತೋಷ್ ಆನಂದ್‌ರಾಮ್ ನಿರ್ದೇಶನದಲ್ಲಿ 'ವಂದೇ ಮಾತರಂ' ಗೀತೆ ನಿರ್ಮಾಣವಾಗಿದೆ. ಬಹಳ ಸೊಗಸಾಗಿ ಹಾಡಿನಲ್ಲಿ ದೇಶಭಕ್ತಿ ಭಾವವನ್ನು ಸೆರೆ ಹಿಡಿಯಲಾಗಿದೆ. ಪ್ರವೀಣ್ ಡಿ. ರಾವ್ ಸಂಗೀತ, ಶ್ರೀಶ ಕುದುವಲ್ಲಿ ಛಾಯಾಗ್ರಹಣ ಹಾಡಿಗಿದೆ. ಸ್ವತಃ ನಟ, ರಾಜ್ಯಸಭಾ ಸದಸ್ಯ ಜಗ್ಗೇಶ್ ಈ ಹಾಡನ್ನು ನಿರ್ಮಾಣ ಮಾಡಿರುವುದು ವಿಶೇಷ.