ಏಪ್ರಿಲ್ 12ಕ್ಕೆ ಅಣ್ಣಾವ್ರ ಸುಪ್ರಭಾತ ಬಿಡುಗಡೆ

ಮುತ್ತುರಾಜನಾಗಿ ಬೆಳ್ಳಿಪರದೆಗೆ ಪರಿಚಿತನಾದ ನಟ. ದಶಕಗಳ ಕಾಲ ಕನ್ನಡಿಗರ ಪಾಲಿನ ಆರಾಧ್ಯದೈವನಾಗಿ ಬೆಳೆದ ಮಹಾನ್ ಚೇತನ. ಕನ್ನಡ ಕಲಾಲೋಕ ಎಂದಿಗೂ ಮರೆಯದ ಮಾಣಿಕ್ಯ 'ನಟಸಾರ್ವಭೌಮ' ಡಾ.ರಾಜ್ ಕುಮಾರ್.

ಡಾ.ರಾಜ್ ನಮ್ಮನ್ನಗಲಿ 9 ವರ್ಷ ಕಳೆದರೂ, ಕನ್ನಡಿಗರ ಹೃದಯ ಸಿಂಹಾಸನದಲ್ಲಿ ಅಣ್ಣಾವ್ರು ಸದಾ ಚಿರಾಯು. ಅದಕ್ಕೆ ಉದಾಹರಣೆ ಇತ್ತೀಚೆಗೆ ಬಿಡುಗಡೆಯಾದ 'ಕಸ್ತೂರಿ ನಿವಾಸ' ಚಿತ್ರದ ಅಭೂತಪೂರ್ವ ಯಶಸ್ಸು.

ಇದೇ ಏಪ್ರಿಲ್ 12 ರಂದು ಡಾ.ರಾಜ್ ರವರ 9 ನೇ ವರ್ಷದ ಪುಣ್ಯತಿಥಿ. ಇದರ ಪ್ರಯುಕ್ತ ಅಣ್ಣಾವ್ರ ಮೇಲೆ ಸಿದ್ದವಾಗಿರುವ ಸುಪ್ರಭಾತ ಸಿ.ಡಿ ಬಿಡುಗಡೆಯಾಗಲಿದೆ. 27 ನಿಮಿಷದ ಈ ಸುಪ್ರಭಾತವು 18 ವಿವಿಧ ರಾಗಗಳಲ್ಲಿ ಮೂಡಿ ಬರಲಿದೆ.

ಡಾ.ರಾಜ್ ಸುಪ್ರಭಾತಕ್ಕೆ ಅಜಯ್ ವಾರಿಯರ್ ದನಿಯಾಗಿದ್ದು, ಎಲ್.ಎನ್.ಗೂಚಿ ಸಂಗೀತ ನೀಡಿದ್ದಾರೆ. ಚಿತ್ರದುರ್ಗದ ಕನ್ನಡ ಪ್ರಾಧ್ಯಾಪಕ ಕೃಷ್ಣಮೂರ್ತಿ ಈ ಸುಪ್ರಭಾತವನ್ನು ರಚಿಸಿದ್ದು, ಲಹರಿ ಆಡಿಯೋ ಸಂಸ್ಥೆ ಏಪ್ರಿಲ್ 12 ರಂದು ಬಿಡುಗಡೆ ಮಾಡಲಿದೆ. [ನಾವು ನೀವು ಅರಿಯದ ರಾಜ್ ಅಪರೂಪದ ಸಂಗತಿಗಳು]

ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಚಿತ್ರನಟರೊಬ್ಬರ ಮೇಲೆ ಸುಪ್ರಭಾತ ತಯಾರಾಗಿರುವುದು ಇದೇ ಮೊದಲು. ಅಂತಹ ವಿನೂತನ ಗೌರವಕ್ಕೆ ಪಾತ್ರರಾಗಿದ್ದಾರೆ ಅಪ್ಪಾಜಿ. ಅಲ್ಲಿಗೆ, ಏಪ್ರಿಲ್ 12 ರಿಂದ ಮುಂಜಾನೆ ಎದ್ದ ತಕ್ಷಣ ಅಣ್ಣಾವ್ರ ಅಭಿಮಾನಿಗಳ ಬಾಯಲ್ಲಿ ರಾಜಣ್ಣನದ್ದೇ ಗುಣಗಾನ. (ಫಿಲ್ಮಿಬೀಟ್ ಕನ್ನಡ)