ತೆರೆಮರೆಗೆ ಸರಿದ ಖ್ಯಾತ ಸಿನಿಮಾ ತಾರೆ ಸುಜಾತಾ

ಅನಾರೋಗ್ಯದ ಕಾರಣ ಕಳೆದ ಐದು ವರ್ಷಗಳಿಂದ ಅವರು ಚಿತ್ರರಂಗದಿಂದ ದೂರ ಉಳಿದಿದ್ದರು. ಕಿಡ್ನಿ ವೈಫಲ್ಯದಿಂದ ಬಳಲುತ್ತಿದ್ದ ಅವರು ಡಯಾಲಿಸಿಸ್ ಚಿಕಿತ್ಸೆ ಪಡೆಯುತ್ತಿದ್ದರು. ಕಳೆದ ತಿಂಗಳು ಹೃದಯಕ್ಕೆ ಪೇಸ್ ಮೇಕರ್ ಅಳವಡಿಸುವ ಚಿಕಿತ್ಸೆಗೆ ಸುಜಾತಾ ಒಳಗಾಗಿದ್ದರು. ಅವರು ಪತಿ ಜಯಕರ್ ಹಾಗೂ ಮಕ್ಕಳಾದ ಸಜಿತ್ ಮತ್ತ್ತು ದಿವ್ಯಾ ಅವರನ್ನು ಅಗಲಿದ್ದಾರೆ.ಇಂದು (ಏ.7) ಅವರ ಅಂತ್ಯಕ್ರಿಯೆ ನಡೆಯಲಿವೆ.

ಎಪ್ಪತ್ತು ಹಾಗೂ ಎಂಬತ್ತರ ದಶಕದಲ್ಲಿ ಸುಜಾತಾ ತಮ್ಮ ಚಿತ್ರಗಳ ಮೂಲಕ ಹೊಸ ಅಲೆ ಎಬ್ಬಿಸಿದ್ದರು. ಖ್ಯಾತ ನಿರ್ದೇಶಕ ಕೆ ಬಾಲಚಂದರ್ ಅವರು ತಮಿಳು ಚಿತ್ರ 'ಅವಳ್ ಒರು ತೊಡರ್ ಕಥೈ' ಚಿತ್ರದ ಮೂಲಕ ಸುಜಾತಾ ಅವರನ್ನು ಬೆಳ್ಳಿತೆರೆಗೆ ಪರಿಚಯಿಸಿದ್ದರು. ಸರಿಸುಮಾರು ಸುತಾಜಾ ಅವರು 300 ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಕನ್ನಡದಲ್ಲಿ ವಿಷ್ಣುವರ್ಧನ್, ಅನಂತನಾಗ್, ಲೋಕೇಶ್, ಮುಂತಾದವರೊಂದಿಗೆ ಸುಜಾತಾ ಅವರು ಕನ್ನಡ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ತುತ್ತಾ ಮುತ್ತಾ, ನೀಲಕಂಠ, ಪ್ರೇಮ ಸಾಕ್ಷಿ, ನನ್ನ ದೇವರು ಚಿತ್ರಗಳಲ್ಲಿ ಸುಜಾತಾ ಪೋಷಕ ಪಾತ್ರದಲ್ಲಿ ಅಭಿನಯಿಸಿದ್ದರು. ಪಾತ್ರ ಎಂಥಹದ್ದೇ ಆಗಿರಲಿ ಸುಜಾತಾ ಅದಕ್ಕೆ ಜೀವ ತುಂಬುತ್ತಿದ್ದರು.