ಇಸ್ಪೀಟ್ ಆಡುತ್ತಿದ್ದ ಸಿನಿಮಾ ನಟನ ತಂದೆ ಬಂಧನ

ಮಕ್ಕಳು ಏನಾದರೂ ತಪ್ಪು ಮಾಡಿದರೆ ತಂದೆ ತಾಯಿಯರಿಗೆ ಕೆಟ್ಟ ಹೆಸರು ಬರುತ್ತದೆ.ಎಂಥಾ ಮಕ್ಕಳನ್ನು ಹೆತ್ತರಪ್ಪಾ ಎಂದು ಜನ ಆಡಿಕೊಳ್ಳುತ್ತಾರೆ. ಆದರೆ ಇದಕ್ಕೆ ವಿಭಿನ್ನವಾದ ಘಟನೆಯೊಂದು ಆಂಧ್ರಪ್ರದೇಶದಲ್ಲಿ ನಡೆದಿದೆ. ಮಾಸ್ ಮಹಾರಾಜ್ ಎಂದೇ ಜನಪ್ರಿಯನಾದ ನಟ ರವಿತೇಜ ಅವರ ತಂದೆ ಇಸ್ಪೀಟ್ ಆಡಿ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾನೆ. ಅಪ್ಪನಿಂದ ಮಗನಿಗೆ ಕೆಟ್ಟ ಹೆಸರು ಬಂದಂತಾಗಿದೆ.

ಈ ಹಿಂದೆ ರವಿತೇಜ ಅವರ ಸಹೋದರರಾದ ರಘು ಬಾಬು ಮತ್ತು ಭರತ್ ನಿಷೇಧಿತ ಡ್ರಗ್ಸ್ ಖರೀದಿಸಿ ಪೊಲೀಸರಿಗೆ ಸಿಕ್ಕಿಬಿದ್ದಿದ್ದರು. ಈಗ ರವಿತೇಜ ಅವರ ತಂದೆ ಭೂಪತಿ ರಾಜು(70) ಹೈದರಾಬಾದ್‌ನ ಗೋಲ್ಡನ್ ಕ್ಲಬ್‌ನಲ್ಲಿ ಇಸ್ಪ್ಪೀಟ್ ಆಡುತ್ತಿರಬೇಕಾದರೆ ಪೊಲೀಸರು ಬಂಧಿಸಿದ್ದಾರೆ. ಇವರ ಜೊತೆಗೆ ಒಟ್ಟು 46 ಮಂದಿ ರೆಡ್ ಹ್ಯಾಂಡೆಡ್ ಆಗಿ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾರೆ.

ಆಂಧ್ರ ಪ್ರದೇಶದ ಕ್ರೀಡಾ ಕಾಯಿದೆ ಉಲ್ಲಂಘಿಸಿ ಇವರು ಇಸ್ಪೀಟ್ ಆಡುತ್ತಿದ್ದರು. ಹಾಗಾಗಿ ಇವರನ್ನು ಬಂಧಿಸಿರುವುದಾಗಿ ಸಹಾಯಕ ಪೊಲೀಸ್ ಕಮೀಷನರ್ ಜಿ ಪಿ ವಾಸುಸೇನ ಅವರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಇವರೆಲ್ಲಾ ಕ್ಲಬ್‌ನಲ್ಲಿ ಅಕ್ರಮವಾಗಿ ಇಸ್ಪೀಟ್ ಆಡುತ್ತಿದ್ದರು ಎನ್ನಲಾಗಿದೆ. ಒಟ್ಟು ರು. 38,350 ನಗದನ್ನು ಜಪ್ತಿ ಮಾಡಲಾಗಿದೆ. ಇವರೆಲ್ಲರನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸುವುದಾಗಿ ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)