'ಜೋಗಿ' ನಾಯಕಿ ಜೆನ್ನಿಫರ್ ಕೊತ್ವಾಲ್ ಎಲ್ಲಿ?

ಅಮೃತಕನ್ನಡದ ಸಾರ್ವಕಾಲಿಕ ಸೂಪರ್‌ಹಿಟ್ ಚಿತ್ರಗಳಲ್ಲಿ ಒಂದಾದ 'ಜೋಗಿ'ಯ ನಾಯಕಿ ಜೆನ್ನಿಫರ್ ಕೊತ್ವಾಲ್ ಎಲ್ಲಿ ಹೋದಳು? ಸಿನಿಮಾಗಳಲ್ಲಿ ಇರಲಿ, ಜೋಸ್ಕೋ ಆಭರಣ ಮಳಿಗೆ ಜಾಹಿರಾತುಗಳಿಂದಲೂ ಆಕೆ ನಾಪತ್ತೆಯಾಗಿದ್ದಾಳೆ. ಜೆನ್ನಿ ಕಾಲ ಮುಗಿಯಿತಾ? ಈ ಪ್ರಶ್ನೆಗೆ ಉತ್ತರವೆನ್ನುವಂತೆ ಜೆನ್ನಿ ಮರಳಿ ಗಾಂಧಿನಗರದಲ್ಲಿ ಕಾಣಿಸಿಕೊಂಡಿದ್ದಾಳೆ.

ಬಿಸಿಲೆ ಚಿತ್ರದ ಸುದ್ದಿಗೋಷ್ಠಿಯಲ್ಲಿ ಮಾತಿಗೆ ಸಿಕ್ಕ ಜೆನ್ನಿ- ಹೊರರಾಜ್ಯಗಳಲ್ಲಿ ತಾವು ಕನ್ನಡ ಚಿತ್ರರಂಗದ ಪ್ರತಿನಿಧಿ ಎಂದರು. ಇದೇನಿದು ತಮಾಷೆಯ ಮಾತು! ನಾನು ನಿಜವನ್ನೇ ಹೇಳುತ್ತಿದ್ದೇನೆ ಎನ್ನುವುದಕ್ಕೆ ಜೆನ್ನಿ ಹೇಳಿದ್ದು ಕೆಳಗಿನ ಕಥೆ: ಹೈದರಾಬಾದ್‌ನಲ್ಲೊಂದು ದಕ್ಷಿಣ ಭಾರತ ಚಿತ್ರರಂಗವನ್ನು ಪ್ರತಿನಿಧಿಸುವ ಸಿನಿಮಾ ಕಾರ್ಯಕ್ರಮ. ಸೌತ್ ಸ್ಕೋಪ್ ಎನ್ನುವ ಸಿನಿಪತ್ರಿಕೆ ಏರ್ಪಡಿಸಿದ್ದ ಈ ಕಾರ್ಯಕ್ರಮದಲ್ಲಿ ದಕ್ಷಿಣಭಾರತದ ಕಲಾವಿದರು ಭಾಗವಹಿಸಿದ್ದರಂತೆ. ಸಿನಿಮಾ ಪತ್ರಿಕೆ ಕಾರ್ಯಕ್ರಮ ಎಂದಮೇಲೆ ಹಾಡುಕುಣಿತ ಇಲ್ಲದಿದ್ದರೆ ಹೇಗೆ?

ಈ ಹಬ್ಬದಲ್ಲಿ, ಜೆನ್ನಿಫರ್ ಜೋಗಿ ಚಿತ್ರದ ಜೋಗಯ್ಯ ಹಾಡಿಗೆ ಕುಣಿದರಂತೆ. ಈ ಹಾಡಿನ ಮೂಲಕ ನಾನು ಕನ್ನಡ ಚಿತ್ರರಂಗವನ್ನು ಪ್ರತಿನಿಧಿಸಿದ್ದೆ ಎಂದರು ಜೆನ್ನಿ. ಹಾಗೆನ್ನುವಾಗ ಆಕೆಯ ಮೊಗದಲ್ಲಿ ಹೆಮ್ಮೆ ತುಳುಕುತ್ತಿತ್ತು.ನನಗೆ ಆರೋಗ್ಯ ಚೆನ್ನಾಗಿರಲಿಲ್ಲ. ವಿಪರೀತ ಬೆನ್ನುನೋವು ಕಾಡುತ್ತಿತ್ತು. ಆದರೂ ಜೋಗಿ ಚಿತ್ರದ ಹಾಡಿಗೆ ಹುಮ್ಮಸ್ಸಿನಿಂದ ನರ್ತಿಸಿದೆ. ಆ ಗೀತೆಯೇ ಹಾಗಿದೆಯಲ್ಲ? ನೋಡಿದವರೆಲ್ಲ ನನ್ನ ನೃತ್ಯ ಚೆನ್ನಾಗಿ ಬಂತು ಎಂದು ಹೊಗಳಿದರು. ಇದಿಷ್ಟು ಜೆನ್ನಿ ಹೇಳಿದ ಕಥೆ.

ಸದ್ಯ ಎರಡು ಕನ್ನಡ ಚಿತ್ರಗಳಲ್ಲಿ ಜೆನ್ನಿಫರ್ ನಟಿಸುತ್ತಿದ್ದಾರೆ. ಮೊದಲನೆಯದು ಬಿಸಿಲೆ. ಸಂದೀಪ್ ನಿರ್ದೇಶಿಸುತ್ತಿರುವ ಈ ಚಿತ್ರದಲ್ಲಿ ಕಾರ್ಪೊರೇಟ್ ರಂಗುಗಳಿವೆಯಂತೆ. ಒಂದಷ್ಟು ಸಾಫ್ಟ್‌ವೇರ್ ಗೆಳೆಯರು ಒಟ್ಟಾಗಿ ಈ ಚಿತ್ರ ನಿರ್ಮಿಸುತ್ತಿರುವುದೇ ಕಾರ್ಪೊರೇಟ್ ಬಣ್ಣಗಳಿಗೆ ಕಾರಣ. ಬಿಸಿಲೆ ಚೆನ್ನಾಗಿ ಮೂಡಿಬಂದಿದೆ ಎನ್ನುವುದು ಜೆನ್ನಿ ಅನಿಸಿಕೆ.

ಜೆನ್ನಫರ್ ಅಭಿನಯದ ಮತ್ತೊಂದು ಕನ್ನಡ ಚಿತ್ರ ಎರಡನೇ ಹೆಂಡತಿ. ದಿನೇಶ್‌ಬಾಬು ನಿರ್ದೇಶನದ ಈ ಚಿತ್ರದ ಬಗೆಗೂ ಜೆನ್ನಿಗೆ ನಿರೀಕ್ಷೆಗಳಿವೆ. ಅನಂತನಾಗ್ ಹಾಗೂ ಸುಹಾಸಿನಿ ಮುಖ್ಯಪಾತ್ರಗಳಲ್ಲಿದ್ದರೂ ಚಿತ್ರದಲ್ಲಿ ನನಗೂ ಸಾಕಷ್ಟು ಅವಕಾಶವಿದೆ ಎಂದರು ಜೆನ್ನಿ. ಇವೆರಡೂ ಸಿನಿಮಾ ತೆರೆಕಂಡರೆ ಕನ್ನಡದಲ್ಲಿ ಮತ್ತಷ್ಟು ಅವಕಾಶ ಸಿಗಬಹುದು ಎನ್ನುವ ನಿರೀಕ್ಷೆ ಆಕೆಯದ್ದು.