ಲವ್ ಮಾಡಿದ ಕೃಷ್ಣನಿಗೆ ಅ.17ರಂದು ಮ್ಯಾರೇಜ್!

'ಕೃಷ್ಣನ್ ಲವ್ ಸ್ಟೋರಿ' ಶತಕ ಬಾರಿಸುತ್ತಿರುವಂತೆ ಅಜಯ್ ರಾವ್ ಅದೃಷ್ಟ ಖುಲಾಯಿಸಿದೆ. ಅಜಯ್ ರಾವ್ ಈಗ ಮ್ಯಾರೇಜ್‌ಗೆ ಸಿದ್ಧವಾಗಿದ್ದಾರೆ. ಯಾರ ಜೊತೆ ಅಂತೀರಾ? ಸದ್ಯಕ್ಕೆ ಈ ವಿಚಾರ ನಮಗೂ ಗೊತ್ತಿಲ್ಲ. ಆದರೆ ಅದು ನಿಜವಾದ ಮದುವೆಯಲ್ಲ. ತೆರೆಯ ಮೇಲಿನ 'ಕೃಷ್ಣನ್ ಮ್ಯಾರೇಜ್ ಸ್ಟೋರಿ'.

ಹೌದು ಅಜಯ್ ರಾವ್ ಅವರ ಮುಂದಿನ ಚಿತ್ರದ ಹೆಸರು 'ಕೃಷ್ಣನ್ ಮ್ಯಾರೇಜ್ ಸ್ಟೋರಿ'. ಈ ಚಿತ್ರ ಅಕ್ಟೋಬರ್ 17ರಂದು ಸೆಟ್ಟೇರಲಿದೆ. ಈ ಚಿತ್ರಕ್ಕೆ ಆರ್ ವಿಜಯ್ ಕುಮಾರ್ ಎಂಬ ಹೊಸಬರು ನಿರ್ಮಾಪಕರು. ನೂತನ್ ಉಮೇಶ್ ಎಂಬ ಹೊಸ ನಿರ್ದೇಶಕರ ಆಕ್ಷನ್, ಕಟ್ ಇರುತ್ತದೆ.

ಟ್ವಿಂಕಲ್ ಟ್ವಿಂಕಲ್ ಲಿಟ್ಲ್ ಸ್ಟಾರ್ ಕೃಷ್ಣ ಈಸ್ ಎ ಸೂಪರ್ ಸ್ಟಾರ್....ಎಂದು ಕೃಷ್ಣನ ಯಶಸ್ಸನ್ನು ಮುಕ್ತಕಂಠದಿಂದ ಸ್ವಾಗತಿಸುತ್ತಿರುವ ಹೊತ್ತಲೆ ಕೃಷ್ಣನಿಗೆ ಮ್ಯಾರೇಜ್ ಫಿಕ್ಸ್ ಆಗಿದೆ. ಅಂದಹಾಗೆ ಈ ಚಿತ್ರಕ್ಕೆ ಕಾರ್ಯಕಾರಿ ನಿರ್ಮಾಪಕರು ಮೋಹನ್ ಪೂಜಾರಿ. ಶ್ರೀಧರ್ ವಿ ಸಂಭ್ರಮ್ ಅವರ ಸಂಗೀತ, ಶೇಖರ್ ಚಂದ್ರ ಅವರ ಛಾಯಾಗ್ರಹಣ ಹಾಗೂ ಶ್ರೀ (ಕ್ರೇಜಿ ಮೈಂಡ್ಸ್) ಸಂಕಲನವಿರುತ್ತದೆ. ಉಳಿತ ತಾಂತ್ರಿಕ ಮತ್ತು ತಾರಾಬಳಗದ ಆಯ್ಕೆ ಪ್ರಕ್ರಿಯೆ ನಡೆಯಬೇಕಾಗಿದೆ.