ಪುನೀತ್ ಅಣ್ಣಾಬಾಂಡ್ ಬಿಡುಗಡೆ ಡೇಟ್ ಘೋಷಣೆ

ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅಭಿನಯದ 'ಅಣ್ಣಾ ಬಾಂಡ್' ಚಿತ್ರ ಯಾವಾಗ ಬಿಡುಗಡೆಯಾಗುತ್ತದೆ ಎಂಬ ದೌಟ್ ಕಡೆಗೂ ಬಗೆಹರಿದಿದೆ. ದುನಿಯಾ ಸೂರಿ ನಿರ್ದೇಶನದ ಈ ಚಿತ್ರ ಏಪ್ರಿಲ್ 19ಕ್ಕೆ ಬಿಡುಗಡೆಯಾಗುತ್ತದೋ ಅಥವಾ ಏಪ್ರಿಲ್ 26ಕ್ಕೋ ಎಂಬ ಅನುಮಾನ ಅವರ ಅಪಾರ ಅಭಿಮಾನಿ ಬಳಗದ ತಲೆ ಕೊರೆಯುತ್ತಿತ್ತು.

ಈಗ ಸ್ವತಃ ಚಿತ್ರತಂಡ 'ಅಣ್ಣಾ ಬಾಂಡ್' ಬಿಡುಗಡೆ ದಿನಾಂಕವನ್ನು ಘೋಷಿಸಿದೆ. ಈ ಚಿತ್ರ ಏ.24ಕ್ಕೆ ತೆರೆಗೆ ದಾಳಿ ಮಾಡುತ್ತಿರುವುದಾಗಿ ಸಾಮಾಜಿಕ ತಾಣ ಫೇಸ್‌ಬುಕ್‌ನಲ್ಲಿ ಬಹಿರಂಗಪಡಿಸಿದೆ. ಏ.24ರಂದು ವರನಟ ಡಾ.ರಾಜ್‌ಕುಮಾರ್ ಅವರ ಹುಟ್ಟುಹಬ್ಬ. ಅಭಿಮಾನಿಗಳಿಗೆ ಡಬಲ್ ಸಂಭ್ರಮ ಅಲ್ಲವೆ?

ಒನ್‌ಇಂಡಿಯಾ ಕನ್ನಡ ಸಿನಿ ಡೆಸ್ಕ್ ಈ ಹಿಂದೆಯೇ 'ಅಣ್ಣಾ ಬಾಂಡ್' ಬಿಡುಗಡೆ ಬಗ್ಗೆ ಸುಳಿವು ನೀಡಿತ್ತು. ಅಣ್ಣಾವ್ರ ಹುಟ್ಟುಹಬ್ಬಕ್ಕೆ ಅಣ್ಣಾ ಬಾಂಡ್ ತೆರೆಗೆ ಅಪ್ಪಳಿಸಲಿದೆ ಎಂದು ತಿಳಿಸಿದ್ದೆವು. ಈಗ ಆ ಸುದ್ದಿ ಅಧಿಕೃತವಾಗಿ ಘೋಷಣೆಯಾಗಿದೆ. ಚಿತ್ರದ ಸಂಕಲನ ಬಹುತೇಕ ಮುಗಿದಿದ್ದು, ಡಿಟಿಎಸ್ ಅಳವಡಿಕೆ ಹಾಗೂ ಗ್ರಾಫಿಕ್ಸ್ ಕೆಲಸ ಭರದಿಂದ ಸಾಗುತ್ತಿದೆ. (ಒನ್‍ಇಂಡಿಯಾ ಕನ್ನಡ)