ಸೈಲೆಂಟ್ ಶ್ರೀಮುರಳಿ ಈಗ ಮೋಸ್ಟ್ ವಾಂಟೆಡ್ ಸ್ಟಾರ್

ಸೈಲೆಂಟ್ ಸ್ಟಾರ್ ಶ್ರೀಮುರಳಿ ಈಗ ಸ್ಯಾಂಡಲ್ ವುಡ್ ನ ಮೋಸ್ಟ್ ವಾಟೆಂಡ್ ಸ್ಟಾರ್. ಅವರ 'ಉಗ್ರಂ' ಚಿತ್ರ ಶತದಿನೋತ್ಸವ ಆಚರಿಸಿಕೊಂಡಿದ್ದಷ್ಟೇ ಅಲ್ಲದೆ ಬಾಕ್ಸ್ ಆಫೀಸಲ್ಲೂ ಭರ್ಜರಿ ಬೆಳೆತೆಗೆಯಿತು. ಪರಭಾಷೆ ತಾರೆಗಳು ಈ ಚಿತ್ರವನ್ನು ರೀಮೇಕ್ ಮಾಡಲು ತುದಿಗಾಲಲ್ಲಿ ನಿಲ್ಲುವಂತಾಗಿದೆ.

ಶ್ರೀಮುರಳಿ ಮುಂದಿನ ಚಿತ್ರ ಯಾವುದು ಎಂಬ ಬಗ್ಗೆ ಈಗಲೇ ಚರ್ಚೆ ಶುರುವಾಗಿದೆ. ಮೂಲಗಳ ಪ್ರಕಾರ ಶ್ರೀಮುರಳಿ ಇನ್ನೂ ಯಾವ ಚಿತ್ರಕ್ಕೂ ಸಹಿ ಹಾಕಿಲ್ಲ. ಇದುವರೆಗೂ ಅವರು ಹಲವಾರು ಚಿತ್ರಕಥೆಗಳನ್ನು ಕೇಳಿದ್ದು ಒಂದಕ್ಕೂ ಓಕೆ ಮಾಡಿಲ್ಲವಂತೆ. [ಉಗ್ರಂ ಚಿತ್ರ ವಿಮರ್ಶೆ]

ಕನ್ನಡ ಚಿತ್ರರಂಗದಲ್ಲಿ ದಾಖಲೆ ಬರೆದು ಹೊಸ ಟ್ರೆಂಡ್ ಸೃಷ್ಟಿಸಿದ ಚಿತ್ರ ಉಗ್ರಂ. ಈ ಹಿನ್ನೆಲೆಯಲ್ಲಿ ಶ್ರೀಮುರಳಿ ತಮ್ಮ ಮುಂದಿನ ಚಿತ್ರ ಹೇಗಿರಬೇಕು ಎಂಬ ಬಗ್ಗೆ ಈಗಲೇ ಪಕ್ಕಾ ಪ್ಲಾನ್ ಹಾಕಿದ್ದಾರೆ. ಹಾಗಾಗಿ ಯಾವ ಸ್ಕ್ರಿಪ್ಟ್ ಅವರಿಗೆ ಓಕೆ ಆಗುತ್ತಿಲ್ಲ.

'ಉಗ್ರಂ' ಚಿತ್ರಕ್ಕಿಂತಲೂ ಭಿನ್ನವಾಗಿರುವ, ಅದಕ್ಕಿಂತಲೂ ಸೊಗಸಾದ ಕಥೆಯ ನಿರೀಕ್ಷೆಯಲ್ಲಿದ್ದಾರೆ. ಆದರೆ ಅವರ ನಿರೀಕ್ಷೆಯ ಕಥೆಗಳು ಬರುತ್ತಿಲ್ಲ. ಅದೇ ರೀತಿಯ, ಸವಕಲು ಕಥೆಗಳೇ ಬರುತ್ತಿವೆಯಂತೆ. ತಾನು ಮಾಡುವ ಪಾತ್ರದಲ್ಲಿ ಮೌಲ್ಯಯುತವಾದ ಅಂಶಗಳಿರಬೇಕು, ಅದು ಜನರ ಮನಸ್ಸಿಗೆ ನಾಟುವಂತಿರಬೇಕು ಎನ್ನುತ್ತಾರೆ. (ಏಜೆನ್ಸೀಸ್)