ಅನಂತ್ ನಾಗ್ ಜೀವನದಲ್ಲಿ 'ಹೊನ್ನಾವರ' ಅಮೂಲ್ಯವಾದ ಕ್ಷಣ ಯಾಕೆ.?

ನನ್ನ ಬಾಲ್ಯದ ನೆಚ್ಚಿನ ದಿನಗಳು ಹೊನ್ನಾವರ

'ನಾನು ಬಾಲ್ಯದಲ್ಲಿ ಕಳೆದ ಅತ್ಯಂತ ಇಷ್ಟವಾದ ಸ್ಥಳ ಹೊನ್ನಾವರ ಎಂದು ಅನಂತ್ ನಾಗ್ ಹೇಳಿಕೊಂಡಿದ್ದಾರೆ. ಹೊನ್ನಾವರದಲ್ಲಿ ಅನಂತ್ ನಾಗ್ 5ನೇ ತರಗತಿಯಿಂದ 8ನೇ ಕ್ಲಾಸ್ ವರೆಗೂ ಓದಿದ್ದರು. ತಮ್ಮ ತಂದೆಯಿದ್ದ ಸ್ಥಳದಿಂದ 16 ಮೈಲಿ ದೂರದಲ್ಲಿ ಉಳಿದುಕೊಂಡು ಅನಂತ್ ನಾಗ್ ಓದುತ್ತಿದ್ದರಂತೆ.

ಶಾಲೆಯಲ್ಲಿ ಟಾಪ್ 5ರಲ್ಲಿ ಇರುತ್ತಿದ್ದರು

ಹೊನ್ನಾವರದಲ್ಲಿ ಅನಂತ್ ನಾಗ್ ಓದುತ್ತಿದಿದ್ದು ಕನ್ನಡ ಮಾಧ್ಯಮದಲ್ಲಿ. ತರಗತಿಯಲ್ಲಿ ಯಾವಾಗಲೂ ಟಾಪ್ 5ರಲ್ಲಿ ಅನಂತ್ ಇರುತ್ತಿದ್ದರಂತೆ. 'ಎಸಿಸಿ ಮತ್ತು ಎನ್.ಸಿ.ಸಿ ಗೇ ಸೇರಿದ್ದ ನಾನು ಆಗಲೇ ತುಂಬಾ ಶಿಸ್ತು ಮತ್ತು ಶ್ರದ್ಧೆಯಿಂದ ಇದ್ದೆ. ದೇಶಭಕ್ತಿ, ಸಮಾಜಮುಖಿ ಕೆಲಸಗಳನ್ನ ರೂಢಿಸಿಕೊಂಡೆ. ಈ ವೇಳೆ ರಾಷ್ಟ್ರದ ಹಲವು ನಾಯಕರನ್ನ ನೋಡಲು ಮತ್ತು ಮಾತನಾಡಿಸಲು ಅವಕಾಶ ಸಿಕ್ಕಿತ್ತು. ಅದು ನನಗೆ ಸಿಕ್ಕ ಅಮೂಲ್ಯವಾದ ದಿನಗಳು'' ಎಂದು ಅನಂತ್ ನಾಗ್ ನೆನಪಿಸಿಕೊಂಡಿದ್ದಾರೆ.

ಮುಂಬೈಗೆ ಹೋದ ಮೇಲೆ

'ಅಲ್ಲಿಂದ ನಾನು ಮುಂಬೈಗೆ ಹೋದ ಮೇಲೆ ಸಂಪೂರ್ಣವಾಗಿ ಅಲ್ಲಿನ ಚಿತ್ರಣ ಬದಲಾಗಿತ್ತು. ಇಂಗ್ಲೀಷ್ ಮಾಧ್ಯಮದಲ್ಲಿ ಸೇರಿದೆ. ಶಾಲೆಯಲ್ಲಿ ಟಾಪ್ 5 ರಲ್ಲಿ ಇರುತ್ತಿದ್ದ ನಾನು ಇಲ್ಲಿ ಕೊನೆಯ ಐದರಲ್ಲಿ ಸ್ಥಾನ ಪಡೆಯುತ್ತಿದ್ದೆ. ಈ ದಿನಗಳಲ್ಲಿ ನನಗೆ ಈ ಸಿನಿಮಾ, ನಟನೆಯ ಕ್ಷೇತ್ರ ಪರಿಚಯವಾಯಿತು'' ಎಂದು ಅನಂತ್ ನಾಗ್ ತಮ್ಮ ಬಾಲ್ಯದ ಮರೆಯಲಾಗದ ಕ್ಷಣಗಳನ್ನ ಮೆಲುಕು ಹಾಕಿದ್ದಾರೆ.

ಅನಂತ್ ನಾಗ್ ಸಿನಿಮಾಗಳು

1972 ರಲ್ಲಿ ಕನ್ನಡ ಚಿತ್ರ `ಸಂಕಲ್ಪ' ಮತ್ತು ಶ್ಯಾಮ ಬೆನಗಲ್ ರ `ಅಂಕುರ್' ಚಿತ್ರದಿಂದ ಸಿನಿಪಯಣ ಶುರು ಮಾಡಿದರು. ಅನಂತನಾಗ್ ನಟಿಸಿದ 7 ಹಿಂದಿ ಚಿತ್ರಗಳಲ್ಲಿ 6 ಚಿತ್ರಗಳನ್ನು ಶ್ಯಾಮ್ ಬೆನಗಲ್ ಅವರ ನಿರ್ದೆಶನದಲ್ಲಿ ನಟಿಸಿರುವುದು ವಿಶೇಷ. 1975 ರಲ್ಲಿ ತೆರೆಕಂಡ ದೊರೈ ಭಗವಾನ್ ನಿರ್ದೇಶನದ `ಬಯಲುದಾರಿ' ಚಿತ್ರದಲ್ಲಿ ಕಲ್ಪನಾ ಜೊತೆ ನಟಿಸಿ ಕನ್ನಡ ಪ್ರೇಕ್ಷಕರಿಗೆ ಇನ್ನಷ್ಟು ಹತ್ತಿರಾದರು. ಅಲ್ಲಿಂದ ಶುರುವಾದ ಅನಂತನಾಗರ ಚಿತ್ರಜೀವನ ಸುಮಾರು 250 ಕ್ಕೂ ಹೆಚ್ಚು ಚಿತ್ರಗಳನ್ನು ದಾಟಿ ಮುನ್ನುಗ್ಗುತ್ತಿದೆ.