ಕೊನೆಗೂ 'ಅವತಾರ್- 2' ಕನ್ನಡ ಟ್ರೈಲರ್ ರಿಲೀಸ್: ಧನ್ಯವಾದ ತಿಳಿಸಿದ ನೆಟ್ಟಿಗರು

ಸಖತ್ ಸದ್ದು ಮಾಡ್ತಿದೆ ಕನ್ನಡ ಟ್ರೈಲರ್

ವಾರದ ನಂತರ ದಿಢೀರನೇ 'ಅವತಾರ್: ದಿ ವೇ ಆಫ್ ವಾಟರ್' ಕನ್ನಡ ಟ್ರೈಲರ್ ಬಿಡುಗಡೆ ಮಾಡಿ ಚಿತ್ರತಂಡ ಅಚ್ಚರಿ ಮೂಡಿಸಿದೆ. 20th Century Studios ಬ್ಯಾನರ್‌ನಲ್ಲಿ ಈ ಎಪಿಕ್ ಸೈನ್ಸ್ ಫಿಕ್ಷನ್ ಸಿನಿಮಾ ನಿರ್ಮಾಣವಾಗಿದೆ. ಅಫೀಷಿಯಲ್ ಯೂಟ್ಯೂಬ್‌ ಚಾನಲ್‌ನಲ್ಲೇ ಟ್ರೈಲರ್ ಅಪ್‌ಲೋಡ್ ಆಗಿದ್ದು ನೋಡಿದವರು ಮೆಚ್ಚಿಕೊಂಡಿದ್ದಾರೆ. ಡಬ್ಬಿಂಗ್ ಕ್ವಾಲಿಟಿ ಕೂಡ ತುಂಬಾ ಚೆನ್ನಾಗಿದೆ ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಕೊನೆಗೂ ಕನ್ನಡಕ್ಕೆ ಚಿತ್ರವನ್ನು ಡಬ್ ಮಾಡಿದ್ದಕ್ಕೆ ಧನ್ಯವಾದಗಳು ಎನ್ನುತ್ತಿದ್ದಾರೆ.

ಕ್ಯಾಮರೂನ್ ಹೊಸ ದೃಶ್ಯಕಾವ್ಯ

ನಿರ್ದೇಶಕ ಜೇಮ್ಸ್ ಕ್ಯಾಮರೂನ್ 'ಅವತಾರ್ -2' ಎನ್ನುವ ಮತ್ತೊಂದು ಅದ್ಭುತ ದೃಶ್ಯಕಾವ್ಯವನ್ನು ಪ್ರೇಕ್ಷಕರ ಮುಂದೆ ತರುತ್ತಿದ್ದಾರೆ. ದಶಕದ ಹಿಂದೆ ಪಂಡೋರ ಪ್ರಪಂಚದಲ್ಲಿ ಅದ್ಭುತ ಕಥೆ ಹೇಳಿ ಸಕ್ಸಸ್ ಕಂಡಿದ್ದರು. ಅವತ್ತಿನ ಕಾಲಕ್ಕೆ ಎಲ್ಲಾ ಹಾಲಿವುಡ್ ಸಿನಿಮಾಗಳ ಬಾಕ್ಸಾಫೀಸ್ ದಾಖಲೆಯನ್ನು ಅಳಿಸಿ ಹಾಕಿ ಈ ಸಿನಿಮಾ ದಾಖಲೆ ಬರೆದಿತ್ತು. ಈ ಬಾರಿ ಅದಕ್ಕಿಂತಲೂ ರೋಚಕವಾಗಿ ಚಿತ್ರವನ್ನು ತೆರೆಗೆ ತರುತ್ತಿದ್ದಾರೆ. ಈ ಬಾರಿ ನೀರಿನ ಆಳದ ಸಾಹಸಗಳು ಪ್ರೇಕ್ಷಕರಿಗೆ ಮತ್ತಷ್ಟು ಮಜಾ ಕೊಡಲಿದೆ. ಅಷ್ಟೇ ಅಲ್ಲ ಭಾವನಾತ್ಮಕ ಸನ್ನಿವೇಶಗಳು ಚಿತ್ರದಲ್ಲಿರೋದು ಗೊತ್ತಾಗುತ್ತಿದೆ.

ಡಿಸೆಂಬರ್ 16ಕ್ಕೆ 'ಅವತಾರ್- 2'

ಪ್ರಪಂಚದ 160 ಭಾಷೆಗಳಲ್ಲಿ 'ಅವತಾರ್‌- 2' ಸಿನಿಮಾ ಬಿಡುಗಡೆಯಾಗಲಿದೆ. ಆ ಮೂಲಕ ಚಿತ್ರದ ಹೊಸ ದಾಖಲೆ ಬರೀತಿದೆ. ಇಷ್ಟು ಭಾಷೆಗಳಿಗೆ ಡಬ್ ಮಾಡಿ ಸಿನಿಮಾ ರಿಲೀಸ್ ಮಾಡುತ್ತಿರುವ ತಂಡ ಕನ್ನಡಕ್ಕೆ ಡಬ್ ಮಾಡಲು ಮೀನಾಮೇಷ ಎಣಿಸಿದ್ದು ಯಾಕೆ ಎನ್ನುವುದು ಗೊತ್ತಾಗುತ್ತಿಲ್ಲ. ಡಿಸೆಂಬರ್ 16ಕ್ಕೆ ಬಹಳ ದೊಡ್ಡಮಟ್ಟದಲ್ಲಿ ಚಿತ್ರವನ್ನು ತೆರೆಗೆ ತರಲಾಗುತ್ತಿದೆ. 3D ಹಾಗೂ ಐಮ್ಯಾಕ್ಸ್ 3D ವರ್ಷನ್‌ಗಳಲ್ಲಿ ಸಿನಿಮಾ ಪ್ರೇಕ್ಷಕರಿಗೆ ಅದ್ಭುತ ಅನುಭವ ನೀಡುವುದಂತೂ ಗ್ಯಾರೆಂಟಿ.

'ಅವತಾರ್' ಸರಣಿ ಮುಂದುವರೆಯುತ್ತಾ?

ಈಗಾಗಲೇ ಅವತಾರ್- 2 ಜೊತೆಗೆ ಮುಂದಿನ ಚಿತ್ರವನ್ನು ಜೇಮ್ಸ್ ಕ್ಯಾಮರೂನ್ ಘೋಷಿಸಿದ್ದಾರೆ. ಚಿತ್ರದ 4 ಹಾಗೂ 5ನೇ ಭಾಗ ಕೂಡಬರುತ್ತದೆ ಎಂದು ಹೇಳಲಾಗಿತ್ತು. ಆದರೆ ಈಗ ನಿರ್ದೇಶಕರು ಈ ಬಗ್ಗೆ ಹಿಂದೇಟು ಹಾಕುತ್ತಿದ್ದಾರೆ. ಅವತಾರ್‌- 2 ಗೆದ್ದರೆ ಮಾತ್ರ 4 ಮತ್ತು 5ನೇ ಚಿತ್ರವನ್ನು ತೆರೆಗೆ ತರುತ್ತೇನೆ. ಇಲ್ಲ ಅಂದರೆ 3ನೇ ಭಾಗಕ್ಕೆ ಕಥೆಯನ್ನು ಮುಗಿಸುತ್ತೇನೆ ಎಂದಿದ್ದಾರೆ. 'ಅವತಾರ್' ಸರಣಿ ಅಭಿಮಾನಿಗಳಿಗೆ ಇದು ಕೊಂಚ ಬೇಸರ ತರಿಸಿದೆ.