ಡಿಸೆಂಬರ್‌ ತಿಂಗಳಿಗೂ ರಕ್ಷಿತ್ ಶೆಟ್ಟಿಗೂ ಅದೇನೋ ನಂಟು!

ಕಿರಿಕ್ ಪಾರ್ಟಿ ಬಂದಿದ್ದು ಡಿಸೆಂಬರ್‌ನಲ್ಲೇ

ರಕ್ಷಿತ್ ಶೆಟ್ಟಿ, ರಶ್ಮಿಕಾ ಮಂದಣ್ಣ, ಸಂಯುಕ್ತ ಹೆಗ್ಡೆ ನಟಿಸಿದ್ದ ಕಿರಿಕ್ ಪಾರ್ಟಿ ಸಿನಿಮಾ ಬಿಡುಗಡೆಯಾಗಿದ್ದು ಡಿಸೆಂಬರ್ ತಿಂಗಳಲ್ಲೇ. 2016ರ ಡಿಸೆಂಬರ್ 30 ರಂದು, ಅಂದ್ರೆ ಕೊನೆಯ ವಾರ ಕಿರಿಕ್ ಪಾರ್ಟಿ ಚಿತ್ರಮಂದಿರಕ್ಕೆ ಬಂದಿತ್ತು. ರಿಷಬ್ ಶೆಟ್ಟಿ ನಿರ್ದೇಶಿಸಿದ್ದ ಈ ಚಿತ್ರ ನಿರೀಕ್ಷೆಗೂ ಮೀರಿ ಯಶಸ್ಸು ಕಂಡಿತ್ತು.

ಕಿರಿಕ್ ದಾರಿಯಲ್ಲಿ 'ಶ್ರೀಮನ್ನಾರಾಯಣ'

ಆ ನಂತರ ಬಂದ ಅವನೇ ಶ್ರೀಮನ್ನಾರಾಯಣ ಚಿತ್ರವೂ ಡಿಸೆಂಬರ್ ತಿಂಗಳಲ್ಲೇ ತೆರೆಗೆ ಬಂದಿದೆ. ಭಾರಿ ಬಜೆಟ್, ತೆಲುಗು, ತಮಿಳಿನಲ್ಲೂ ಈ ಚಿತ್ರ ರಿಲೀಸ್ ಆಗಿದ್ದು ವಿಶೇಷ. ಮೇಕಿಂಗ್‌ನಿಂದ ಹೆಚ್ಚು ಕುತೂಹಲ ಮೂಡಿಸಿದ್ದ ಈ ಸಿನಿಮಾ 2019ರ ಡಿಸೆಂಬರ್ 27 ರಂದು ರಿಲೀಸ್ ಆಗಿತ್ತು. ಕೆಜಿಎಫ್ ಚಿತ್ರ ಬಿಡುಗಡೆಯಾದ್ಮೇಲೆ ಬಂದಿದ್ದ ಕಾರಣ, ದೊಡ್ಡ ಹೈಪ್ ಇತ್ತು. ಗಳಿಕೆ ಸುಮಾರಾಗಿದ್ದರೂ, ನಿರೀಕ್ಷಿತ ಮಟ್ಟಕ್ಕೆ ಅವನೇ ಶ್ರೀಮನ್ನಾರಾಯಣ ಸಕ್ಸಸ್ ಕಂಡಿಲ್ಲ. ಸುಮಾರು ಮೂರು ಗಂಟೆಯ ಈ ಸಿನಿಮಾಗೆ ಸಚಿನ್ ನಿರ್ದೇಶನವಿತ್ತು. ಪುಷ್ಕರ್ ಮಲ್ಲಿಕಾರ್ಜುನಯ್ಯ ನಿರ್ಮಾಣ ಮಾಡಿದ್ದರು. ರಕ್ಷಿತ್ ಶೆಟ್ಟಿ, ಶಾನ್ವಿ ಶ್ರೀವಾಸ್ತವ್, ಪ್ರಮೋದ್ ಶೆಟ್ಟಿ, ಅಚ್ಯುತ್ ಕುಮಾರ್, ಬಾಲಾಜಿ ಮನೋಹರ್, ಮಧುಸೂದನ್ ರಾವ್, ಚಂದನ್ ಆಚಾರ್ ಸೇರಿದಂತೆ ಹಲವರು ನಟಿಸಿದ್ದರು.

ಈಗ ಚಾರ್ಲಿ 777

ಈಗ ರಕ್ಷಿತ್ ಶೆಟ್ಟಿ ಅಭಿನಯದ ಚಾರ್ಲಿ 777 ಡಿಸೆಂಬರ್ 31ಕ್ಕೆ ಬರುವುದಾಗಿ ಪ್ರಕಟಿಸಿದೆ. ಇದನ್ನು ಗಮನಿಸಿದ ಸಿನಿಮಾ ಮಂದಿ ಡಿಸೆಂಬರ್ ತಿಂಗಳು ರಕ್ಷಿತ್ ಶೆಟ್ಟಿಗೆ ಅದೃಷ್ಟವಿರಬೇಕು ಎನ್ನುತ್ತಿದ್ದಾರೆ. ಗೌರಿ ಗಣೇಶ ಹಬ್ಬದ ಪ್ರಯುಕ್ತ 'ಟಾರ್ಚರ್' ವಿಡಿಯೋ ಹಾಡು ಸಾಂಗ್ ಬಿಡುಗಡೆಯಾಗಲಿದೆ. ರಕ್ಷಿತ್ ಶೆಟ್ಟಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಈ ಚಿತ್ರಕ್ಕೆ ಕಿರಣ್ ರಾಜ್ ಆಕ್ಷನ್ ಕಟ್ ಹೇಳಿದ್ದಾರೆ. ರಕ್ಷಿತ್ ಜೊತೆಗೆ ಸಂಗೀತ ಶೃಂಗೇರಿ, ರಾಜ್ ಬಿ ಶೆಟ್ಟಿ, ದಾನಿಶ್ ಸೇಠ್, ಬಾಬಿ ಸಿಂಹ ಇನ್ನೂ ಹಲವರು ಕಾಣಿಸಿಕೊಂಡಿದ್ದಾರೆ.

ರಿಚರ್ಡ್ ಆಂಟೋನಿ

777 ಚಾರ್ಲಿ ಸಿನಿಮಾ ಹೊರತುಪಡಿಸಿ ರಕ್ಷಿತ್ ಶೆಟ್ಟಿ ತುಂಬಾ ಬ್ಯುಸಿ ಇದ್ದಾರೆ. ಹೇಮಂತ್ ರಾವ್ ನಿರ್ದೇಶನದಲ್ಲಿ ತಯಾರಾಗುತ್ತಿರುವ 'ಸಪ್ತಸಾಗರದಾಚೆ ಎಲ್ಲೋ' ಚಿತ್ರೀಕರಣ ಸಾಗುತ್ತಿದೆ. ಇತ್ತೀಚಿಗಷ್ಟೆ ಹೊಂಬಾಳೆ ಫಿಲಂಸ್ ಜೊತೆ ಹೊಸ ಸಿನಿಮಾ ಘೋಷಣೆ ಮಾಡಿದ್ದು, ಆ ಚಿತ್ರಕ್ಕೆ 'ರಿಚರ್ಡ್ ಆಂಟೋನಿ' ಎಂದು ಹೆಸರಿಡಲಾಗಿದೆ. ಇದಾದ ಬಳಿಕ 'ಪುಣ್ಯಕೋಟಿ' ಚಿತ್ರ ಕೈಗೆತ್ತಿಕೊಳ್ಳಲಿದ್ದು, ರಕ್ಷಿತ್ ನಿರ್ದೇಶನ ಮಾಡಲಿದ್ದಾರೆ.