2022ರಲ್ಲಿ ಧನಂಜಯ್ ನಟನೆಯ 6 ಚಿತ್ರಗಳು ಬಿಡುಗಡೆ; ಯಾವುದರಿಂದಲೂ ಸಿಗಲಿಲ್ಲ ಗೆಲುವು!

ಬರೋಬ್ಬರಿ 6 ಚಿತ್ರಗಳು ರಿಲೀಸ್

ವರ್ಷಾಂತ್ಯಕ್ಕೆ ಅಂದರೆ ಡಿಸೆಂಬರ್ 30ರಂದು ಡಾಲಿ ಧನಂಜಯ್ ನಟನೆಯ 'ಒನ್ಸ್ ಅಪಾನ್ ಎ ಟೈಮ್ ಇನ್ ಜಮಾಲಿಗುಡ್ಡ' ಎಂಬ ಸಿನಿಮಾ ಬಿಡುಗಡೆಗೊಳ್ಳಲಿದ್ದು ಇದು ಈ ವರ್ಷ ತೆರೆ ಕಾಣಲಿರುವ ಧನಂಜಯ್ ನಟನೆಯ ಆರನೇ ಚಿತ್ರ ಎನಿಸಿಕೊಳ್ಳಿದೆ. ಮೊದಲಿಗೆ ಟ್ವೆಂಟಿ ಒನ್ ಅವರ್ಸ್ ಎಂಬ ಚಿತ್ರ ಬಿಡುಗಡೆಯಾಗಿ ಸೋಲನ್ನು ಅನುಭವಿಸಿತು. ನಂತರ ಶಿವ ರಾಜ್‌ಕುಮಾರ್ ಜತೆ ನಟಿಸಿದ್ದ ಬೈರಾಗಿ ಕೂಡ ಸದ್ದು ಮಾಡುವಲ್ಲಿ ಯಶಸ್ವಿಯಾಗಲಿಲ್ಲ. ತೆಲುಗಿನ ಕೇರ್ ಆಫ್ ಕಂಚೆರಪಾಲೆಂ ಚಿತ್ರದ ರಿಮೇಕ್ 'ಮಾನ್ಸೂನ್ ರಾಗ' ಸಹ ಹೇಳಿಕೊಳ್ಳುವಂತ ಗೆಲುವು ಸಾಧಿಸಲಿಲ್ಲ. ನಂತರ ಬಂದ ತೋತಾಪುರಿ ಮಕಾಡೆ ಮಲಗಿದರೆ, ಹೆಡ್ ಬುಷ್ ವಿವಾದದ ಮೂಲಕ ಸದ್ದು ಮಾಡಿತೇ ಹೊರತು ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡಲಿಲ್ಲ. ಹೀಗೆ ಇಲ್ಲಿಯವರೆಗೂ ಈ ವರ್ಷ ಒಟ್ಟು ಐದು ಚಿತ್ರಗಳಲ್ಲೂ ದೊಡ್ಡ ಗೆಲುವು ಕಾಣದಿರುವ ಧನಂಜಯ್ 'ಒನ್ಸ್ ಅಪಾನ್ ಎ ಟೈಮ್ ಇನ್ ಜಮಾಲಿಗುಡ್ಡ' ಚಿತ್ರದ ಮೂಲಕವಾದರೂ ಗೆಲ್ಲುತ್ತಾರಾ ಕಾದು ನೋಡಬೇಕಿದೆ.

ಸಾಲು ಸಾಲು ಚಿತ್ರ ಮಾಡಬೇಡಿ

ಇನ್ನು ಧನಂಜಯ್ ಸಾಲು ಸಾಲು ಚಿತ್ರಗಳನ್ನು ಮಾಡುತ್ತಿರುವುದರ ಕುರಿತು ಪ್ರತಿಕ್ರಿಯಿಸಿದ ಸಿನಿ ರಸಿಕರು ಹಲವಾರು ಬಾರಿ ಇಷ್ಟು ವೇಗವಾಗಿ ಚಿತ್ರಗಳನ್ನು ಮಾಡಿ ನಿರೀಕ್ಷೆಯನ್ನು ತಲುಪಲಾಗದೇ ನಿರಾಸೆ ಮೂಡಿಸುವ ಬದಲು ಒಂದೊಳ್ಳೆ ಕಥೆಯನ್ನು ಆರಿಸಿ ನಟಿಸಿ ಎಂದು ಸಂದೇಶವನ್ನು ನೀಡಿದ್ದರು. ಸದ್ಯ ವರ್ಷಾಂತ್ಯದಲ್ಲಿ ನಡೆಯುತ್ತಿರುವ ಚರ್ಚೆಗಳಲ್ಲಿಯೂ ಸಹ ಈ ವಿಷಯದ ಕುರಿತು ಮಾತುಗಳು ಕೇಳಿ ಬರುತ್ತಿದ್ದು, ಧನಂಜಯ್ ಹೆಚ್ಚು ಚಿತ್ರ ಮಾಡುವ ಬದಲು ಕಂಟೆಂಟ್ ಇರುವ ಚಿತ್ರಗಳನ್ನು ಮಾಡಿದರೆ ಉತ್ತಮ ಎನ್ನುತ್ತಿದ್ದಾರೆ.

2023ರಲ್ಲಿ ಸರಿಯಾದ ಕತೆ ಆರಿಸಿ

ಇನ್ನೂ ಕೆಲ ನೆಟ್ಟಿಗರು ಈ ಕುರಿತು ಪ್ರತಿಕ್ರಿಯಿಸಿದ್ದು ಮುಂದಿನ ವರ್ಷವಾದರೂ ಧನಂಜಯ್ ಕ್ವಾಂಟಿಟಿ ಪಕ್ಕಕ್ಕಿಟ್ಟು ಕ್ವಾಲಿಟಿ ಚಿತ್ರಗಳನ್ನು ಮಾಡಲಿ, ಅವರಿಗಿರುವ ಪ್ರತಿಭೆಗೆ ಎಂಥೆಂಥ ಚಿತ್ರಗಳನ್ನು ನೀಡಬಹುದು ಎಂದಿದ್ದಾರೆ. ಹಾಗೂ ಈ ಪೈಕಿ ಬಹುತೇಕರು ಹೊಯ್ಸಳ ಚಿತ್ರದ ಮೇಲೆ ದೊಡ್ಡ ಮಟ್ಟದ ನಿರೀಕ್ಷೆ ಇದೆ, ಆ ಚಿತ್ರ ಗೆದ್ದೇ ಗೆಲ್ಲುತ್ತೆ ಎಂದಿದ್ದಾರೆ.