ಕನ್ನಡದ ಈ ಹೊಸ ಸಿನಿಮಾಗಳಲ್ಲಿ ಹೆಚ್ಚಾಗುತ್ತಿದೆ ಶ್ವಾನ ಪ್ರೇಮ

'777 ಚಾರ್ಲಿ'

'777 ಚಾರ್ಲಿ' ಎನ್ನುವ ಹೊಸ ಚಿತ್ರ ಇತ್ತೀಚಿಗಷ್ಟೆ ಶುರು ಆಗಿದೆ. ಈ ಸಿನಿಮಾ ಶ್ವಾನ ಮತ್ತು ಮನುಷ್ಯನ ಬಾಂಡಿಂಗ್ ಹೇಳುವಂತಹ ಕಥೆಯನ್ನು ಹೊಂದಿದೆಯಂತೆ. ಚಿತ್ರದಲ್ಲಿ ಶ್ವಾನದ ಹೆಸರು ಚಾರ್ಲಿ ಆಗಿದ್ದು, ಶ್ವಾನದ ಲೈಸನ್ಸ್ ನಂಬರ್ 777 ಅಂತೆ. ಹೀಗಾಗಿ ಚಿತ್ರಕ್ಕೆ '777 ಚಾರ್ಲಿ' ಎಂಬ ಹೆಸರನ್ನು ಆಯ್ಕೆ ಮಾಡಿಕೊಂಡಿದ್ದಾರಂತೆ.

ರಕ್ಷಿತ್ ಶೆಟ್ಟಿ ನಿರ್ಮಾಣ

'ಕಿರಿಕ್ ಪಾರ್ಟಿ' ಚಿತ್ರದಲ್ಲಿ ರಕ್ಷಿತ್ ಶೆಟ್ಟಿ ಗೆಳೆಯರ ಪೈಕಿ ಒಬ್ಬರಾಗಿ ನಟಿಸಿದ್ದ ನಟ ಅರವಿಂದ್‌ ಅಯ್ಯರ್‌ '777 ಚಾರ್ಲಿ' ಚಿತ್ರದ ಹೀರೋ ಆಗಿದ್ದಾರೆ. ಈ ಚಿತ್ರವನ್ನು ಸ್ವತಃ ರಕ್ಷಿತ್ ಶೆಟ್ಟಿ ನಿರ್ಮಾಣ ಮಾಡುತ್ತಿದ್ದಾರೆ. ರಕ್ಷಿತ್ ಶೆಟ್ಟಿ ಜೊತೆ ಕೆಲಸ ಮಾಡಿರುವ ಕಿರಣ್ ರಾಜ್‌ ಎಂಬುವವರು ಈ ಚಿತ್ರದ ಮೂಲಕ ಸ್ಯಾಂಡಲ್ ವುಡ್‌ಗೆ ಪರಿಚಿತವಾಗುತ್ತಿದ್ದಾರೆ.

'ನಾನು ಮತ್ತು ಗುಂಡ'

'ನಾನು ಮತ್ತು ಗುಂಡ' ಚಿತ್ರದ ಕಥೆ ಕೂಡ ಒಂದು ನಾಯಿಯ ಸುತ್ತ ನಡೆಯುತ್ತದೆ. ಆ ನಾಯಿಯ ಹೆಸರು ಗುಂಡ ಆಗಿದ್ದು, ಅದೇ ಚಿತ್ರದ ಟೈಟಲ್ ಆಗಿದೆ. ಪ್ರಾಣಿ ಪ್ರೀತಿ ಮನುಷ್ಯರನ್ನು ಯಾವ ರೀತಿ ಬದಲಿಸುತ್ತದೆ ಎಂಬುದು ಚಿತ್ರದ ಕಥಾ ವಸ್ತುವಾಗಿದೆ. ಇಲ್ಲಿ ಶಿವರಾಜ್ ಕೆ.ಆರ್.ಪೇಟೆ ಮತ್ತು ಸಂಯುಕ್ತ ಹೊರನಾಡು ದಂಪತಿಗಳಾಗಿ ತೆರೆ ಹಂಚಿಕೊಂಡಿದ್ದಾರೆ.

'ನಿಶ್ಯಬ್ದ 2'

ಈಗಾಗಲೇ ರಿಲೀಸ್ ಗೆ ರೆಡಿ ಇರುವ 'ನಿಶ್ಯಬ್ದ 2' ಚಿತ್ರದಲ್ಲಿ ಕೂಡ ಶ್ವಾನ ಪ್ರಮುಖ ಪಾತ್ರವನ್ನುವಹಿಸಿದೆ. ಚಿತ್ರದಲ್ಲಿ ಕಪ್ಪು ಶ್ವಾನವೊಂದು ನಟನೆ ಮಾಡಿದೆ. ದೇವರಾಜ್ ಕುಮಾರ್ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದು, ನಟ ರೂಪ್ ಶೆಟ್ಟಿ ಇಲ್ಲಿ ನಾಯಕನಾಗಿದ್ದಾರೆ.

ವಿಷ್ಣುವರ್ಧನ್ ಚಿತ್ರದಲ್ಲಿ

ಈ ಹಿಂದೆ ವಿಷ್ಣುವರ್ಧನ್ ಅವರ 'ನಿಶ್ಯಬ್ದ' ಚಿತ್ರದಲ್ಲಿ ಶ್ವಾನ ಪ್ರಮುಖ ಪಾತ್ರವನ್ನು ನಿರ್ವಹಿಸಿತ್ತು. ಅದೇ ಕಾರಣದಿಂದ 'ನಿಶ್ಯಬ್ದ 2' ಚಿತ್ರದಲ್ಲಿಯೂ ಶ್ವಾನವನ್ನು ಬಳಸಿಕೊಳ್ಳಲಾಗಿದೆ.