ಡಾಲಿ ಧನಂಜಯ್‌ 'ಬಡವ ರಾಸ್ಕಲ್'ಗಾಗಿ ಮದುವೆ ಮನೆಯಲ್ಲಿ ಸ್ಲೇಟ್ ಹಿಡಿದ ವಧು ವರ

ಮದುವೆ ಮನೆಯಲ್ಲಿ 'ಬಡವ ರಾಸ್ಕಲ್' ಪ್ರಚಾರ

ಡಾಲಿ ಧನಂಜಯ್ ಅದ್ಯಾವುದೇ ಪಾತ್ರ ಕೊಟ್ಟರೂ ಸೈ. ರಗಡ್ ಲುಕ್ ಕೊಟ್ಟು ವಿಲನ್ ಶೇಡ್‌ನಲ್ಲಿ ನಟಿಸುವುದಕ್ಕೂ ಸೈ.. ಇತ್ತ ಪಕ್ಕಾ ಫ್ಯಾಮಿಲಿಮ್ಯಾನ್ ಲುಕ್ ಕೊಡಲು ಜೈ. ಈ ಎರಡೂ ಅವತಾರಗಳಲ್ಲಿ ಡಾಲಿಯನ್ನು ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಹೀಗಾಗಿ ಧನಂಜಯ್ ಪಕ್ಕಾ ಮಧ್ಯಮ ವರ್ಗದ ವ್ಯಕ್ತಿಯೊಬ್ಬನ ಕಥೆಯನ್ನು ತೆರೆಮೇಲೆ ತರಲು ಸಜ್ಜಾಗಿದ್ದಾರೆ. ಅದುವೇ 'ಬಡವ ರಾಸ್ಕಲ್'. ಇದೇ ಸಿನಿಮಾವನ್ನು ಜನರೇ ವಿಭಿನ್ನವಾಗಿ ಪ್ರಚಾರ ಮಾಡುತ್ತಿದ್ದಾರೆ. ಈಗ ಮದುವೆ ಮನೆಯಲ್ಲಿ ವಧು ವರರೇ ಸ್ಲೇಟ್ ಹಿಡಿದು ಪ್ರಚಾರಕ್ಕಿಳಿದಿದ್ದಾರೆ.

ವೈರಲ್ ಆಗುತ್ತಿದೆ ವಧು ವರರ ವಿಡಿಯೋ

ಮದುವೆ ಮನೆಯಲ್ಲಿ ಅಡುಗೆ ಮಾಡುವ ಭಟ್ಟರು ಡಿಸೆಂಬರ್ 24ಕ್ಕೆ 'ಬಡವ ರಾಸ್ಕಲ್' ಬಿಡುಗಡೆ ಅಂತ ಬರೆದ ಸ್ಲೇಟ್ ಹಿಡಿದು ಕೂತಿದ್ದಾರೆ. ಹಪ್ಪಳ ಕರಿಯುವ ಭಟ್ಟರು 'ಬಡವ ರಾಸ್ಕಲ್' ಪ್ರಚಾರ ಮಾಡುತ್ತಿದ್ದಾರೆ. ವಾಲಗ ಊದುವವರು ಕೂಡ ಸ್ಲೇಟ್ ಹಿಡಿದು ಪ್ರಚಾರ ಮಾಡುತ್ತಿದ್ದಾರೆ. ಮದುವೆಗೆ ಬಂದವರ ಕೈಯಲ್ಲೂ ಸ್ಲೇಟ್ ಹಿಡಿದು ಪ್ರಚಾರ ಮಾಡುತ್ತಿದ್ದಾರೆ. ಮಧು ಮಕ್ಕಳು ಕೂಡ ವೇದಿಕೆ ಮೇಲೆ 'ಬಡವ ರಾಸ್ಕಲ್' ಪ್ರಚಾರಕ್ಕಿಳಿದಿದ್ದಾರೆ.

ವಧು ವರರ ವಿಡಿಯೋ ಶೇರ್ ಮಾಡಿದ ಡಾಲಿ

ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿರುವ ಈ ಬಡವ ರಾಸ್ಕಲ್ ವಿಡಿಯೋವನ್ನು ಡಾಲಿ ಧನಂಜಯ್ ಕೂಡ ಟ್ವಿಟ್ಟರ್‌ನಲ್ಲಿ ಶೇರ್ ಮಾಡಿದ್ದಾರೆ. " ಜನರೇ ಪ್ರೀತಿ ತೋರಿಸುತ್ತಿದ್ದಾರೆ. ಅವರೂ ಬಡವ ರಾಸ್ಕಲ್ ಸಿನಿಮಾದ ಪ್ರಚಾರದಲ್ಲಿ ತೊಡಗಿಸಿಕೊಂಡಿರುವುದು ನೋಡಿದರೆ ಖುಷಿಯಾಗುತ್ತೆ. ಈಗ ತಾನೇ ಮಧು ಮಕ್ಕಳ ವಿಡಿಯೋವನ್ನು ಸ್ನೇಹಿತರು ಕಳುಹಿಸಿದ್ದರು. ಅದು ಇಷ್ಟ ಆಯ್ತು. ಅದಕ್ಕೆ ತನ್ನ ಟ್ವಿಟರ್‌ ಖಾತೆಯಲ್ಲಿ ಶೇರ್ ಮಾಡಿದ್ದೇನೆ. ಜನರು ಹೀಗೆ ಪ್ರತಿಕ್ರಿಯೆ ನೀಡುತ್ತಿರುವುದು ಖುಷಿ ಕೊಟ್ಟಿದೆ." ಎಂದು ಫಿಲ್ಮಿ ಬೀಟ್‌ಗೆ ಧನಂಜಯ್ ಪ್ರತಿಕ್ರಿಯೆ ನೀಡಿದ್ದಾರೆ.

ಧನಂಜಯ್ ನಿರ್ಮಿಸಿದ ಸಿನಿಮಾ ಬಡವ ರಾಸ್ಕಲ್

'ಬಡವ ರಾಸ್ಕಲ್' ಸಿನಿಮಾವನ್ನು ಡಾಲಿ ಧನಂಜಯ್ ನಿರ್ಮಾಣ ಮಾಡಿದ್ದಾರೆ. ಮಧ್ಯಮ ವರ್ಗದ ಜನರ ದಿನನಿತ್ಯದ ಜೀವನದಲ್ಲಿ ನಡೆಯುವ ಘಟನೆಗಳೇ ಈ ಸಿನಿಮಾ ಕಥಾವಸ್ತು. ಈ ಚಿತ್ರದಲ್ಲಿ ಧನಂಜಯ್‌ ಆಟೋ ಡ್ರೈವರ್‌ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರಕ್ಕೆ ಶಂಕರ್‌ ಗುರು ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶಿಸುತ್ತಿದ್ದಾರೆ.