ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಗೆ ಗುರಿಯಿಟ್ಟ ಸುಕ್ಕಾ ಸೂರಿ

ದರ್ಶನ್ ಗೆ ಸೂರಿ ಮೊದಲ ನಿರ್ದೇಶನ

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಗೆ ಆಕ್ಷನ್ ಕಟ್ ಹೇಳಲು ಸುಕ್ಕಾ ಸೂರಿ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಸ್ಕ್ರಿಪ್ಟ್ ಹೇಗಿರಬೇಕು ಎನ್ನುವುದರ ಬಗ್ಗೆ ಸೂರಿ ಪ್ಲಾನ್ ಮಾಡಿಕೊಂಡಿದ್ದಾರಂತೆ. ಸೂರಿ ಫ್ಲೇವರ್ ನ ಕಥೆ ಬಾಕ್ಸ್ ಆಫೀಸ್ ಸುಲ್ತಾನ್ ಗೆ ಇಷ್ಟವಾಗಿ ಗ್ರೀನ್ ಸಿಗ್ನಲ್ ನೀಡಿದ್ರೆ, ಇಬ್ಬರ ಸಿನಿಮಾ ಮುಂದಿನ ವರ್ಷ ಸೆಟ್ಟೇರುವುದು ಪಕ್ಕಾ. ಆಕ್ಷನ್ ಮತ್ತು ಮಾಸ್ ನಾಯಕ ಅಂತಾನೆ ಖ್ಯಾತಿ ಗಳಿಸಿರುವ ದರ್ಶನ್ ಗೆ ರಕ್ತ ಸಿಕ್ತ ಕ್ರೈಮ್ ಕತೆಯ ಸರದಾರ ಸೂರಿ ನಿರ್ದೇಶನ ಮಾಡುತ್ತಾರೆ ಅಂದ್ರೆ ಇಬ್ಬರ ಕಾಂಬಿನೇಶನ್ ನ ಚಿತ್ರ ಹೇಗಿರಲಿದೆ ಎನ್ನುವ ಕುತೂಹಲ ಹೆಚ್ಚಾಗಿದೆ.

ಇಬ್ಬರ ಸಿನಿಮಾ ಯಾವಾಗ ಶುರುವಾಗುತ್ತೆ?

ಸ್ಯಾಂಡಲ್ ವುಡ್ ಸಾರಥಿ ದರ್ಶನ್ ಮತ್ತು ಸೂರಿ ಕಾಂಬಿನೇಷನ್ ಸಿನಿಮಾ ಮುಂದಿನ ವರ್ಷದ ಕೊನೆಯಲ್ಲಿ ಪ್ರಾರಂಭವಾಗುವ ಸಾಧ್ಯತೆ ಇದೆ. ಯಾಕೆಂದರೆ ದರ್ಶನ್ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಸದ್ಯ 'ಒಡಯ' ಸಿನಿಮಾದ ಚಿತ್ರೀಕರಣದಲ್ಲಿರುವ ದರ್ಶನ್ ನಂತರ 'ರಾಬರ್ಟ್' ಮತ್ತು 'ಗಂಡುಗಲಿ ಮದಕರಿನಾಯಕ' ಚಿತ್ರದಲ್ಲಿ ತೊಡಗಿಕೊಳ್ಳಲಿದ್ದಾರೆ. ಇತ್ತ ಸೂರಿ ಕೂಡ ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಹಾಗಾಗಿ ಇಬ್ಬರ ಸಿನಿಮಾ ಕಮಿಟ್ ಮೆಂಟ್ಸ್ ಮುಗಿದ ಬಳಿಕ ಸೂರಿ ಮತ್ತು ದರ್ಶನ್ ಸಿನಿಮಾ ಪ್ರಾರಂಭವಾಗಲಿದೆ.

ಪುನೀತ್, ಶಿವಣ್ಣ, ವಿಜಿ ಬಿಟ್ಟು ಬೇರೆ ನಟನಿಗೆ ನಿರ್ದೇಶನ

ಸುಕ್ಕಾ ಸೂರಿ ಸಿನಿಮಾ ಅಂದಾಕ್ಷಣ ಪುನೀತ್, ಶಿವಣ್ಣ ಅಥವಾ ದುನಿಯಾ ವಿಜಿ ನಾಯಕರಾಗಿ ಇರ್ತಾರೆ, ಅವರಿಗೆ ಮಾತ್ರ ಸೂರಿ ಸಿನಿಮಾ ಮಾಡುತ್ತಾರೆ ಎನ್ನುವ ಮಾತುಗಳು ಕೇಳಿ ಬರುತ್ತಿತ್ತು. ಯಾಕಂದ್ರೆ ಸೂರಿ ನಿರ್ದೇಶನದ 9 ಸಿನಿಮಾಗಳಲ್ಲಿ ಪುನೀತ್ ರಾಜ್ ಕುಮಾರ್ ಗೆ ಮೂರು ಸಿನಿಮಾ, ಶಿವಣ್ಣನಿಗೆ ಎರಡು ಸಿನಿಮಾ ಮತ್ತು ವಿಜಿಯ್ ಗೆ ಎರಡು ಸಿನಿಮಾಗಳನ್ನು ನಿರ್ದೇಶನ ಮಾಡಿದ್ದಾರೆ. ಆದ್ರೀಗ ಆ ಸರ್ಕಲ್ ನಿಂದ ಆಚೆಗೆ ಬಂದು ಸ್ಯಾಂಡಲ್ ವುಡ್ ನ ಬೇರೆ ಸ್ಟಾರ್ ನಟರಿಗೂ ನಿರ್ದೇಶನ ಮಾಡುವ ಪ್ಲಾನ್ ಮಾಡಿದ್ದಾರೆ.

ಪಾಪ್ ಕಾರ್ನ್ ಮಂಕಿ ಟೈಗರ್

ಸುಕ್ಕಾ ಸೂರಿ ಸದ್ಯ 'ಪಾಪ್ ಕಾರ್ನ್ ಮಂಕಿ ಟೈಗರ್' ಚಿತ್ರದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. 'ಟಗರು' ಚಿತ್ರದಲ್ಲಿ ಡಾಲಿ ಪಾತ್ರದ ಮೂಲಕ ಖ್ಯಾತಿ ಗಳಿಸಿದ್ದ ಧನಂಜಯ್ ನಾಯಕನಾಗಿ ಅಭಿನಯಿಸುತ್ತಿರುವ ಸಿನಿಮಾ. ಟಗರು ನಂತರ ಈ ಹಿಟ್ ಕಾಂಬಿನೇಶನ್ 'ಪಾಪ್ ಕಾರ್ನ್ ಮಂಕಿ ಟೈಗರ್' ಚಿತ್ರದ ಮೂಲಕ ಎರಡನೇ ಬಾರಿಗೆ ಒಂದಾಗಿದೆ. ಈ ಸಿನಿಮಾದ ನಂತರ ಸೂರಿ ಬಹುನಿರೀಕ್ಷೆಯ 'ಕೆಂಡಸಂಪಿಗೆ' ಚಿತ್ರದ ಮೊದಲ ಭಾಗ 'ಕಾಗೆ ಬಂಗಾರ' ಪ್ರಾಜೆಕ್ಟ್ ಕೈ ಗೆತ್ತಿಕೊಳ್ಳಲಿದ್ದಾರಂತೆ.