ರಾಜ್ ಕುಮಾರ್‌ 'ಡಾಕ್ಟರೇಟ್' ಗೌರವಕ್ಕೆ 45 ವರ್ಷ: ಹೇಗಿತ್ತು ಅಂದಿನ ಸನ್ನಿವೇಶ?

ಕನ್ನಡಕ್ಕೆ ಅಣ್ಣಾವ್ರು ನೀಡಿದ ಕೊಡುಗೆಗೆ ಸಿಕ್ಕ ಗೌರವ

ಕನ್ನಡ ಭಾಷೆ, ನೆಲ, ಕಲೆ ಮತ್ತು ಸಂಸ್ಕೃತಿ ಮತ್ತು ಸಂಗೀತಕ್ಕೆ ರಾಜ್ ಕುಮಾರ್ ಅವರು ನೀಡಿದ ಕೊಡುಗೆಯನ್ನು ಗುರುತಿಸಿ ಮೈಸೂರು ವಿಶ್ವವಿದ್ಯಾಲಯ ಡಾಕ್ಟರೇಟ್ ಪದವಿ ಪ್ರದಾನ ಮಾಡಿತ್ತು. ಮೈಸೂರು ವಿಶ್ವವಿದ್ಯಾಲಯ ಆವರಣದಲ್ಲಿ ನಡೆದಿದ್ದ ಈ ಕಾರ್ಯಕ್ರಮದಲ್ಲಿ ಆಗಿನ ಕುಲಪತಿ ಡಾ.ಉಮಾಶಂಕರ್ ದೀಕ್ಷಿತ್ ಮತ್ತು ಉಪಕುಲಪತಿ ಡಾ.ಡಿ.ವಿ. ಅರಸ್ ಅವರು ರಾಜ್ ಕುಮಾರ್‌ಗೆ ಡಾಕ್ಟರೇಟ್ ನೀಡಿದ್ದರು.

ಕಿಕ್ಕಿರಿದು ತುಂಬಿದ ಜನರು

ವಿಶ್ವವಿದ್ಯಾಲಯ ಆವರಣದಲ್ಲಿ ಕಾರ್ಯಕ್ರಮ ಆಯೋಜಿಸಿದ್ದರಿಂದ ಜನ ಕಿಕ್ಕಿರಿದು ತುಂಬಿದ್ದರು. ಒಳಗೆ ಪ್ರವೇಶ ಮಾಡಲು ಸಹ ಕಷ್ಟಕರವಾಗಿತ್ತು. ಅದೇ ದಿನ ಪರಮಾಣು ಶಕ್ತಿ ಆಯೋಗದ ಅಧ್ಯಕ್ಷರಾಗಿದ್ದ ಡಾ. ಎಚ್.ಎನ್. ಸೆಟ್ನಾ, ಕನ್ನಡ ಕವಿ, ಬರಹಗಾರ, ಪ್ರಬಂಧಕಾರ ಮತ್ತು ವಿಮರ್ಶಕ ವಿ. ಸೀತಾರಾಮಯ್ಯ ಹಾಗೂ ಇತಿಹಾಸದ ಪ್ರಾಧ್ಯಾಪಕ ಎಂ.ಎಚ್ ಗೋಪಾಲ್ ಅವರಿಗೂ ಸಹ ಗೌರವ ಡಾಕ್ಟರೇಟ್ ಪ್ರದಾನ ಮಾಡಲಾಯಿತು.

ಏನ್ ನೋಡಿ ನನಗೆ ಡಾಕ್ಟರೇಟ್ ಕೊಡ್ತಿದ್ದೀರಾ?

ವೇದಿಕೆವೊಂದರಲ್ಲಿ ಮಾತನಾಡುತ್ತಿದ್ದ ಡಾ.ರಾಜ್ ಕುಮಾರ್ ಅವರು, ತಮಗೆ ನೀಡಿರುವ ಡಾಕ್ಟರೇಟ್ ಬಗ್ಗೆ ಹೀಗೆ ಕೇಳಿದ್ದರಂತೆ. ''ಏನ್ ನೋಡಿ ನನಗೆ ಡಾಕ್ಟರೇಟ್ ಕೊಡ್ತಿದ್ದೀರಾ? ನಾನು ವಿದ್ಯಾವಂತನಲ್ಲ, ಓದಿದವನಲ್ಲ, ನಾನೇನೂ ಎಂ.ಎ ಆಗಲಿ ಪಿ.ಎಚ್.ಡಿ ಮಾಡಿದ್ದೀನಾ. ಬಾಲ್ಯದಲ್ಲಿ ನಾನು ಹಳ್ಳಿನಲ್ಲಿ ಎಮ್ಮೆ ಮೇಯಸ್ತಾ ಇದ್ದೆ ನಾನು'' ಅಂತಾ ಹೇಳಿದ್ದರು.

ಪಾರ್ವತಮ್ಮ ಅವರಿಗೂ ಸಿಕ್ಕಿದೆ ಡಾಕ್ಟರೇಟ್

2014 ರಲ್ಲಿ ಬಳ್ಳಾರಿಯ ಕೃಷ್ಣದೇವರಾಯ ವಿಶ್ವವಿದ್ಯಾಲಯ ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್ ಅವರ ಸಾಧನೆಯನ್ನ ಗೌರವಿಸಿ ಡಾಕ್ಟರೇಟ್ ನೀಡಿತ್ತು. 2015ರ ಮೇ ತಿಂಗಳಲ್ಲಿ ಪಾರ್ವತಮ್ಮ ರಾಜ್ ಕುಮಾರ್ ಅವರಿಗೆ ಬೆಂಗಳೂರು ವಿಶ್ವವಿದ್ಯಾಲಯ ಗೌರವ ಡಾಕ್ಟರೇಟ್ ನೀಡಿದೆ.