'ಬನಾರಸ್' ಸಿನಿಮಾ ವೀಕ್ಷಿಸಿ ಭೇಷ್ ಎಂದ ಮಾಜಿ ಸಿಎಂ ಸಿದ್ದರಾಮಯ್ಯ

ಸದಭಿರುಚಿಯ ಸಿನಿಮಾ ಇದು: ಸಿದ್ದರಾಮಯ್ಯ

ಇದೀಗ 'ಬನಾರಸ್' ಸಿನಿಮಾ ವೀಕ್ಷಿಸಿ ಆ ಬಗ್ಗೆ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಚುಕುಟಾಗಿ ಬರೆದಿರುವ ಸಿದ್ದರಾಮಯ್ಯ, ''ಝೈದ್ ಖಾನ್ ಹಾಗೂ ಸೋನಂ ಮಾಂಟೇರೋ ಅಭಿನಯದ ಬನಾರಸ್ ಚಿತ್ರ ವೀಕ್ಷಿಸಿ, ಚಿತ್ರತಂಡಕ್ಕೆ ಶುಭ ಹಾರೈಸಿದೆ. ನೈಜತೆಯಿಂದ ಕೂಡಿದ ಪಾತ್ರಗಳು, ಸ್ವಾರಸ್ಯಕರವಾದ ಕತೆಯನ್ನು ಒಳಗೊಂಡಿರುವ ಸದಭಿರುಚಿಯ ಚಲನಚಿತ್ರವಿದು. ಇಂಥಾ ಚಿತ್ರಗಳ ಸಂಖ್ಯೆ ನೂರಾಗಲಿ. ಚಿತ್ರರಂಗ ಬೆಳೆಯಲಿ, ಚಿತ್ರತಂಡ ಬೆಳೆಯಲಿ. ಎಲ್ಲರಿಗೂ ಒಳಿತಾಗಲಿ'' ಎಂದಿದ್ದಾರೆ.

ಸಿನಿಮಾ ನೋಡಿ ಖುಷಿಯಾದ ಸಿದ್ದರಾಮಯ್ಯ

ಸಿನಿಮಾ ವೀಕ್ಷಿಸಿದ ಬಳಿಕ ಮಾಧ್ಯಮಗಳೊಟ್ಟಿಗೆ ಮಾತನಾಡಿದ ಸಿದ್ದರಾಮಯ್ಯ, ''ನಾನು ಸಿನಿಮಾ ನೋಡಿ ಬಹಳ ದಿನವಾಗಿತ್ತು. ಇತ್ತೀಚೆಗೆ ನೋಡಿರಲಿಲ್ಲ. ಅದೇ ಸಮಯಕ್ಕೆ ನನ್ನ ಗೆಳೆಯ ಜಮೀರ್, ಆತನ ಪುತ್ರ ಝೈದ್ ಖಾನ್ ಸಿನಿಮಾ ಮಾಡುವುದಾಗಿ ಹೇಳಿ ನೋಡಬೇಕೆಂದು ಆಗ್ರಹಿಸಿದರು. ಹಾಗಾಗಿ ಸಿನಿಮಾ ನೋಡಿದೆ'' ಎಂದಿದ್ದಾರೆ.

ಝೈದ್ ಖಾನ್ ನಟನೆ ಚೆನ್ನಾಗಿದೆ: ಸಿದ್ದರಾಮಯ್ಯ

''ಬನಾರಸ್' ಸಿನಿಮಾ ನೋಡಿದೆ. ಸಿನಿಮಾದ ಕತೆಯೂ ಚೆನ್ನಾಗಿದೆ. ಸಿನಿಮಾ ಸಹ ಚೆನ್ನಾಗಿದೆ. ಸಿನಿಮಾದ ನಾಯಕ ಝೈದ್ ಖಾನ್, ಅವರಿಗಿದು ಮೊದಲನೇ ಸಿನಿಮಾ ಆದರೂ ಸಹ, ಅವರು ಪಕ್ವವಾಗಿ ನಟಿಸಿದ್ದಾರೆ. ಅವರ ಮೊದಲನೇ ಸಿನಿಮಾ ಇದು ಎನಿಸುವುದಿಲ್ಲ. ಸ್ವಾಭಾವಿಕವಾಗಿ ನಟಿಸಿದ್ದಾರೆ. ಇನ್ನು ನಟಿ ಸೋನಲ್, ಕೆಲವು ಸಿನಿಮಾಗಳಲ್ಲಿ ನಟಿಸಿ ಅನುಭವ ಉಳ್ಳವರು. ಅವರೂ ಸಹ ಚೆನ್ನಾಗಿ ನಟಿಸಿದ್ದಾರೆ.

ನಿರ್ದೇಶಕರ ಕಲ್ಪನೆ ಚೆನ್ನಾಗಿದೆ: ಸಿದ್ದರಾಮಯ್ಯ

ಸಿನಿಮಾ ಎರಡು ವರೆಗಂಟೆ ಇದ್ದು, ಸಿನಿಮಾ ನೋಡುವಾಗ ಬೇಸರ ಆಗಲ್ಲ. ಸಿನಿಮಾ ನೋಡುವಾಗ ಮುಂದೇನಾಗುತ್ತದೆ ಎಂಬ ಕುತೂಹಲ ಉಂಟಾಗುತ್ತಾ ಇರುತ್ತದೆ. ಹಾಗಾಗಿ ಸಿನಿಮಾ ಉದ್ದಕ್ಕೂ ಸಹ ಎಲ್ಲೂ ಬೇಸರವಾಗುವುದಿಲ್ಲ. ಸಿನಿಮಾದ ಕತೆಯನ್ನು ನಿರ್ದೇಶಕ ಜಯತೀರ್ಥ ಚೆನ್ನಾಗಿ ತೆಗೆದುಕೊಂಡು ಹೋಗಿದ್ದಾರೆ. ಅವರ ನಿರ್ದೇಶನ, ಅವರ ಕಲ್ಪನೆ ಬಹಳ ಚೆನ್ನಾಗಿದೆ'' ಎಂದಿದ್ದಾರೆ ಸಿದ್ದರಾಮಯ್ಯ.