ಡಾ.ರಾಜ್ ಅಭಿನಯದ ಬ್ಲಾಕ್ ಬಸ್ಟರ್ 'ಸಂಪತ್ತಿಗೆ ಸವಾಲ್' ಸೆಟ್ಟೇರಿದ ಹಿಂದಿನ ಅಸಲಿ ಕಥೆ

ಯಾರೇ ಕೂಗಾಡಲಿ.. ಊರೇ ಹೋರಾಡಲಿ

ಸಿನಿಮಾ ಸೆಟ್ಟೇರಿದ್ದು ಒಂದು ಕಥೆಯಾದರೆ, ಚಿತ್ರದ ಹಾಡಿಗೂ ಒಂದು ಹಿನ್ನಲೆಯಿದೆ. ಈಗಲೂ ಜನರ ಬಾಯಲ್ಲಿ ಗುನುಗುವ ಹಾಡು, 'ಯಾರೇ ಕೂಗಾಡಲಿ.. ಊರೇ ಹೋರಾಡಲಿ'. ಖುದ್ದು, ಡಾ. ರಾಜಕುಮಾರ್ ಅವರೇ ಹಾಡಿರುವ ಈ ಹಾಡಿನ ಹಿಂದಿನ ಕಲ್ಪನೆ ಯಾರದ್ದು ಎನ್ನುವುದನ್ನು ಸಂಗೀತ ನಿರ್ದೆಶಕ ಜಿ.ಕೆ.ವೆಂಕಟೇಶ್ ಹಿಂದೆ ಹೇಳಿದ್ದರು. ಆಕಾಶವಾಣಿಯಲ್ಲಿನ ಸಂದರ್ಶನವೊಂದರಲ್ಲಿ ವೆಂಕಟೇಶ್, ತಾನೇ ರಾಜ್ ಅವರಿಗೆ ಈ ಹಾಡು ಹಾಡುವಂತೆ ಸೂಚಿಸಿದ್ದು ಎಂದಿದ್ದರು.

ರಾಜ್ ಕನಕಪುರಕ್ಕೆ ಒಂದು ನಾಟಕವನ್ನು ನೋಡಲು ಹೋಗುತ್ತಾರೆ

ಚಿತ್ರ ಬಿಡುಗಡೆಯಾದ ಒಂದು ವರ್ಷದ ಹಿಂದೆ, ಅಂದರೆ 1973ರಲ್ಲಿ ಡಾ. ರಾಜ್ ಕನಕಪುರಕ್ಕೆ ಒಂದು ನಾಟಕವನ್ನು ನೋಡಲು ಹೋಗುತ್ತಾರೆ. ಆ ನಾಟಕದ ಹೆಸರು ಕೂಡಾ 'ಸಂಪತ್ತಿಗೆ ಸವಾಲ್' ಎಂದು. ಶಾರದಾ ಸಂಗೀತ ನಾಟಕ ಮಂಡಳಿಯ ಈ ನಾಟಕ, ರಾಜ್ಯಾದ್ಯಂತ ಭಾರೀ ಸದ್ದು ಮಾಡಿತ್ತು. ಈ ನಾಟಕವನ್ನು ನೋಡಿದ ಮೇಲೆ, ರಾಜ್, ಇದನ್ನು ಸಿನಿಮಾ ಮಾಡಲು ನಿರ್ಧರಿಸಿದರು.

ಸಂಪತ್ತಿಗೆ ಸವಾಲ್ ಸಿನಿಮಾ

ಸಿನಿಮಾ ಮಾಡುವ ವಿಚಾರವನ್ನು ಶಾರದಾ ನಾಟಕ ಮಂಡಳಿಯ ಮಾಲೀಕ ಬಸವರಾಜಪ್ಪ ಮತ್ತು ಕಥೆ ಬರೆದಿದ್ದ ಪಿ.ಬಿ.ಧುತ್ತರಿಗೆ ಅವರಲ್ಲಿ ರಾಜ್ ಮನವಿ ಮಾಡುತ್ತಾರೆ. ಇವರ ಒಪ್ಪಿಗೆ ಪಡೆದ ನಂತರ, ಎ.ಎನ್.ಮೂರ್ತಿ ಚಿತ್ರಕ್ಕೆ ಬಂಡವಾಳ ಹೂಡಲು ಮುಂದಾಗುತ್ತಾರೆ. ಎ.ವಿ.ಶೇಷಗಿರಿ ರಾವ್ ಚಿತ್ರದ ನಿರ್ದೇಶಕರಾಗಿ ಮತ್ತು ಜಿ,ಕೆ.ವೆಂಕಟೇಶ್ ಅವರು ಸಂಗೀತ ನಿರ್ದೇಶಕರಾಗುತ್ತಾರೆ.

ಸಾಹುಕಾರ ಸಿದ್ದಪ್ಪನ ಪಾತ್ರದಲ್ಲಿ ವಜ್ರಮುನಿ

ಸಂಪತ್ತಿಗೆ ಸವಾಲ್ ಸಿನಿಮಾದ ಎಲ್ಲಾ ಪಾತ್ರಧಾರಿಗಳಿಗೆ ಮೊದಲು ಆ ನಾಟಕವನ್ನು ನೋಡಲು ಡಾ.ರಾಜ್ ಮತ್ತು ನಿರ್ದೇಶಕರು ಸೂಚಿಸಿದ್ದರಂತೆ. ಡಾ.ರಾಜ್ ಮತ್ತು ಸಾಹುಕಾರ ಸಿದ್ದಪ್ಪನ ಪಾತ್ರದಲ್ಲಿ ವಜ್ರಮುನಿ, ನೆನಪಿನಲ್ಲಿ ಉಳಿಯುವ ನಟನೆಯನ್ನು ನೀಡಿದ್ದರು. ಮಂಜುಳಾ, ರಾಜಾಶಂಕರ್, ಬಾಲಕೃಷ್ಣ ಮುಂತಾದವರು ಚಿತ್ರದ ಪಾತ್ರವರ್ಗದಲ್ಲಿದ್ದರು.