ರೇವಂತ್- ಮೋಹನಾ ಪ್ರೀತಿ ಹಾಡು ಇತ್ಯಾದಿ: 'ಗೂಗ್ಲಿ' ಫ್ಲೇವರ್ 'ರೇಮೊ' ಟ್ರೈಲರ್ ಸೂಪರ್!

ರಾಕ್‌ಸ್ಟಾರ್ ರೇವಂತ್ ಲವ್‌ ಸ್ಟೋರಿ

ಚಿತ್ರದ ನಾಯಕನ ರಾಕ್‌ಸ್ಟಾರ್ ರೇವಂತ್. ನಾಯಕಿ ಮೋಹನಾ ಖ್ಯಾತ ಗಾಯಕಿ ಮೋಹನಾ. ಇವರಿಬ್ಬರ ಪ್ರೇಮ್ ಕಹಾನಿ 'ರೇಮೊ'. ಇವರಿಬ್ಬರು ಹೆಸರಿನ ಮೊದಲ ಅಕ್ಷರಗಳನ್ನು ಸೇರಿಸಿ 'ರೇಮೊ' ಎನ್ನುವ ವಿಭಿನ್ನ ಟೈಟಲ್ ಇಟ್ಟಿರೋದು ಗೊತ್ತೇಯಿದೆ. ರಾಕ್‌ಸ್ಟಾರ್ ರೇವಂತ್‌ಗೆ ನಾನೇ ನಂಬರ್ ವನ್, ನನ್ನ ಬಿಟ್ಟರೆ ಯಾರು ಇಲ್ಲ ಎನ್ನುವ ಧಿಮಾಕು. ರಾತ್ರೋರಾತ್ರಿ ಮೋಹನಾ ಕೂಡ ಗಾಯಕಿಯಾಗಿ ಸೆನ್ಸೇಷನ್ ಕ್ರಿಯೇಟ್ ಮಾಡುತ್ತಾಳೆ. ನಂಬರ್ ವನ್ ಪಟ್ಟಕ್ಕಾಗಿ ಇಬ್ಬರ ನಡುವೆ ಪೈಪೋಟಿ ಶುರುವಾಗುತ್ತದೆ. ಈ ಹಾದಿಯಲ್ಲಿ ರೇವಂತನ ಪ್ರೇಮಪಾಶದಲ್ಲಿ ಮೋಹನಾ ಸಿಲುಕುತ್ತಾಳೆ. ಮುಂದೆ ಈ ಲವ್ ಸ್ಟೋರಿ ಏನೆಲ್ಲಾ ತಿರುವು ಪಡೆದುಕೊಳ್ಳುತ್ತೆ ಎನ್ನುವುದನ್ನು ತೆರೆಮೇಲೆ ನೋಡಬೇಕು.

ಇಶಾನ್- ಆಶಿಕಾ ಮೋಡಿ

ಪ್ರತಿಫ್ರೇಮ್ ಕಣ್ಣಿಗೆ ಹಬ್ಬ ಎನ್ನುವಂತಿದೆ. ಸಿಂಪಲ್ ಕಥೆಯನ್ನು ಬಹಳ ಪರಿಣಾಮಕಾರಿಯಾಗಿ ಪವನ್ ಒಡೆಯರ್ ಕಟ್ಟಿಕೊಟ್ಟಿರೋದು ಮೇಲ್ನೋಟಕ್ಕೆ ಗೊತ್ತಾಗುತ್ತಿದೆ. ಈ ಹಿಂದೆ ಪುರಿ ಜಗನ್ನಾಥ್ ನಿರ್ದೇಶನದ 'ರೋಗ್‌' ಚಿತ್ರದಲ್ಲಿ ಹೀರೊ ಆಗಿ ಲಾಂಚ್ ಆಗಿದ್ದ ಇಶಾನ್, 'ರೇಮೊ' ಮೂಲಕ ಮತ್ತೊಮ್ಮೆ ಪ್ರೇಕ್ಷಕರ ಮನಗೆಲ್ಲಲು ಬರುತ್ತಿದ್ದಾರೆ. ಸ್ಟೈಲಿಶ್ ಲುಕ್, ಮ್ಯಾನರಿಸಂ, ಆಟಿಟ್ಯೂಡ್ ನಿಜಕ್ಕೂ ರಾಕ್‌ಸ್ಟಾರ್ ಆಗಿ ಮೋಡಿ ಮಾಡಿದ್ದಾರೆ. ಆಕ್ಷನ್ ಸೀಕ್ವೆನ್ಸ್‌ನಲ್ಲಿ ಕೊಂಚ ಹೆಚ್ಚೇ ಅಬ್ಬರಿಸಿದ್ದಾರೆ. ಆಶಿಕಾ ಮುದ್ದಾಗಿ ಕಾಣಿಸೋದಷ್ಟೇ ಅಲ್ಲ ಮೋಹನಾ ಪಾತ್ರದಲ್ಲಿ ಪ್ರೇಕ್ಷಕರ ಮನಗೆಲ್ಲುವ ಸುಳಿವು ಸಿಗುತ್ತಿದೆ.

'ರೇಮೊ' ಚಿತ್ರದಲ್ಲಿ 'ಗೂಗ್ಲಿ' ಫ್ಲೇವರ್

9 ವರ್ಷಗಳ ಹಿಂದೆ ರಾಕಿಂಗ್ ಸ್ಟಾರ್ ಯಶ್ ಹಾಗೂ ಕೃತಿ ಕರಬಂಧ ನಟನೆಯ 'ಗೂಗ್ಲಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಬಹಳ ವಿಭಿನ್ನ ಕಥೆ ಕಟ್ಟಿಕೊಟ್ಟು ಪವನ್ ಒಡೆಯರ್ ಸಕ್ಸಸ್ ಕಂಡಿದ್ದರು. 'ರೇಮೊ' ಟ್ರೈಲರ್ ನೋಡಿದವರಿಗೆ 'ಗೂಗ್ಲಿ' ನೆನಪಾಗುತ್ತಿದೆ. ಅದರಲ್ಲೂ ನಾಯಕಿ ನಾಯಕನ ಕೆನ್ನೆಗೆ ಬಾರಿಸೋದು, ತಿರುಗಿ ನಾಯಕ ಕೂಡ ನಾಯಕಿ ಕೆನ್ನೆಗೆ ಬಾರಿಸೋದು ಅದೇ ಸಿನಿಮಾವನ್ನು ನೆನಪಿಸುತ್ತಿದೆ. ಮ್ಯೂಸಿಕ್ ಲವ್‌ಸ್ಟೋರಿಗೆ ಎಮೋಷನ್ ಸೇರಿಸಿ ಸಿನಿಮಾ ಕಟ್ಟಿಕೊಟ್ಟಿರುವುದು ಗೊತ್ತಾಗುತ್ತಿದೆ. ಟ್ರೈಲರ್ ನೋಡಿದವರು 'ಗೂಗ್ಲಿ' ರೀತಿಯಲ್ಲೇ 'ರೇಮೊ' ಕೂಡ ಹಿಟ್ ಆಗುತ್ತದೆ ಎನ್ನುತ್ತಿದ್ದಾರೆ.

ನವೆಂಬರ್ 25ಕ್ಕೆ 'ರೇಮೊ' ರಿಲೀಸ್

'ರೇಮೊ' ಚಿತ್ರದಲ್ಲಿ ನಾಯಕನ ತಂದೆ ತಾಯಿ ಪಾತ್ರಗಳಲ್ಲಿ ತಮಿಳು ನಟ ಶರತ್‌ಕುಮಾರ್ ಹಾಗೂ ಮಧೂ ಮಿಂಚಿದ್ದಾರೆ. ಇನ್ನು ನಾಯಕಿ ತಂದೆ ಪಾತ್ರದಲ್ಲಿ ಅಚ್ಯುತ್ ಕುಮಾರ್ ಮಿಂಚಿದ್ದಾರೆ. ವೈಧಿ ಸಿನಿಮಾಟೋಗ್ರಫಿ ಬಹಳ ಸೊಗಸಾಗಿದೆ. ನವೆಂಬರ್ 25ಕ್ಕೆ ವಿಶ್ವದಾದ್ಯಂತ 'ರೇಮೊ' ಸಿನಿಮಾ ಬಿಡುಗಡೆ ಆಗಲಿದೆ. ಯಾವುದೇ ವಿಚಾರದಲ್ಲೂ ರಾಜಿಯಾಗದೇ ಬಹಳ ಅದ್ಧೂರಿಯಾಗಿ ಸಿನಿಮಾ ನಿರ್ಮಿಸಲಾಗಿದೆ. ಸದ್ಯ ಬಾಲಿವುಡ್‌ ಸಿನಿಮಾದಲ್ಲಿ ಬ್ಯುಸಿಯಾಗಿರುವ ಪವನ್ ಒಡೆಯರ್‌ಗೆ ಕನ್ನಡದಲ್ಲಿ ಈ ಸಿನಿಮಾ ಸಕ್ಸಸ್ ತಂದುಕೊಡುತ್ತಾ ಕಾದು ನೋಡಬೇಕು.