'ರಾಕಿಂಗ್ ಸ್ಟಾರ್' ಯಶ್ ಬಗ್ಗೆ ರಚಿತಾ ರಾಮ್ ಹೇಳಿದ್ದೇನು?

ಯಶ್ ಡೆಡಿಕೇಶನ್ ಅದ್ಭುತ!

'ಕೆ.ಜಿ.ಎಫ್' ನಂತಹ ಚಿತ್ರಕ್ಕೆ ಅಷ್ಟು ದೊಡ್ಡ ಮಟ್ಟದಲ್ಲಿ ತೊಡಗಿಸಿಕೊಳ್ಳಲು ಬಹುಶಃ ಯಶ್ ನಂಥವರಿಂದ ಮಾತ್ರ ಸಾಧ್ಯ. ಯಾಕೆಂದರೆ, ಅವರು ಎರಡು ವರ್ಷಕ್ಕೂ ಹೆಚ್ಚು ಕಾಲವನ್ನು ಅದೊಂದು ಚಿತ್ರಕ್ಕಾಗಿ ಮೀಸಲಿರಿಸಿದ್ದಾರೆ. ಒಟ್ಟಿನಲ್ಲಿ ಕನ್ನಡಿಗರಾಗಿ ನಮಗೆ ಇದು ಹೆಮ್ಮೆಯ ವಿಷಯ ಎಂದರು ಡಿಂಪಲ್ ಕ್ವೀನ್ ರಚಿತಾ ರಾಮ್.

ನಮ್ಮ ನಾಯಕಿಯರಿಗೆ ಇಂಥ ಅವಕಾಶಗಳಿಲ್ಲ

"ಹೀರೋಗಳಿಗೇನೇ ಇಂಥ ಅವಕಾಶಗಳು ಸಿಗುವುದು ಅಪರೂಪ. ಇನ್ನು ನಾಯಕಿಯರಿಗೆ ಎಲ್ಲಿ ಸಿಗಲು ಸಾಧ್ಯ?" ಎನ್ನುವುದು ರಚಿತಾರ ನಿರಾಸೆ. ಅವರ ಈ ಹತಾಶೆಯ ಮಾತು ವ್ಯಕ್ತವಾಗಿದ್ದು "ಇಂಥ ಚಿತ್ರ ಸಿಕ್ಕರೆ ನೀವು ಕೂಡ ವರ್ಷಗಟ್ಟಲೆ ಡೆಡಿಕೇಟ್ ಆಗಿ ಕೆಲಸ ಮಾಡುತ್ತೀರಾ" ಎಂಬ ಪ್ರಶ್ನೆಗೆ. ಹೌದು, ನಾಯಕಿಯರನ್ನು ನಂಬಿ ನಮ್ಮಲ್ಲಿ ಚಿತ್ರಗಳು ನಿರ್ಮಾಣವಾಗೋದು ಕಡಿಮೆ. ಆದರೆ ತೆಲುಗಿನಲ್ಲಿ 'ಬಾಹುಬಲಿ'ಯಂಥ ಚಿತ್ರದಲ್ಲಿ ಕೂಡ ಅನುಷ್ಕಾ ಅವರ ಪಾತ್ರಕ್ಕೆ ಪ್ರಾಮುಖ್ಯತೆ ಇದೆ. ಅವರನ್ನು ಹೊರಗಿರಿಸಿ 'ಬಾಹುಬಲಿ' ಚಿತ್ರದ ಕಲ್ಪನೆಯೇ ಸಾಧ್ಯವಿಲ್ಲ. ಮಾತ್ರವಲ್ಲ, ಅವರ 'ರುದ್ರಮ್ಮದೇವಿ', 'ಅರುಂಧತಿ'ಯಂಥ ಚಿತ್ರಗಳು ಅಲ್ಟಿಮೇಟ್. ಆಕೆ ಕೂಡ ನಮ್ಮ ಕನ್ನಡದವರೇ ಎನ್ನುವ ಖುಷಿ ಒಳಗೆಲ್ಲೋ ಇದ್ದೇ ಇದೆ.

ರಾಧಿಕಾ ಬಗ್ಗೆಯೂ ಮೆಚ್ಚುಗೆ ಮಾತು

ಇನ್ನು ಇತ್ತೀಚೆಗೆ ರಾಧಿಕಾ ಕುಮಾರಸ್ವಾಮಿ ಕೂಡ ನಟನೆಗೆ ಅವಕಾಶವಿರುವ ದೊಡ್ಡ ಬಜೆಟ್ಟಿನ ಚಿತ್ರಗಳಲ್ಲಿ ನಟಿಸುತ್ತಿರುವ ಬಗ್ಗೆ ರಚಿತಾ ಅವರ ಗಮನ ಸೆಳೆಯಲಾಯಿತು. ಹೌದು, ''ನಾನು ಕೂಡ ಅದರ ಪೋಸ್ಟರ್ ನೋಡಿದ್ದೇನೆ. ಅದರ ಲುಕ್ ಕಂಡಾಗಲೆಲ್ಲ ಮೈ ರೋಮಾಂಚನಗೊಳ್ಳುವಂತಿದೆ. ಅವರು ಕೂಡ ಅಷ್ಟೇ. ಪಾತ್ರಕ್ಕಾಗಿ ಎಷ್ಟು ಸಮರ್ಪಣಾಭಾವ ಹೊಂದಿದ್ದಾರೆ ಎನ್ನುವುದು ಗಮನಾರ್ಹ. ಒಟ್ಟಿನಲ್ಲಿ ನಾಯಕಿಯರು ಕೂಡ ಅಂತಾರಾಜ್ಯ ಮಟ್ಟದಲ್ಲಿ ಗುರುತಿಸಿಕೊಳ್ಳುವ ಲಾರ್ಜರ್ ದ್ಯಾನ್ ಲೈಫ್ ಪಾತ್ರಗಳನ್ನು ಮಾಡಬಲ್ಲರು. ಆದರೆ ಅವರನ್ನು ನಂಬಿ ದುಡ್ಡು ಹಾಕುವಂಥ ನಿರ್ಮಾಪಕರು ಕೂಡ ಬೇಕಾಗುತ್ತಾರೆ'' ಎನ್ನುವುದು ರಚಿತಾ ಅಭಿಪ್ರಾಯ.

ಚಿತ್ರಗಳಲ್ಲಿ ರಚಿತಾ ಬಿಜಿ

ರಚಿತಾ ಅವರ ನಟನೆಯ ಬಿಗ್ ಬಜೆಟ್ ಚಿತ್ರಗಳು ಇನ್ನಷ್ಟೇ ತೆರೆಗೆ ಬರಲು ಸಿದ್ಧವಾಗುತ್ತಿವೆ. ಅವುಗಳಲ್ಲಿ 'ಸೀತಾರಾಮ ಕಲ್ಯಾಣ' ಮತ್ತು ಶಿವರಾಜ್ ಕುಮಾರ್ ನಟನೆಯ ಇನ್ನೂ ಹೆಸರು ಇಡದ ಚಿತ್ರ ಹಾಗೂ ಏಪ್ರಿಲ್ ಸಿನಿಮಾಗಳು ಸೇರಿವೆ. ಪ್ರತಿಯೊಂದು ಕೂಡ ವಿಭಿನ್ನ ಹಾಗೂ ಶಿವಣ್ಣನ ಜೋಡಿಯ ಚಿತ್ರವಂತೂ ಚಾಲೆಂಜಿಂಗ್ ಪಾತ್ರ ಎಂದಿದ್ದಾರೆ ರಚಿತಾ. ಒಟ್ಟಿನಲ್ಲಿ 'ಕೆ.ಜಿ.ಎಫ್' ಚಿತ್ರ ಹಲವರ ಮಹತ್ವಾಕಾಂಕ್ಷೆಗಳ ಆರಂಭಕ್ಕೆ ಮುನ್ನುಡಿಯಾಗುತ್ತಿರುವುದರಲ್ಲಿ ಸಂದೇಹವೇ ಇಲ್ಲ.