ಮಹೇಶ್ ಬಾಬು 'ಮಹರ್ಷಿ' ವಿರುದ್ಧ ಕನ್ನಡಾಭಿಮಾನಿಗಳು ಆಕ್ರೋಶ

ಕನ್ನಡಿಗರ ಮೇಲೆ ದಬ್ಬಾಳಿಕೆ

''496 ಶೋ ಅಂದರೆ ಬೆಂಗಳೂರಿನಲ್ಲೇ 100 ಚಿತ್ರಮಂದಿರಗಳಲ್ಲಿ ಬಿಡುಗಡೆ. ಇದಕ್ಕಿಂತ ಕನ್ನಡಿಗರ ಮೇಲೆ ತೆಲುಗರ ದಬ್ಬಾಳಿಕೆಗೆ ಉದಾಹರಣೆ ಬೇಕೇ? ಕನ್ನಡಕ್ಕೆ ಡಬ್ ಮಾಡಲ್ಲ ಅಂತ ಹಠಕ್ಕೆ ಬಿದ್ದಿರುವ ಸ್ವಾಗತ್ ಎಂಟರ್ಪ್ರೈಸಸ್ ಅವರ ಮುಂದೆ ಲೆಕ್ಕಕ್ಕಿಲ್ಲದೆ ಹೋದವೇ ಕನ್ನಡ ಸಂಘಟನೆಗಳು'' ಎಂದು ಡಬ್ಬಿಂಗ್ ಹೋರಾಟಗಾರ ಗಣೇಶ್ ಚೇತನ್ ಟ್ವಿಟ್ಟರ್ ನಲ್ಲಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದು ತೆಲುಗು ಹೇರಿಕೆ.!

ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ತೆಲುಗು ಸಿನಿಮಾ ಮಹರ್ಷಿ ಕರ್ನಾಟಕದಲ್ಲಿ ಬಿಡುಗಡೆ ಮಾಡುವುದರ ಅವಶ್ಯಕತೆ ಏನಿತ್ತು? ಇದು ತೆಲುಗು ಹೇರಿಕೆ ಅಲ್ಲವೇ? ಡಬ್ಬಿಂಗ್ ಮಾಡಿ ಬಿಡುಗಡೆ ಮಾಡಬಹುದು ಅಲ್ಲವೇ ಎಂದು ಮತ್ತೊಬ್ಬ ಡಬ್ಬಿಂಗ್ ಹೋರಾಟಗಾರ ಟ್ವೀಟ್ ಮಾಡಿದ್ದಾರೆ.

ಎಲ್ಲಿ ಹೋಯ್ತು ನಿಮ್ಮ ಸ್ವಾಭಿಮಾನ?

''ಮಾತೆತ್ತಿದರೆ ಸ್ವಾಭಿಮಾನ ಸ್ವಾಭಿಮಾನ ಎನ್ನುತ್ತಿದ್ದವರು ಈಗ ಎಲ್ಲಿ? ಎಲ್ಲೋಯ್ತ್ರಯ್ಯ ನಿಮ್ಮ ಸ್ವಾಭಿಮಾನ? ಎಂದು ಕೆಲವರು ಪ್ರಶ್ನಿಸುತ್ತಿದ್ದಾರೆ. ಕನ್ನಡ ನೆಲದಲ್ಲಿ ಹೆಚ್ಚು ಸಂಖ್ಯೆಯಲ್ಲಿ ತೆಲುಗು ಸಿನಿಮಾ ರಿಲೀಸ್ ಮಾಡಿರುವುದಕ್ಕೆ ತೀವ್ರ ಖಂಡನೆ ವ್ಯಕ್ತವಾಗುತ್ತಿದೆ.

ಡಬ್ಬಿಂಗ್ ವಿರೋಧಿಗಳು ಎಲ್ಲಿದ್ದೀರಾ?

ಡಬ್ಬಿಂಗ್ ಸಿನಿಮಾ ರಿಲೀಸ್ ಮಾಡಿದ್ರೆ ಪ್ರತಿಭಟನೆ ಮಾಡುವ ಹಾಗೂ ವಿರೋಧ ಮಾಡುವ ಡಬ್ಬಿಂಗ್ ವಿರೋಧಿಗಳು ಈಗ ಎಲ್ಲಿದ್ದೀರಾ ಎಂದು ಕೇಳುತ್ತಿದ್ದಾರೆ.

ಡಬ್ಬಿಂಗ್ ಮಾಡಿ ರಿಲೀಸ್ ಮಾಡಲಿ

ತೆಲುಗು ಭಾಷೆಯಲ್ಲಿ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಸಿನಿಮಾ ರಿಲೀಸ್ ಆದ್ರೆ ಕನ್ನಡ ಭಾಷೆ ಹೇಗೆ ಬೆಳೆಯುತ್ತೆ. ಅದರ ಬದಲು ಕನ್ನಡದಲ್ಲಿ ಡಬ್ ಮಾಡಿ ಸಿನಿಮಾ ರಿಲೀಸ್ ಮಾಡಿದ್ರೆ ಅದರಿಂದ ನೋಡುವವರಿಗೆ ಕನ್ನಡ ಭಾಷೆ ಕಲಿಯುವುದಕ್ಕೂ ಸಹಕಾರಿಯಾಗುತ್ತೆ. ಪರಭಾಷೆ ಚಿತ್ರಗಳನ್ನ ಡಬ್ ಮಾಡಿ ರಿಲೀಸ್ ಮಾಡುವುದು ಉತ್ತಮ ಎಂದು ಡಬ್ಬಿಂಗ್ ಪರ ಬೆಂಬಲಿಗರು ಬೇಡಿಕೆಯಾಗಿದೆ.